ایمزٹی وی(اسلام آباد)حکومت پاکستان نے عالمی عدالت انصاف میں کلبھوشن یادیو کیس میں جسٹس (ر) تصدق حسین جیلانی کو ایڈہاک جج نامزد کر دیا ہے۔
دفتر خارجہ کے ترجمان کے مطابق فیصلے سے عالمی عدالت انصاف کو آگاہ کر دیا گیاہے ۔جسٹس جیلانی 31 جولائی 2004ء سے 11 دسمبر 2013ء تک سپریم کورٹ کے جج اور11 دسمبر 2013 سے 5 جولائی 2014 تک چیف جسٹس آف پاکستان کے عہدوں پر فائز رہے ہیں ۔
عالمی عدالت انصاف کا طریقہ کار ایک فریق کو ایسے حالات میں ایڈہاک جج کو نامزد کرنے کا اختیار دیتا ہے جب متعلقہ قومیت کا کوئی جج وہاں موجود نہ ہو۔ اس وقت عالمی عدالت انصاف میں پاکستانی قومیت کا کوئی جج نہیں جبکہ بھارت کے جج بھنڈاری عالمی عدالت انصاف میں جج کی حیثیت سے موجود ہیں۔