(فیصل آباد) وفاقی وزیر مملکت عابد شیر علی کا کہنا ہے کہ عمران خان ملک میں انتشار کی سیاست اور پاکستان کے حالات قابو سے باہر کرنا چاہتے ہیں ۔

فیصل آباد میں میڈیا سے بات کرتے ہوئے وفاقی وزیرمملکت پانی وبجلی عابد شیر علی کا کہنا تھا کہ عمران خان نے پہلے بھی کینٹینر پر شوق پورا کیا تھا اور اب بھی وہ ملک میں انتشار کی سیاست چاہتے ہیں اور وہ چاہتے ہیں کہ پاکستان کے حالات قابو سے باہر ہوجائیں۔ ان کا کہنا تھا کہ خیبر پختون خوا اور پنجاب حکومت کا تقابلی جائزہ لینے کا چیلنج کرتا ہوں۔ خیبرپختون خوا میں تحریک انصاف کی حکومت بری طرح ناکام ہوچکی ہے وہاں تو خواجہ سراؤں کی بھی شامت آئی ہوئی ہے اور ان کا کوئی پرسان حال نہیں، صوبے میں چوہوں کی صورت اللہ کا عذاب آگیا ہے اور خیبر پختون خوا حکومت چوہے مار رہی ہے۔

وفاقی وزیر کا کہنا تھا کہ پنجاب میں جلد انصاف کی فراہمی کےلئے وزیر اعلیٰ شہباز شریف کی ہدایت پر 24 تھانوں میں فرنٹ ڈیسک بنا دیا گیا ہے جس میں عوام شکایات کا اندارج کراسکیں گے۔ اگر کسی اہلکار نے قانون کی خلاف ورزی کی تو اس کے خلاف سخت کارروائی کی جائے گی۔ پولیس تشدد نے چائے فروش کی ہلاکت کے معاملے کی تحقیقات سی پی او فیصل آباد کریں گے.