ایمز ٹی وی(بزنس)برطانوی عوام کی ریفرنڈم میں یورپی یونین چھوڑنے کے حق میں اکثریتی رائے کے بعد مختلف کمپنیوں نے اپنا کاروبار بیرون ملک منتقل کرنے پر غور شروع کردیا ہے۔بزنس لابی گروپ دی انسٹیٹیوٹ آف ڈائریکٹرز کے سروے کے مطابق 20 فیصد بزنس لیڈرز اپنا کاروبار برطانیہ سے باہر لے جانے پر غور کر رہے ہیں، حیران کن ریفرنڈم نتائج کے باعث ہر 4 میں سے 1 فرم بھرتیاں بند کرنے پرسوچ بچار کر رہی ہے، دوتہائی یا 64 فیصد نے ریفرنڈم کے نتائج کو کاروبار کے لیے منفی اور 23 فیصد نے مثبت قرار دیا جبکہ 9 فیصد نے کہاکہ اس سے کاروبار پر کوئی اثر نہیں پڑے گا۔ گروپ کے ڈائریکٹر جنرل سائمن واکر نے کہاکہ ریفرنڈم نتیجے کے بعد کاروبار اس سے مطابقت پیدا کر کے کامیابی حاصل کرنے کی پلاننگ میں مصروف ہوں گے، ہم کچھ چھپا نہیں سکتے، ہمارے کئی ممبرز پریشان ہیں اور اکثریت ریفرنڈم کے نتیجے کو اپنے کاروبار کیلیے خراب سمجھتی ہے اور اسی وجہ سے سرمایہ کاری و بھرتیاں روکنے یا کم کرنے پر غور کر رہی ہے۔