Reporter SS
ایمزٹی وی(کراچی)وزیراعلیٰ سندھ سید مراد علی شاہ کی زیرصدارت امن وامان سے متعلق اجلاس ہوا جس میں ڈی جی رینجرز میجرجنرل بلال اکبر، ایڈیشنل آئی جی مشتاق مہر اور سیکریٹری داخلہ سمیت دیگر اعلیٰ افسران نے شرکت کی۔ اجلاس میں قانونی و غیر قانونی تارکین وطن کی رجسٹریشن کا فیصلہ کیا گیا جس کے لیے پولیس اور رینجرز سے بھی مدد لی جائے گی۔
وزیراعلیٰ سندھ سید مراد علی شاہ نے قانون نافذ کرنے والے اداروں کو شہر میں جاری آپریشن کو بلا امتیاز جاری رکھنے کی ہدایت دیتے ہوئے کہا کہ دہشت گردی میں ملوث تنظیموں کے خلاف بھی سخت کارروائی کی جائے جب کہ وزیراعلیٰ نے صوبے کے 93 مدارس کو بھی واچ لسٹ میں ڈالنے کا حکم دیا۔
وزیراعلیٰ سندھ نے کہا کہ کچی آبادیوں کے مکینوں کا ڈیٹا بیس تیار کیا جائے۔ اجلاس میں سرکاری زمینوں پر قائم سیاسی جماعتوں کے دفاتر کو گرانے کی رپورٹ بھی پیش کی گئی، اجلاس میں فیصلہ کیا گیا کہ صوبے میں امن وامان کا جائزہ لینے کے لیے ایپکس کمیٹی کا اجلاس جلد طلب کیا جائے گا۔
ایمز ٹی وی ( صحت)موسم کی تبدیلی پر شہری ناک اور گلے کے امراض میں مبتلا ہوسکتے ہیں۔
اس لئے ماہرین امراض ناک ،کان وگلہ نے شہریوں کو ہدایت کی ہے احتیاطی تدابیر اختیار کرتے ہوئے تلی ہوئی، زیادہ کھٹی ،چکنی و ٹھنڈی چیزوں سے پرہیز کریں ،دھول مٹی اور دھوئیں سے دور رہیں اور اے سی بند رکھتے ہوئے سلو پنکھا چلائیں ۔
بصورت دیگر یہ امراض سنگین نوعیت اختیار کر سکتے ہیں ۔جناح اسپتال کے ای این ٹی سرجن ڈاکٹر جاوید جمالی نے بتایا کہ موسم کی تبدیلی کے ساتھ ہی جناح اسپتال میں بڑی تعدادمیں گلے اور نا ک کے امراض میں مبتلا لو گ آرہے ہیں جب بھی موسم خشک یا تبدیل ہوتا ہے اسی طرح مریض آتےہیں ۔
انہوں نے کہا کہ شہری ہر طرح کا ٹھنڈا اور کھٹا کھانا کھالیتے ہیں ۔ تیز پنکھا اور اے سی چلاتے ہیں اوراحتیاط نہیں کرتے ۔ انہوں نے بتایا کہ پنکھے کی براہ راست ہوا نا ک پر لگنے سے نزلہ ہوتا ہے اور اگر کسی کو ناک کی الرجی ہے تو دھول مٹی ناک سے سینے میں جانے پر دمہ کا مرض بھی لاحق ہو سکتا ہے ۔
انہوں نے کہا کہ موٹر سائیکل چلانے والے بالخصوص وہ افراد جنہیں الرجی ہے وہ ہیلمٹ کے ساتھ ماسک کا بھی استعمال کریں۔ سول اسپتال کےشعبہ ناک ، کان وگلہ کے اسسٹنٹ پروفیسر ڈاکٹر عاطف حفیظ صدیقی نے بتایا کہ کراچی سمند ر کے قریب ہے اور یہاں دھول مٹی بہت زیادہ ہوتی ہے جس پر لوگ احتیاط نہیں کرتے اور ناک کی الرجی سے متاثر ہو جاتے ہیں۔
عباسی شہید اسپتال کے شعبہ امراض ناک ، کان وگلہ کے سربراہ پروفیسر خالد اشرفی نے بتایا کہ ہر سال کی طرح اس سال بھی موسم کی تبدیلی کے بعد عباسی شہید اسپتال میں ناک اور گلے کے امراض کےدرجنوں مریض آرہے ہیں۔
ایمز ٹی وی ( صحت) انسداد پولیو کےحوالے سے گھارو شہر میں محکمہ صحت کی جانب سے ایک ریلی کا اہتمام کیا گیا ۔
اسسٹنٹ کمشنر میرپورساکرو ایٹ گھارو کے آفس سے نکالی جانے والی ریلی کی قیادت گھارو ٹاون کمیٹی کے چیرمین عثمان کھنبار اور گھارو ہیلتھ سینٹر کے ایم ایس ڈاکٹر سرور شیخ کر رہے تھے۔
ریلی میں مقامی کونسلروں طلبا اور شہریوں کی بڑی تعداد نے شرکت کی جبکہ ریلی کے شرکا نے ہاتھوں میں پلے کارڈ اور بینر اٹھا رکھے تھے ۔
جن پر قطرے پلاو پولیو بھگاو اور دیگر نعرے درج تھے ریلی سے خطاب کرتے ہوئے ڈاکٹر سرور شیخ ڈاکٹر سلطان شیخ ڈاکٹر غلام مرتضی شاہ اسماعیل جتوئی اور دیگر نے خطاب کرتے ہوئے کہا کہ پولیو ایسا مرض ہے جس سے پہلے ہی احتیاطی تدابیر کر کے بچا جا سکتا ہے اور اس ریلی کا مقصد عوام میں پولیو کے حوالے سے شعور بیدار کر نا ہے۔
ایمز ٹی وی ( صحت) کیا آپ کو تنہا گھومنے پھرنے کا شوق ہے؟ اگر ہاں تو پھر آپ اپنے دیگر ساتھیوں کے مقابلے میں زیادہ ذہین ہوسکتے ہیں۔
یہ دعویٰ برطانیہ میں ہونے والی ایک تحقیق میں سامنے آیاہے۔
برٹش سائیکولوجیکل سوسائٹی کی تحقیق کے مطابق ذہین افراد دوستوں کے ساتھ گھلنے ملنے اور گھومنے پھرنے کے دوران زندگی سے زیادہ مطمئن نہیں ہوتے۔
18 سے 28 سال کے پندرہ ہزار سے زائد افراد پر ہونے والے سروے کا ڈیٹا استعمال کرکے محققین نے بتایا کہ شہروں میں رہنے والے افراد دیہی علاقوں کے باسیوں کے مقابلے میں زیادہ خوش باش نہیں ہوتے۔
ان کا کہنا تھا کہ دیہی علاقوں میں لوگ اپنے دوستوں سے اکثر ملنے پر زندگی سے زیادہ مطمئن اور خوش رہتے ہیں۔
تحقیق کے مطابق چھوٹے قصبوں میں رہنے والوں کے لیے دوستوں کے ساتھ گھلنا ملنا خوشی کی کنجی ہوتا ہے مگر بہت زیادہ ذہین افراد کا معاملہ اس سے بالکل الٹ ہے۔
تحقیق کے مطابق ذہین افراد اکثر اچھے کام کرنے کی کوشش کرتے ہیں، چاہے وہ کینسر کا علاج ہو یا فن کا کوئی اعلیٰ نمونہ، اس کے لیے انہیں وقت درکار ہوتا ہے اور یہی وجہ ہے کہ وہ تنہائی کو بہت زیادہ اہمیت دیتے ہیں۔
یا یوں کہہ لیں کہ وہ ان جذبات و احساسات سے دور رہتے ہیں جو خوشی کے لیے ضروری ہیں۔
تحقیق میں اس سوال کا جواب نہیں دیا جاسکا کہ جو لوگ شہروں میں رہنے پر ناخوش ہیں، اس کی وجہ شہری طرز زندگی ہے یا نہیں۔
اسی طرح یہ بھی نہیں بتایا گیا کہ آیا الگ تھلگ رہنے کی وجہ سے لوگ ذہین ہوتے ہیں یا ان کا زیادہ ذہین ہونا انہیں لوگوں سے گھلنے ملنے سے روکتا ہے۔
ایمز ٹی وی (صحت) طبی ماہرین نے کہاہے کہ موٹاپادنیا میں تیزی سے بڑھنے والی آبادیوں میں سے ایک ہے اورموٹاپا کوامریکن میڈیکل ایسو سی ایشن نے بیماری قراردیدیاہے۔
موٹاپے کی شرح میں پاکستان 188ممالک کی فہرست میں نویں نمبرپر ہے، موٹاپے کو کنٹرول نہ کیا جائے تویہ امراض قلب، بلند فشار خون(ہائی بلڈ پریشر)، امراض نسواں، جوڑوں کے درد، نظام ہضم میں خرابی، سانس لینے میں دشواری اور جگر اور آنتوں کے امراض کا باعث بنتا ہے ۔
متوازن غذا اور روازنہ کی ورزش سے موٹاپے کو کنٹرول کیا جاسکتا ہے ۔ ان خیالات کا اظہار ڈاکٹراعجازوہرا، ڈاکٹر سیف الحق اور صائمہ رشید نے موٹاپا کے عالمی دن کی مناسبت سے کراچی پریس کلب میں پریس کانفرنس کرتے ہوئے کیا۔
ایمزٹی وی(تعلیم) ثانوی و اعلیٰ ثانوی تعلیمی بورڈ سکھر نے امتحانات کی تاریخ کا اعلان کردیا ۔ثانوی و اعلیٰ ثانوی تعلیمی بورڈ سکھر کے ناظم امتحانات کی جانب سے جاری کردہ ایک اعلامیے کے مطابق اوریئنٹل لینگویجز اینیوئل/کمپارٹمنٹل امتحانات2016پیر 21نومبر سے شروع ہو نگے
اعلامیے کے مطابق سکھر ، گھوٹکی اور خیرپور کے امیدواروں سے گورنمنٹ ہائی اسکول سکھر جبکہ نوشہرو فیروز کے امیدواروں سے گورنمنٹ مدرسہ ہائی اسکول نوشہرو فیروز میں امتحانات لیے جائیں گے۔
ایمزٹی وی(لاہور) چیف جسٹس لاہور ہائی کورٹ جسٹس منصور علی شاہ نے اسلام آباد بند کرنے کے اعلان کرنے کے خلاف درخواست کی سماعت کے لئے 3 رکنی فل بنچ تشکیل دے دیا ہے۔
ذرائع کے مطابق عمران خان کی جانب سے اسلام آباد بند کرنے کے اعلان کے خلاف لاہور ہوئی کورٹ میں درخواست دائر کی گئی تھی جس میں موقف اختیار کیا گیا تھا کہ اسلام آباد کو بند کرنے کا اعلان کرکے عمران نے عام شہریوں کو بغاوت پر اکسایا۔ ملک پہلے ہی امن و امان کے مسائل سے دوچار ہے جبکہ وفاقی دارالحکومت بند کرنے کی دھمکی سے اسٹاک ایکسچینج اور ملکی معیشت پر برے اثرات مرتب ہو رہے ہیں۔
چیف جسٹس لاہور ہائی کورٹ جسٹس منصور علی شاہ نے جسٹس شاہد حمید ڈار کی سربراہی میں 3 رکنی بنچ تشکیل دیا ہے جس میں جسٹس انوارالحق اور جسٹس قاسم خان بھی شامل ہیں، بنچ 26 اکتوبر کو درخواست کی سماعت کرے گا۔
واضح رہے کہ عمران خان نے 2 نومبر کو اسلام آباد بند کرنے کا اعلان کیا ہے۔ ان کا مطالبہ ہے کہ وزیر اعظم پاناما لیکس کی تحقیقات کے لیے اپوزیشن کے ٹی او آر کو من و عن تسلیم کرلے
ایمزٹی وی(کراچی)پاکستان تحریک انصاف وفاقی حکومت کے خلاف 2نومبر کو دھرنے کے مقام پرعارضی بستی یاٹینٹ ہاوس قائم کرے گی، اس بستی میں کھانے پینے کی اشیا اور ہنگامی طبی سہولتوں سمیت ضروریات زندگی کاسامان رکھاجائے گا۔
دھرنے میں آئے ہوئے شرکاکی رہائش کے لیے اس بستی میں موسم سرما سے بچاؤ کے لیے بھی خاص انتظامات کیے جائیں گے تاکہ لوگ موسم کی تبدیلی کے سبب بیمار ہونے سے بچ سکیں۔
پی ٹی آئی کے ذرائع کے مطابق پارٹی قیادت نے دھرنے کے شرکا سے بھی درخواست کی ہے کہ وہ اپنی ضروریات کا سامان بھی احتیاطاً اپنے ہمراہ لے کر آئیں۔
ایمزٹی وی(آزاد کشمیر) گزشتہ روز مسلم کانفرنس مظفرآباد ڈویژن کے عہدیدار وں اور مسلم کانفرنس کے دفتر گڑھی پن چوک میں استقبالیہ کیمپ کے افتتاح کے موقع پرکارکنوں سے خطاب کرتے ہوئے مسلم کانفرنس کے صدر سردار عتیق احمد خان نے کہا ہے کہ مقبوضہ کشمیر کے عوام کو نریندر مودی کے رحم وکرم پر نہیں چھوڑیں گے ۔آزاد کشمیر کے عوام 24نومبر کو کنٹرول لائن توڑ کر مقبوضہ علاقے میں داخل ہونگے۔
انہوں نے کہا کہ کارکن سیز فائر لائن توڑنے کے لیے گھر گھر مہم چلائیں۔عوام کو ذہنی اور عملی طور پر اس مہم میں شریک ہونے کے لیے تیار کیا جائے تاکہ دنیاپر واضح ہو سکے کہ کشمیر کے عوام ایک ہیں اور کشمیر کی وحدت کا تصور آج بھی بحال ہے ۔ بیرون ملک مثبت پیغام جائے گا۔
ایمزٹی وی(کوئٹہ)وزیراعظم نواز شریف کی زیر صدارت اعلیٰ سطح کا اجلاس ہوا جس میں آرمی چیف جنرل راحیل شریف ،ڈی جی آئی ایس آئی لیفٹیننٹ جنرل رضوان اختر ،کمانڈر سدرن کمانڈ لیفٹیننٹ جنرل عامر ریاض ،ڈی جی ایم آئی میجر جنرل ذکی ،ڈی جی ایم او ،آئی جی ایف سی ،وزیر داخلہ چوہدری نثار ،مشیر قومی سلامتی نا صر جنجوعہ اور وزیر اعلیٰ بلوچستان نواب ثنا اللہ زہری نے شرکت کی ۔اجلاس میں سانحہ کوئٹہ ، نیشنل ایکشن پلان پر عملد ر آمد کا جائزہ اور بلوچستان کی سیکیورٹی صورتحال کے حوالے سے غورکیا گیا ۔
کوئٹہ میں پولیس ٹریننگ سنٹر ہاسٹل پر حملے کا منصوبہ کہاں بنا یا گیا اور اس منصوبے پر عملدرآمد کیسے کیا گیا ،اس حوالے سے اعلیٰ سطح کے اجلاس میں آئی ایس آئی کے کمانڈر نے بریفنگ دیتے ہوئے ساری کہانی بے نقاب کر دی ۔
۔اس موقع پرآئی ایس آئی کمانڈر بریگیڈئر خالد فرید نے اجلاس کو بتا یا کہ پولیس ٹریننگ کالج ہاسٹل پر حملے کا منصوبہ نئی دہلی میں تیار کیا گیا اور افغانستان میں ”را “کے نیٹ ورک کے سپرد کیا گیا ۔یہ منصوبہ افغانستان میں لشکر جھنگوی کے حوالے کیا گیا جس نے کوئٹہ میں اس پر عمل کیا ۔انہوں نے کہا کہ حالیہ دہشت گرد حملوں کی کڑی افغان این ڈی ایس سے ملتی ہے ۔این ڈی ایس سپین بولدک میں تربیتی کیمپ چلا رہی ہے۔
اس موقع پر آئی جی ایف سی اور آئی ایس آئی کے مقامی کمانڈر نے شرکا کودہشت گردوں کے حملے اور فورسز کی کارروائی سے متعلق آگا ہ کیا ۔انہوں نے ایف سی اور فوج کے لائٹ کمانڈو یونٹ کے مشترکہ آپریشن کلین اپ کے بارے میں بھی آگاہ کیا