ایمز ٹی وی (تجارت) نیکسٹ جنریشن موبائل سروس کے لیے اسپیکٹرم کی نیلامی 13جون کو منعقد ہوگی۔ پاکستان ٹیلی کمیونی کیشن اتھارٹی نے نیلامی کا شیڈول جاری کردیا ہے جس کے مطابق اسپیکٹرم کی نیلامی کے لیے مشاورت کا عمل 17مئی تک مکمل کرلیا جائے گا۔
قواعدوضوابط میں کسی ترمیم کی ضرورت پڑنے پر یہ ترمیم 22مئی تک کرلی جائے گی، نیلامی میں حصہ لینے والی پارٹیوں کو معلومات کی فراہمی اور نیلامی کے عمل سے متعلق ان کے سوالات، وضاحت اور تشریح کے لیے خصوصی سیشن 24مئی کو منعقد ہو گا، خواہشمند پارٹیاں نیلامی میں حصہ لینے کی درخواست اور قبل از نیلامی ڈپازٹ یکم جون کی شام 4بجے تک جمع کراسکیں گے، پاکستان ٹیلی کمیونی کیشن اتھارٹی درخواستوں کا جائزہ لے کر اہل قرار پانے والی پارٹیوں کے ناموں کا اعلان 6جون کو کرے گی۔
نیلامی کے عمل سے متعلق حساس اور خفیہ معلومات 9جون کو نیلامی میں حصہ لینے والی اہل پارٹیوں کو فراہم کی جائیں گی جن کے مدد سے وہ نیلامی کے عمل میں حصہ لے سکیں گے، ضرورت پڑنے پر آزمائشی نیلامی 11جون کو کی جائے گی جس کے بعد 13جون کو حتمی نیلامی کا عمل مکمل کیا جائے گا اور اسی روز کامیاب ہونے والی پارٹی کے نام کا اعلان کیا جائے گا۔