کراچی: لاہور دنیا کے آلودہ ترین شہروں میں پہلے اور کراچی تیسرے نمبر پر آگیا۔
ایئر کوالٹی انڈیکس کے مطابق لاہور 398 پرٹیکیولیٹ میٹرز کے ساتھ دنیا کے آلودہ ترین شہروں میں پہلا، بھارتی دارالحکومت نئی دہلی 266 پرٹیکیولیٹ میٹرز کے ساتھ دوسرا اور کراچی 245 پرٹیکیولیٹ میٹرز کے ساتھ تیسرا آلودہ ترین شہر رہا۔
دوسری جانب اسموگ میں کمی کے پیش نظر پنجاب حکومت نے گزشتہ روز پابندیوں میں مزید نرمی کرتے ہوئے لاہور سمیت چار اضلاع میں تعمیراتی کام کی اجازت دے دی۔
سرکاری و نجی دفاتر کو 100 فیصد عملے کے ساتھ کام کرنے کی اجازت بھی مل گئی، فیصلے کا اطلاق لاہور، گوجرانوالہ، ملتان، فیصل آباد پر ہوگا۔
زگ زیگ ٹیکنالوجی پر بھٹے بھی کام کرسکیں گے۔ ہیوی ٹریفک پیر سے جمعرات تک اضلاع میں داخل ہوسکے گی، جمعہ سے اتوار تک ہیوی ٹریفک کو داخلے کی اجازت نہیں ہوگی۔
نوٹیفکیشن کے مطابق دکانیں، مارکیٹس، شاپنگ مالز 8 بجے بند کرنے کا فیصلہ برقرار ہے، ریسٹورینٹس کا ان ڈور، آوٹ ڈور ڈائننگ 10 بجے تک ہوگا، ہوڈ سسٹم نصب کیے بغیر باربی کیو کی اجازت نہیں ہوگی۔
واضح رہے کہ حکومت پنجاب نے لاہور بھر کے اسکول کالجز یونیورسٹیز اور تفریحی مقامات عوام کے لیے پہلے ہی کھول دیے تھے۔
کراچی میں شاہراہ فیصل آج رات سے صبح تک عام ٹریفک کیلئے بند رہے گی، ٹریفک پولیس کی جانب سے شہریوں کو متبادل راستے اختیار کرنے کی ہدایت کردی گئی۔
ٹریفک پولیس کے مطابق کراچی کی شاہراہ فیصل پر ڈرگ روڈ سے کارساز تک دونوں اطراف کی سڑکیں آج رات 2 بجے سے صبح 5 بجے تک بند رہیں گی۔
ٹریفک پولیس نے شہریوں مطلع کیا کہ کارساز سے حسن اسکوائر اور حبیب رحمت اللہ روڈ بھی بند رہے گی۔
ٹریفک پولیس کے مطابق کراچی ائیرپورٹ سے ٹریفک کو کارساز روڈ اور اسٹیڈیم جانے کی اجازت نہیں ہوگی اس لیے شہری ڈرگ روڈ سے راشد منہاس روڈ اور ملینیم سے نیپا کا راستہ اختیار کریں۔
ٹریفک پولیس کا کہنا ہے کہ شہری بلوچ کالونی پل کے نیچے سے شہید ملت روڈ اور حسن اسکوائر کا راستہ اختیار کریں۔
ٹریفک پولیس کا کہنا ہے کہ ڈرائیور نیپا سے راشد منہاس روڈ، ڈرگ روڈ کا راستہ اختیار کریں۔
ایئرپورٹ اور اس کے ملحقہ علاقوں کو سیکیورٹی خدشات کے پیشِ نظر ریڈ زون قرار دے دیا گیا.
ایئرپورٹ کے اطراف میں آنے والے راستے محدود کر دیے گئے ہیں اور ریڈ زون میں صرف ان افراد کو داخلے کی اجازت ہوگی جو ایئرپورٹ آنے، جانے یا وہاں اپنے فرائض سر انجام دینے کے مقصد سے موجود ہوں گے۔
تفصیلات کے مطابق کراچی ایئر پورٹ پر چینی انجینئرز کے قافلے پر خود کش حملے اور شارع فیصل پر دو لگژری گاڑیوں میں سوار افراد کے درمیان فائرنگ کے واقعے کے بعد شہر قائد میں سیکیورٹی کے انتظات مزید سخت کر دیے گئے، سیکیورٹی خدشات کے پیشِ نظر ایئرپورٹ اور اس کے ملحقہ علاقوں کو ریڈ زون قرار دیا گیا ہے۔
ایس ایس پی ملیر کاشف آفتاب عباسی کے مطابق ایئرپورٹ کے قریب پانچ اہم مقامات پر اسٹار گیٹ، سی اے اے کلب، مدام بریج، ماڈل کالونی موڑ اور رینجرز چوکی فیونرل ایریا میں پولیس چیک پوائنٹس قائم کر دیے ہیں جہاں 24 گھنٹے پولیس کی نفری تعینات ہوگی۔ ان مقامات پر پولیس اہلکار ہر مشکوک شخص اور گاڑی کی چیکنگ کریں گے تاکہ کسی بھی غیر معمولی سرگرمی کو روکا جا سکے۔
ایس ایس پی ملیر نے کراچی ایئر پورٹ آنے والے تمام مسافروں سے درخواست کی ہے کہ اپنی پرواز کے وقت سے قبل ایئرپورٹ پہنچیں تاکہ سیکیورٹی مراحل سے بآسانی گزر سکیں اور کسی تاخیر کا سامنا نہ کرنا پڑے۔
انھوں نے کہا کہ ایم 9 موٹر وے، ملیر کینٹ، میمن گوٹھ، ماڈل کالونی اور دیگر ملحقہ علاقوں کے رہائشیوں سے گزارش ہے کہ شہر کی طرف سفر کے لیے ریڈ زون سے گزرنے کے بجائے مین شارع فیصل اور ملیر ہالٹ کا راستہ اختیار کریں۔ ڈرگ روڈ سے آنے والے مسافر، جو ملیر کینٹ یا ماڈل کالونی کی طرف جا رہے ہوں، ان سے بھی گزارش ہے کہ اسٹار گیٹ یا سی اے اے کلب روڈ استعمال کرنے کے بجائے ملیر ہالٹ سے گزرتے ہوئے اپنی منزل کی طرف سفر کریں۔
ایس ایس پی ملیر نے کہا کہ ایئرپورٹ جانے والے تمام افراد سے اپیل ہے کہ ریڈ زون میں داخلے سے قبل اپنی پرواز کی ٹکٹ اور قومی شناختی کارڈ ہمراہ رکھیں تاکہ سیکیورٹی چیکنگ کے عمل میں آسانی ہو۔ انھوں نے کہا کہ مسافروں کی سہولت، تحفظ اور محفوظ سفر ہماری اولین ترجیح ہے۔ ضلع ملیر پولیس عوام کی حفاظت اور امن کے قیام کے لیے ہر دم تیار ہے، کسی بھی مشکل یا پریشانی کی صورت میں پولیس آپ کی مدد کے لیے ہمہ وقت موجود ہے۔
کراچی: آرٹس کونسل آف پاکستان کراچی میں 38 روزہ ورلڈ کلچر فیسٹیول اپنے اختتام کو پہنچ گیا۔
عالمی ثقافتی میلے کی اختتامی تقریب وائے ایم سی اے گراؤنڈ میں منعقد کی جائے گی۔
تقریب کا آغاز شام 6 بجے ہو گا جبکہ رجسٹریشن کروانے والوں کے لیے اس تقریب میں داخلہ مفت ہے۔
اختتامی تقریب میں لیجنڈ طنز و مزاح اور ڈرامہ نگار انور مقصود، گلوکار و موسیقار عاصم اظہر، لوک گائیک اختر چنل زہری اور شاعر تہذیب حفی پرفارم کریں گے۔
دفاعی نمائش آئیڈیاز 2024 رواں ماہ کراچی کے ایکسپو سینٹر میں ہوگی۔
کراچی کے ایکسپو سینٹر میں منعقد کی جانے والی 4 روزہ دفاعی نمائش آئیڈیاز 2024 میں افتتاحی تقریب سمیت متعدد سرگرمیاں شامل ہیں۔ نمائش میں کراچی کے عوام اور غیرملکی معززین کے لیے دفاعی صنتعوں سے متعلق موضوعات پر بین الاقوامی سیمنارز کا انعقاد کیا جائے گا۔ کلفٹن کے علاقے سی ویو پرنشان پاکستان پر شو بھی منعقد کیا جائے گا۔
آئیڈیاز خطے کی بڑی دفاعی نمائشوں میں سے ایک ہے جہاں دنیا بھر کے نمائش کنندگان اپنی دفاعی مصنوعات اور سازوسامان پیش کرتے ہیں۔
دوسری جانب پی آئی اے نے فضائی بیڑے میں شامل اہم طیاروں پردفاعی نمائش آئیڈیاز کا لوگو پینٹ کروادیا۔ بوئنگ 777 اور ائیر بس 320 کے 4 جہازوں پر لوگو پینٹ کروائے گئے ہیں۔ نیرو باڈی اور وائیڈ باڈی طیارے ملکی و بین الاقوامی فضائی روٹس پر استعمال کیے جاتے ہیں۔آئیڈیاز دوسالہ دفاعی نمائش ہے۔ آخری بارنمائش کا انعقاد 2022 میں کیا گیا تھا۔
کراچی:شہر قائد میں گرم و خشک ہواؤں کے سبب جمعے اور ہفتے کو کراچی کی فضاؤں پر دھند چھا سکتی ہے۔
محکمہ موسمیات ارلی وارننگ سینٹر پیش گوئی کے مطابق جمعے اور ہفتے کو شہر پر بلوچستان کی گرم و خشک ہوائیں دوبارہ اثرانداز ہوسکتی ہیں، صحرائی ہوائیں چلنے کے سبب صبح کے وقت شہر کی فضاوں پر دھند چھانے کا امکان ہے۔
دھند چھانے کی وجہ سے مختصر وقت کے لیے حدنگاہ متاثر ہوسکتی ہے۔
محکمہ موسمیات کا کہنا ہے کہ آج شہر کا مطلع گرم و مرطوب رہنے کی توقع ہے، زیادہ سے زیادہ درجہ حرارت 34 سے 36 ڈگری کے درمیان ریکارڈ ہو سکتا ہے۔
صوبے کے دیگر اضلاع میں موسم گرم و خشک رہنے کا امکان ہے۔
کراچی میں فضائی آلودگی بڑھنے سے سانس کے مرض میں اضافہ ہونے لگا۔
صدر پیڈیٹریکس ایسوسی ایشن کے مطابق شہر میں سانس کے مرض میں یومیہ 80 سے 90 بچے سرکاری اسپتال آرہے ہیں، گلے اور سینے کے انفیکشن بڑھنے سے دمہ کا مرض ہوتا ہے۔
صدر پیڈیٹریکس ایسوسی ایشن نے کہا کہ گزشتہ چند ماہ کے مقابلے اس وقت کراچی میں سانس کے مرض میں دگنا اضافہ ہواہے، احتیاطی تدابیر نہ کی گئیں تو سانس کا مرض تشویشناک صورت اختیارکرسکتا ہے۔
کراچی: محکمہ موسمیات نے شہر قائد کا موسم مزید تین دن گرم رہنے کی پیشگوئی کی ہے۔
محکمہ موسمیات نے بحیرہ عرب میں ہونے والی سرگرمی کے حوالے سے بتایا کہ ہوا کا کم دباؤ شدت اختیار کرگیا ہے جو کراچی کے جنوب سے 900 کلو میٹر دور ہے۔
محکمہ موسمیات کے مطابق کل تک ہوا کا کم دباؤ مزید شدت اختیار کرکے ڈپریشن بن سکتا ہے تاہم اس سسٹم سے پاکستان کے کسی بھی ساحلی علاقے کو فی الحال کوئی خطرہ نہیں۔
محکمہ موسمیات نے بتایا کہ سسٹم کے زیر اثر آج رات سے 14 اکتوبر تک تھرپارکر سمیت عمرکوٹ، بدین اور سجاول کے اضلاع میں بھی چند مقامات پر آندھی اور گرج چمک کے ساتھ بارش کا امکان ہے۔
دوسری جانب موسم کا حال بتانے والوں نے کراچی کے حوالے سے پیشگوئی کی ہے کہ کراچی کا موسم آئندہ 2 سے 3 دن شدید گرم اور خشک رہنےکا امکان ہے جب کہ اس دوران درجہ حرارت 37 سے 39 ڈگری سینٹی گریڈ تک بڑھ سکتا ہے۔
محکمہ موسمیات کے مطابق آج بھی کراچی کے مضافات میں کہیں کہیں آندھی اور گرج چمک کے ساتھ بارش کی توقع کی جارہی ہے، اس کے علاوہ سندھ کے بیشتر مقامات پر موسم گرم اور خشک رہنے کا امکان ہ
کراچی: محکمہ موسمیات نے کراچی میں درجہ حرارت دوبارہ بڑھنے کی پیش گوئی کردی۔
منگل کو زیادہ سے زیادہ درجہ حرارت 38 ڈگری سینٹی گریڈ تک تجاوز کرسکتا ہے۔
محکمہ موسمیات کے ارلی وارننگ سینٹر نے ایڈوائزری جاری کر دی جس کے مطابق کل سے شہر پر بلوچستان کی شمال مغربی ریگستانی ہوائیں اثرانداز ہونا شروع ہوں گی جس کے سبب پیر کو زیادہ سے زیادہ پارہ 37 ڈگری تک بڑھ سکتا ہے۔
ہوا میں نمی کا تناسب زیادہ رہنے کے نتیجے میں گرمی کی شدت اصل درجہ حرارت سے زائد محسوس کی جا سکتی ہے۔
آج شہر کا موسم جزوی ابرآلود اور پارہ 33 تا 35 ڈگری ریکارڈ ہوسکتا ہے، شہر میں گزشتہ دنوں سمندر کی نچلی سطح کے بادلوں اور تیز ہواؤں کے سبب موسم معتدل رہا۔
سندھ کے دیگر اضلاع میں موسم گرم، شدید گرم اور خشک رہنے کا امکان ہے۔
اکتوبر کا مہینہ ہر سال گرم و مرطوب گزرتا ہے جبکہ نومبر کے اوائل یا وسط سے موسم خنک ہونا شروع ہوگا۔
کراچی: محکمہ موسمیات نے شہر قائد میں موسم کے حوالے سے پیشگوئی کی ہے۔
میڈیا ذرائع کے مطابق چیف میٹرولوجسٹ سردار سرفراز کاکہنا ہے کہ کراچی میں اکتوبر کا مہینہ گرم گزرے گا۔
انہوں نے کہا کہ شہر میں 9 یا 10اکتوبر سے گرمی میں مزید اضافے کا امکان ہے۔
چیف میٹرولوجسٹ نے ملک بھر میں موسم کے حوالے سے بتایا کہ 6 یا 7 اکتوبر سے اسلام آباد، کے پی، فیصل آباد اور لاہور میں بارش ہو سکتی ہے جب کہ اسکردو اورکالام میں درجہ حرارت گر کر 6 سے7 ڈگری پر آگیا ہے۔