ایمز ٹی وی(ٹیکنالوجی)سویڈن کے طالب علموں نے ایک بہت کم توانائی استعمال کرنے والی ایسی گاڑی بنائی ہے جو بجلی کی قوت سے چلتی ہے اور ریل کی پٹڑیوں پر بھی دوڑتی ہے جب کہ اسے باکفایت سواری کا ایوارڈ دیا گیا ہے۔

ڈالارنا یونیورسٹی کے طلبا و طالبات کی ٹیم نے المونیم کی ایک گاڑی بنائی ہے جس کا وزن صرف 100 کلوگرام ہے اور اسے چلانے کے لیے 12 وولٹ اور 45 واٹ کی 4 بیٹریاں نصب کی گئی ہیں۔ تجرباتی طور پر اسے 3.36 کلومیٹر تک چلایا گیا جب کہ اس گاڑی میں 6 مسافر بیٹھ سکتے ہیں۔

گاڑی کے تمام حصے یونیورسٹی کے اندر ہی بنائے گئے ہیں بس اس میں بیرنگ، بیٹری اور موٹر باہر سے خریدی گئی ہیں۔ اسے بنانے کے لیے 4 طالب علموں نے کئی ڈیزائن پر کام کیا اور اس کے بعد ایک مؤثر گاڑی تیار کی ہے۔ پوری گاڑی المونیم کی بنی ہوئی ہے جب کہ اس کے پہیے فولاد سے بنائے گئے ہیں۔ اگرچہ ریلوے ٹریک پر یہ بہت تیزی سے نہیں چلی لیکن اس ٹیم نے توانائی کی بچت کے لحاظ سے ایک نیا ریکارڈ قائم کیا ہے جو 0.84 واٹ گھنٹے فی کلومیٹر فی مسافر ہے اور اسے ایکو شیل کار میراتھن میں پہلا انعام دیا گیا ہے۔