ایمزٹی وی(اسلام آباد) پاكستان تحریك انصاف نے سپریم كورٹ سے پاناما لیكس كا فیصلہ ہونے تك قومی اسمبلی کے اجلاس میں شركت نہ كرنے كا فیصلہ كیا ہے

ذرائع كے مطابق چیرمین عمران خان كی صدارت میں بنی گالا میں پارٹی كے كور گروپ كا اجلاس ہوا جس میں سیكرٹری جنرل جہانگیر ترین، سیكرٹری اطلاعات نعیم الحق، ڈاكٹر شیریں مزاری، شفقت محمود سمیت دیگر نے شركت كی۔
ذرائع كے مطابق اجلاس میں پارٹی رہنماؤں نے قومی اسمبلی اور سینیٹ اجلاس میں تحریك انصاف كی اراكین كے شركت حوالے سے مختلف آراء كا جائزہ لیا جب کہ اجلاس میں فیصلہ کیا گیا کہ تحریك انصاف كے اراكین سینیٹ ایوان بالا كی اجلاسوں میں بھر پور انداز میں شریك ہوں گے تاہم جب تك سپریم كورٹ سے پاناما لیكس كیس كا فیصلہ نہیں ہوتا تحریك انصاف قومی اسمبلی اجلاسوں میں شركت نہیں كریں گے۔ 

ذرائع نے مزید بتایا كہ اگر ہم قومی اسمبلی كی طرح سینیٹ اجلاس كا بھی بائیكاٹ كرتے ہیں تو پھر ہمیں صوبائی اسمبلیوں كے اجلاسوں كا بھی بائیكاٹ كرنا ہوگا جب كہ خیبرپختونخوا میں تحریك انصاف كی اپنی حكومت ہے۔

ذرائع نے بتایا كہ پارٹی چیئرمین عمران خان نے پاناما لیكس كیس كی سماعت كے دوران تیاری كے ساتھ كیس كا حصہ بننے كے لیے پارٹی كے قانونی ماہرین كا اجلاس اتوار كو بنی گالا میں طلب كیا ہے، اجلاس میں پاناما لیكس كیس كے حوالے سے حكمت عملی طے كی جائے گی۔ ذرائع کا کہنا ہےکہ گزشتہ روز معروف قانون دان سینیٹر بابر اعوان نے بھی تحریك انصاف كے چیئرمین عمران خان سے بنی گالا میں ملاقات كی، اس موقع پر تحریك انصاف كے رہنماء عثمان ڈار بھی موجود تھے، ملاقات میں 8 نومبر كو وفاقی وزیر دفاع خواجہ آصف كے خلاف عثمان ڈار كی جانب سے سپریم كورٹ میں كیس كی پیشی كے حوالے سے تبادلہ خیال كیا گیا۔

معروف قانون دان بابر اعوان نے اس موقع پر پاناما لیكس اور سیكیورٹی لیكس پر عمران خان كو قانونی اور آئینی نقاط كے حوالے سے بریفنگ دی۔ عمران خان نے كہا كہ پاناما لیكس كے معاملے پر شریف خاندان كے بیانات ریكارڈ پر ہیں، ہمارا عدالتوں پر نہ صرف اعتماد ہے بلكہ دل سے عدالتوں كو مانتے ہیں، پاناما لیكس پر ہمیں سپریم كورٹ سے انصاف كی امید ہے۔

ایمزٹی وی(حب)بلوچستان کے علاقے گڈانی شپ یارڈ میں بحری جہاز سے مزید ایک لاش ملنے کے بعد سانحے میں ہونے والی ہلاکتوں کی کل تعداد 21 ہو گئی ہے۔ ادھر جہاز میں لگی آگ چوتھے روز بالآخر خود ہی بجھ گئی۔

جہاز میں کولنگ کا عمل مکمل کرنے کے بعد سرچنگ کی جائے گی۔ تحقیقات کے لئے وزیر اعظم پاکستان کی تشکیل کردہ ٹیم نیوی ہیلی کاپٹر کے ذریعے گڈانی پہنچی اور یارڈ کا دورہ کیا۔

دفاعی پیداوار کے وفاقی وزیر رانا تنویر کا کہنا تھا کہ جہاز میں تیل موجود تھا تو بریکنگ کا عمل کیسے شروع ہوا۔ ادھر بلوچستان پولیس نے دعویٰ کیا ہے کہ مقدمے میں نامزد تمام ملزمان کو جلد گرفتار کر لیا جائے گا۔ اب تک تین ملزمان حراست میں لئے جا چکے ہیں۔

ایمزٹی وی(گلگت بلتستان) انسپکٹر جنرل پولیس گلگت بلتستان ظفر اقبال اعوان کی سر براہی میں سیکورٹی کے حوالے سے ایک اہم میٹنگ منعقد ہوئی۔ اجلاس میں آئی جی ظفراقبال اعوان نے کہا کہ چہلم کے ماتمی جلوس کے حفاظتی انتظامات بالکل اس طرح ترتیب دیں جس طرح یوم عاشورہ کو ترتیب دئیے گئے تھے۔

فورتھ شیڈول والوں کی نگرانی مزید سخت کی جائے۔اہم مقامات کی حفاظت کےلئے سیکورٹی آڈٹ کی روشنی میں پلان ترتیب دین تمام اضلاع میں موجود افغانیوں کے مکمل انخلاءتک کاروائی جاری رکھی جائے۔ عارضی رہائشی ایکٹ 2016پر عملدار آمد کو یقینی بنایا جائے۔

نیشنل ایکشن پلان کے تحت کاروائی مزید بہتر بنائی جائے اور روزانہ کی بنیاد پر متعلقہ اداروں کو اطلاع کیا جائے۔سی پیک روٹ پر ملحقہ اہم مقامات پل، عطاءآباد ٹنل، سست ڈرائی پورٹ اور چائنیز کی حفاظت کےلئے تما م وسائل بروئے کار لائی جائیں۔شاہراہ قراقرم پر چیکنگ کے نظام میں مزید بہتری لائی جائے اور مسافروں کو بے جا تنگ نہ کیا جائے۔

غیر قانونی اسلحہ اور منشیات کے خلاف جاری مہم میں مزید تیزی لائی جائے۔،زیر تفتیش مقدمات کو جلد ازجلد نمٹاکر چالان عدالتوں میں پیش کئے جائیں۔ اشتہاری ملزمان اور دیگر مطلوب ملزمان کی گرفتاری کےلئے کاروائیوں کو تیز کیاجائے۔یکم دسمبر سے PTCمیں اپر اور انٹر کے کورسز کا اجراءکیا جائے۔ فورس کے کسی آفیسر اور جوان کی ترقی کے دوران لیت و لعل برداشت نہیں کیاجائے گا۔

تمام اضلاع میں کوئیک رسپانس فورس کو ایکٹیو کیا جائے۔ اجلاس مین تمام اضلاع کے ایس ایس پیز نے اپنے اپنے ضلع کے مختلف امور کے حوالے سے آئی جی پی کو بریفنگ دی،اجلا س تمام ڈی آئی جیز ، سی پی او کے اے آئی جیز ، سپیشل برانچ ، سی ٹی ڈی اور پی ٹی سی کے زمہ دارن سمیت تمام اضلاع کے ایس ایس پیز نے شرکت کی۔

ایمزٹی وی(اسلام آباد)جسٹس ثاقب نثار کی سربراہی میں سپریم کورٹ کے 3 رکنی بینچ نے وزیراعظم کے کابینہ کو بائی پاس کرنے سے روکنے کے حکم کیخلاف حکومتی اپیل کی سماعت کی۔ سماعت کے دوران جسٹس ثاقب نثار نے استفسار کیا کہ کیا وزیراعظم کابینہ کی منظوری کے بغیر جو چاہے کر سکتا ہے جس پر حکومتی وکیل نے جواب دیا کہ حکومتی امور کے لئے مضبوط وزیراعظم کی ضرورت ہوتی ہے۔

فریقین کےدلائل سننے کے بعد عدالت عظمیٰ نے نظر ثانی اپیل خارج کردی، عدالت نے قرار دیا کہ آئین میں وزیراعظم کی نہ سولو فلائٹ کی گنجائش ہے اور نہ ہی کہیں لکھا ہے کہ وزیراعظم یا وزیر تنہا وفاقی حکومت ہیں لہذا رولز کبھی بھی آئین سے بالاتر نہیں ہو سکتے۔

دوران سماعت جسٹس ثاقب نثار نے ریمارکس دیئے کہ کیا وزیراعظم کابینہ کی منظوری کے بغیر جو چاہے کرسکتا ہے، آئین میں وفاقی حکومت کی تعریف بیان نہیں کی گئی لہذا وفاقی حکومت کابینہ کے مجموعے کو کہاجائے گااور ہر وفاقی وزیر وفاقی حکومت کہلائے گا۔
واضح رہے کہ رواں سال اگست میں سپریم کورٹ نے وزیراعظم کا کابینہ کو بائی پاس کرنے کا اختیار کالعدم قرار دیتے ہوئے کہا تھا کہ وزیراعظم کابینہ کے فیصلے کے پابند ہیں اور وزیراعظم کابینہ کےفیصلے کو بائی پاس نہیں کر سکتے۔

ایمزٹی وی(پشاور)  پشاور کی خصوصی عدالت نے جعلی شناختی کارڈ بنوانے کے جرم میں گرفتار افغان خاتون شربت گلہ کو ملک بدر کرنے کے احکامات جاری کر دیے ۔ عدالت نے شربت گلہ کو پندہ روز قید اور1لاکھ 10ہزار روپے جرمانے کی سزا بھی سنائی ہے ۔

ذرائع کا کہنا ہے کہ آج شربت گلہ کو خصوصی عدالت میں پیش کیا گیا جہاں شربت گلہ نے جعلی شناختی کارڈ بنوانے کا اعتراف بھی کیا جس کے بعد عدالت نے ملزمہ کو سزا کے ساتھ ساتھ ملک بدر کرنے کا حکم دیدیا ۔

افغان سفیر عمر زخیوال کا کہنا ہے کہ شربت گلہ قانونی جنگ سے آزاد ہو گئی ہے اور امید ہے کہ وہ پیر کو افغانستان پہنچ جائے گی ۔ افغان سفیر کا مزید کہنا ہے کہ شربت گلہ کی افغان صدر سے ملاقات بھی متوقع ہے ۔

یاد رہے افغان خاتون شربت گلہ کو چند روز قبل ایف آئی اے نے پشاور کے علاقے سے گرفتار کیا تھا ، ان پر غیر قانونی طور پر پاکستانی شناختی کارڈ بنوانے کا الزام تھا

ایمزٹی وی(تعلیم)جامعہ کراچی کے رئیس کلیہ سماجی علوم پروفیسرڈاکٹرمونس احمر کے مطابق کلیہ سماجی علوم جامعہ کراچی اورہائرایجوکیشن کمیشن کے زیراہتمام دوروزہ بین الاقوامی کانفرنس بعنوان سماجی اورانسانی ترقی کو درپیش چیلنجز ‘‘26 نومبر سے شروع ہوگی۔

کانفرنس میں قومی اوربین الاقوامی ماہرین اوراسکالرز شرکت کریں گے ۔افتتاحی تقریب کے بعد سماجی اورانسانی ترقی کے مختلف موضوعات پر 19 پلینری اور 30 پیرالل سیشن منعقد ہوں گے جبکہ اختتامی سیشن سے قبل پینل ڈسکشن منعقد کیاجائے گا۔جس میں قومی اوربین الاقوامی مقررین اظہارخیال کریں گے ۔

ایمزٹی وی(اسلام آباد)سینیٹ میں قانون انصاف اور مذہبی امور کمیٹی کا مشترکہ اجلاس سینیٹر جاوید عباسی اور سینیٹر حمد اللہ کی زیر صدارت ہوا جس میں سینیٹر تنویر احمد خان نے فیملی قوانین ترمیمی بل 2016پیش کیا ۔بل میں مطالبہ کیا گیا کہ ملک میں ایڈز اور تھیلیسیمیا کی روک تھام کے لیے بلڈ اسکریننگ لازمی قرار دی جائے۔

انہوں نے کہا کہ سعودی عرب ،ایران اور دیگر عرب ممالک میں یہ قانون موجود ہے ،شادی سے قبل خون کی اسکریننگ سے بیماریوں پر قابو پایا جا سکتا ہے ۔تنویر احمد خان نے کہا کہ نکاح سے قبل خون کی اسکریننگ غیر شرعی نہیں ہے ،سالانہ 6سے 7ہزار بچے تھیلیسیمیا کا شکار ہو رہے ہیں ۔

ان کا کہنا تھا کہ میرے بل کا مقصد اس بیماری کی روک تھام کے لیے تحقیقات کرانا ہے ۔اس موقع پر سینیٹر حافظ حمد اللہ نے کہا کہ لوگوں کے لیے سہولت دی جائے ،مشکلات دور کی جائیں ،دیہی علاقوں کے لوگوں کی سوچ کو بھی مد نظر رکھا جائے ۔ان کا کہنا تھا کہ شادی سے پہلے بیٹی کے طبی معائنے پر بعض علاقوں میں اعتراضات ہوں گے ۔

ایمزٹی وی(اسلام آباد)متحدہ قومی مومنٹ پاکستان نے قومی اسمبلی میں وزیر اعلیٰ خیبرپختونخوا پرویز خٹک کے خلاف آرٹیکل 6 کےتحت کارروائی کی قرارداد جمع کرائی ہے۔
ذرائع کے مطابق ایم کیوایم پاکستان کے سربراہ فاروق ستار، علی رضاعابدی، سلمان بلوچ اورخالد مقبول صدیقی سمیت دیگرکی جانب سے وزیراعلیٰ خیبر پختونخوا پرویزخٹک کے خلاف قومی اسمبلی سیکریٹریٹ میں قرارداد جمع کرائی گئی ہے۔

قرارداد میں کہا گیا ہے کہ وزیراعلیٰ خیبرپختونخوا پرویزخٹک نےغیرذمہ دارانہ بیانات دیے، ان بیانات سے صوبائیت اوربین الاصوبائی نفرتیں بڑھانے کی کوشش کی گئی، انہوں نے ملکی سالمیت اورسیکیورٹی کے خلاف قابل مذمت دھمکیاں دیں، اس لئے ایوان مطالبہ کرتا ہے کہ پرویزخٹک کو وزارت اعلیٰ اور صوبائی اسمبلی کی رکنیت سے نا اہل کیا جائے اوران کے خلاف آرٹیکل 6 کے تحت کارروائی کی جائے۔

واضح رہے کہ ایم کیو ایم کی جانب سے پرویزخٹک کے خلاف سندھ اسمبلی میں بھی قرارداد جمع کرائی گئی ہے۔

ایمزٹی وی(پشاور) راولپنڈی جانے والی جعفر ایکسپریس بال بال بچ گئی میڈیا رپورٹس کے مطابق آب گم کے قریب ریلوے ٹریک پر زور دار دھماکا سنا گیا ہے جس کے بعد امدادی ٹیمیں روانہ کر دی گئی ہیں ۔

دھماکا اس وقت کیا گیا جب راولپنڈی جانے والی جعفر ایکسپریس ٹریک سے گزر رہی تھی جس کے چند منٹ بعد ہی دھماکا ہواجس سے ریلوے ٹریک کو جزوی نقصان پہنچا ہے ۔
ذرائع کا کہنا ہے کہ دھماکے کا مقصد جعفر ایکسپریس کو نشانہ بنانا تھا ، ٹریک کو ریموٹ کنٹرول دھماکے سے اڑانے کی کوشش کی گئی ہے تاہم واقعے میں کسی قسم کا جانی نقصان نہیں ہوا ۔
دھماکے کے بعد امدادی ٹیموں کو روانہ کر دیا گیا ہے جبکہ قانون نافذ کرنے والے اداروں کے اہلکار بھی موقع پر پہنچ چکے ہیں ۔ ٹریک پر ٹرینوں کی آمدورفت روک دی گئی ہے اور ٹریک کی مرمت کا کام جاری ہے ۔دوسری جانب قانون نافذکرنے والے اداروں نے ملزمان کی تلاش کیلئے علاقے کا سرچ آپریشن شروع کر دیا ہے ۔

ایمز ٹی وی (مانیڑنگ ڈیسک) آسمان پر پرندوں کو اڑتے ہوئے دیکھنا ایک نہایت خوش کن نظارہ ہوتا ہے۔ رنگ برنگے پرندے اور ان کی چہچہاٹ ہماری فضا کا ایک حصہ ہیں اور ان کے بغیر ہمارے آسمان بہت ویران ہوجاتے ہیں۔

کیا آپ جانتے ہیں دنیا میں ایک پرندہ ایسا بھی ہے جو زمین پر اترے بغیر مسلسل 10 ماہ تک اڑ سکتا ہے؟

ماہرین کا کہنا ہے کہ گہرے رنگ کے پرندوں والا کامن سوئفٹ نامی یہ چھوٹا سا پرندہ سب سے زیادہ دیر فضا میں رہ سکنے والا پرندہ ہے۔ تحقیق کے مطابق یہ پرندے اپنی زندگی کا بیشتر حصہ فضا میں گزارتے ہیں یہ تحقیق سوئیڈن میں کی گئی جہاں سوئیڈش سائنسدانوں نے اس نسل کے 13 پرندوں کی پشت پر ٹیکنالوجی سے مزین ایک چھوٹا سا بیگ پیک نصب کیا۔ صرف ایک گرام وزن کا حامل یہ بیگ پیک اس بات کی نشاندہی کرتا ہے کہ پرندہ فضا میں موجود ہے یا زمین پر ہے۔

اس بیگ پیک سے حاصل ہونے والے ڈیٹا کی جانچ کے بعد سائنسدانوں کا کہنا ہے کہ کامن سوئفٹ اپنے انڈے دینے کے موسم کے بعد ہجرت کر جاتے ہیں اور مستقل فضا میں رہتے ہیں، یہاں تک ان کا تولیدی موسم لوٹ آتا ہے اور اس وقت یہ ایک طویل عرصہ بعد زمین پر اترتے ہیں۔

ماہرین کے مطابق یہ تقریباً 10 ماہ کا عرصہ ہوتا ہے جو یہ مستقل فضا میں اڑتے ہوئے گزارتے ہیں۔ ان کے مطابق کچھ پرندے رات کے وقت زمیں پر اتر جاتے ہیں لیکن بیشتر تمام عرصہ فضا میں ہی رہتے ہیںلیکن زمین پر اترنے والے پرندوں کے ان 10 ماہ کا 99 فیصد سے زائد وقت فضا میں ہی گزرا۔ یہ اپنی خوراک بھی اسی طرح دوران پرواز حاصل کرتے ہیں۔

ماہرین کا کہنا ہے کہ وہ اس بات کا تعین تو نہیں کرسکے کہ یہ پرندے سونے کے لیے کیا طریقہ کار اختیار کرتے ہیں، تاہم ان کا اندازہ ہے کہ سورج نکلنے سے کچھ دیر قبل اور بعد میں یہ اپنی پرواز دھیمی رکھتے ہوئے ذرا سی جھپکی لے لیتے ہوں گے۔

ماہرین کے مطابق یہ اب تک معلوم پرندوں میں سے فضا میں سب سے زیادہ وقت گزارنے والا پرندہ ہے