ایمزٹی وی(کراچی)پیپلزپارٹی کے چیئرمین بلاول بھٹو زرداری اور وزیراعلیٰ سندھ مراد علی شاہ نے سندھ کابینہ کو حتمی شکل دے دی ہے۔
بلاول ہاؤس کراچی میں چیئرمین پیپلز پارٹی بلاول بھٹو زرداری اور وزیراعلیٰ سندھ مراد علی شاہ کی ملاقات ہوئی جس میں کابینہ اراکین اور قلمدانوں کو حتمی شکل دے دی گئی ہے تاہم اعلان کچھ دیر میں کیا جائے گا۔ ابتدائی طور پر کابینہ 8 وزرا اور 2 مشیروں پر مشتمل ہوگی۔
ذرائع کے مطابق سعید غنی کو محکمہ بلدیات، سردارشاہ کو تعلیم و ثقافت، اسماعیل راہو کو زراعت و خوراک اور شہلا رضا کو محکمہ اطلاعات و وزیر ترقی نسواں مقرر کیا جاسکتا ہے۔ سعید غنی سندھ اسمبلی میں پیپلزپارٹی کے پارلیمانی لیڈر بھی ہوں گے۔
مخدوم محبوب الزمان کو ریونیو، ہری رام کشوری لال کو ایکسائز، جیل خانہ جات اور اقلیتی امور، ڈاکٹرعذرا پیچوہو کو وزارتِ صحت کا قلمدان دیا جا سکتا ہے جب کہ معدنیات کا محکمہ شبیر علی بجارانی کے حوالے کئے جانے کا امکان ہے۔ بیرسٹرمرتضیٰ وہاب کو محکمہ قانون و اینٹی کرپشن کا جبکہ محمد بخش مہر کو صنعت و تجارت کا مشیر مقرر کیا جاسکتا ہے۔
کابینہ کے منتخب اراکین آج حلف اٹھائیں گے جبکہ 2 مشیروں کا نوٹیفکیشن جاری کیا جائے گا۔ ارکان کی حلف برداری گورنر ہاؤس میں ہوگی جس کے بعد وزیراعلی مراد علی شاہ کابینہ کے ہمراہ مزار قائد پر حاضری دینگے۔