ایمزٹی وی(تعلیم) جامعہ اردو، شعبہ ارضیات کے تحت’’تربیتی طبقاتیات‘‘ کے موضوع پر ہونے والی چار روزہ ورکشاپ کے افتتاحی پروگرام کا انعقاد کیاگیا۔ افتتاحی تقریب سے خطاب کرتے ہوئے جامعہ اردو کے شیخ الجامعہ پروفیسر ڈاکٹر سلیمان ڈی محمد نے کہا ہے کہ کسی بھی ادارے یا ملک کی ترقی کا راز اس کی تحقیق سے منسلک ہوتا ہے۔ تحقیقی عمل کو بہتر بنائے بغیر دنیا کے ترقی یافتہ ممالک میں اپنا شمار نہیں کراسکتے۔ اس موقع پر ان کا مزید کہنا تھا کہ دنیا بھر میں ماحول کی تبدیلی سے کئی منفی اثرات مرتب ہورہے ہیں، جیسے گرمی کی شدت میں اضافہ، زلزلے آنا ، بارش کم یا زیادہ ہونا وغیرہ شامل ہیں۔ اس سلسلے میں ارضیات سے تعلق رکھنے والے ماہرین زمینی حقائق اور اس میں ہونے والی تبدیلیوں کی وجوہات کی کھوج میں لگے ہوئے ہیں ۔قرآن پاک میں پوری کائنات میں ہونے والی تبدیلیوں اور انکی وجوہات کے بارے میں تحریر ہے۔ اس موقع پر صدر شعبہ ارضیات پروفیسر سہیل انجم ، او جی ڈی سی ایل اسلام آباد کے ڈائریکٹر طارق محمود اور کامسیٹس کراچی کے ڈاکٹر اے آر تبریز نے بھی خطاب کیا۔