ایمزٹی وی(اسلام آباد)حکومت اور اپوزیشن کی طرف سے نام موصول ہونے کے بعد اسپیکر اسمبلی نے نوٹی فکیشن جاری کردیا۔ پارلیمانی کمیٹی کا پہلا اجلاس آج ہورہا ہے ۔ تفصیلات کےمطابق بارہ رکنی پارلیمانی کمیٹی کا پہلا اجلاس بدھ کے روز ہو گا،حکومت اور اپوزیشن کی طرف سے نام موصول ہونے پر اسپیکر قومی اسمبلی سیکرٹریٹ نے باقاعدہ نوٹیفیکیشن جاری کر دیا گیا ہے، پارلیمانی کمیٹی پاناما پیپرز، آف شور کمپنیوں، قرضوں کی معافی اور کک بیکس کی تحقیقات کے لئے ٹی او آرز تیار کرے گی،اس بات کا فیصلہ بھی ہو گا، کہ تحقیقات کا آغاز وزیر اعظم نواز شریف سے ہو یا تمام افراد کے حوالے سے بلاتفریق تحقیقات کی جائیں،حکومت کی طرف سے ٹی اور آرز کی تیاری کے لئے پارلیمانی کمیٹی میں اسحق ڈار، اکرم درانی ،میر حاصل بزنجو، خواجہ آصف ،،خواجہ سعد رفیق اورانوشہ رحمان شامل ہیں، جبکہ اپوزیشن کی طرف سے اعتزازاحسن، شاہ محمودقریشی،صاحبزادہ طارق اللہ،بیرسٹر سیف، طارق بشیر چیمہ اور الیاس بلور کو شامل کیا گیا ہے۔

ایمزٹی وی(تعلیم)بلوچستان کی مختلف یونیورسٹیز کے طلباءو طالبات لاہور کا سفر طے کر کے واپس کوئٹہ پہنچ گئے۔ واپسی پر طلبہ اور طالبات کا کہنا تھا کہ پنجاب نے بڑے بھائی جیسا کردار ادا کیا اتنی محبت دی کہ فخر محسوس ہونے لگا ہے۔ تفصیلات کےمطابق غیر سرکاری تنظیم ڈیووٹ انٹر نیشنل کے زیر اہتمام بلوچستان کی مختلف یونیورسٹیز کے200طلباءو طالبات لاہورکی سیر مکمل کر کے کوئٹہ پہنچ گئے پریس کلب میں نیوز کانفرنس کرتے ہوئے طلباءو طالبات کا کہنا تھا کہ لاہور کا سفر یادگار رہا ہمیں وہاں وہ پروٹوکول دیا گیا جو وزیروں مشیروں کو دیا جاتا ہے۔ اس حوالے سے طلباءو طالبات کا کہنا تھا کہ پاک چین اقتصادی راہداری ملک کے لئے گیم چینجر کا کردار ادا کریگی بلوچستان کی ترقی میں ہی پاکستان کی ترقی پوشیدہ ہے۔ پنجاب کی یونیورسٹیز میں جا کر یقین ہو گیا ہےکہ تعلیم ہی ترقی کی اولین سیڑھی ہے ۔ 12مئی سے 19مئی تک جاری رہنے والے اس پروگرام کے تحت بلوچستان کے طلباءو طالبات نے ایک دن پاک آرمی کے ساتھ گزارہ جس کے بعد بلوچستان اسمبلی کے اجلاس میں شرکت،گورنر بلوچستان سے ملاقات اور سیکرٹریٹ کے دورے کے بعدیہ طلباءو طالبات نے لاہور کی مختلف یونیورسٹیز کا دورہ بھی کیا۔

ایمزٹی وی(اسلام آباد) تحریک انصاف کی جانب سے قومی اسمبلی میں ڈرون حملوں کے خلاف تحریک التوا جمع کرادی گئی ہے جبکہ پنجاب اسمبلی میں ڈرون حملے کے خلاف قرارداد متفقہ طور پر منظور کرلیا گیا۔ ذرائع کے مطابق تحریک انصاف کی جانب سے قومی اسمبلی میں ڈرون حملوں کے خلاف تحریک التوا جمع کرائی گئی ہے۔ تحریک التوا میں مؤقف پیش کیا گیا ہے کہ ڈرون حملے پاکستان کی سالمیت کے تحفظ کے حوالے سے ریاست پر سوالیہ نشان ہے اور یہ انتہائی اہم قومی نوعیت کا معاملہ ہے اسے ایوان میں زیر بحث لایا جائے ۔ ڈرون حملے میں مارے جانے والے مبینہ طور پر افغان طالبان لیڈر کے پاس پاکستانی شناختی کارڈ اور پاسپورٹ پر ایران اور متحدہ عرب امارات کا مستند ویزا اورولی محمد کے پاس پاکستان کا شناختی کارڈ اور پاسپورٹ ہونا سنجیدہ اور تشویشناک سوالات کو جنم دیتا ہے۔ ملکی سالمیت پر حملے کے بعد سفارتی،سیاسی اورعسکری سطح پر بھی رد عمل سامنے نہیں آیا جس سے شبہ ہوتا ہے کہ سیاسی اور عسکری قیادت کے مابین افغان پالیسی پر خلا موجود ہے۔ تحریک التوا میں کہا گیا ہے کہ پاکستان اور امریکہ کی جانب سے بھی واقعے پر متضاد بیانات سامنے آرہے ہیں ،امریکی حکام کی جانب سے جاری کردہ بیان کے مطابق حملے سے پہلے پاکستان اور افغانستان کے اعلیٰ حکام و قیادت کو اعتماد میں لینے کے ساتھ اطلاع بھی دی گئی تھی جبکہ پاکستانی وزیر اعظم کا کہنا ہے کہ مجھے حملے کے بعد اطلاع دی گئی ۔ تحریک التوا میں درخواست کی گئی ہے کہ ایوان میں جاری معمول کی کارروائی معطل کرکے ملکی سالمیت پر حملے کے معاملے کو زیر بحث لایا جائے۔ دوسری جانب پنجاب اسمبلی میں ڈرون حملوں کے خلاف پیش کی جانے والی قرارداد متفقہ طور پر منظور کرلی گئی ہے۔ ڈرون حملے جاری رکھنے خلاف قرارداد اپوزیشن لیڈرمیاں محمود الرشید نے پیش کی ۔ قرار داد میں کہا گیا ہے کہ ڈرون حملوں کے خلاف حکومت جرات مندانہ حکمت عملی کا اعلان کرے ۔

ایمزٹی وی(پشاور) رنگ روڈ پر سیکیورٹی فورسز کی گاڑی پر نامعلوم افراد کی فائرنگ سے 3 اہلکار شہید ہوگئے۔ زرائع کے مطابق پشاور کے رنگ روڈ پر موٹر سائیکل پر سوار نامعلوم افراد سیکیورٹی فورسز کی گاڑی پر فائرنگ کرکے فرار ہوگئے، فائرنگ کے نتیجے میں 3 اہلکار زخمی ہوگئے جنہیں قریبی اسپتال منتقل کردیا گیا تاہم زخمیوں میں سے 2 راستے میں ہی دم توڑگئے جب کہ تیسرا اہلکار دوران علاج شہید ہوگیا۔ واقعے کے بعد پولیس اور سیکیورٹی فورسز کے اہلکار موقع پر پہنچ گئے جنہوں نے جائے وقوعہ سے شواہد اکٹھے کرکے علاقے میں سرچ آپریشن شروع کردیا۔

ایمزٹی وی(پنجاب)لاہور میں جی ٹی روڈپرقائداعظم انٹرچینج کےقریب اورنج لائن منصوبے پر کام کرنے والے مزدوروں پر دیوار گر گئی جس سے سات مزدور جاں بحق جبکہ چار زخمی ہو گئے۔ ریسکیو ذرائع کے مطابق گزشتہ رات ہونے والی بارش اور آندھی کے باعث زیرتعمیر عمارت کی دیوار قائداعظم انٹرچینج کے قریب اورنج لائن منصوبے پر کام کرنے والے مزدوروں کے خیمے پر گر گئی جس سے سات مزدور ملبے تلے دب کر جاں بحق جبکہ چار زخمی ہو گئے۔ ریسکیو اہلکاروں نے موقع پر پہنچ کر کرین کی مدد سے لاشوں کو نکالا۔ تمام لاشوں کو ڈیڈ ہاوس اور زخمیوں کو میو اسپتال منتقل کر دیا گیا ہے

ایمزٹی وی(اسلام آباد)چیف جسٹس انور ظہیر جمالی کی سربراہی میں 3 رکنی بینچ نے ملک کے نجی ٹی وی چینلز پر قابل اعتراض مواد نشر ہونے سے متعلق کیس کی سماعت کی۔ سماعت کے دوران پیمرا کے وکیل کا کہنا تھا کہ پیمرا قوانین کو مزید سخت کرنے کی ضروت ہے پیمرا نے ایک نجی چینل کو کونسل آف کمپلین کی سفارش پر 10 لاکھ روپے جرمانہ کیا گیا لیکن جرمانے کے خلاف اسی نجی چینل نے ہائی کورٹ سے حکم امتناعی بھی حاصل کرلیا۔ پیمرا کے وکیل کے دلائل پر جسٹس شیخ عظمت نے ریمارکس دیئے کہ پیمرا صرف فحش گانوں کے پیچھے پڑا ہے۔ کہنے والے تو منٹو کو بھی فحش کہتے تھے۔ کیا ٹی وی پر جمہوری نظام کو لپیٹنے کی باتیں نہیں کی جاتیں۔ کیا شدت پسندی کے حق میں بات نہیں کی جاتی ۔ قائد اعظم اورعلامہ اقبال کے خلاف باتوں پر کسی کو تکلیف نہیں ہوتی، پیمرا صرف ہدایات اور وراننگ ہی جاری کرتا ہے ، اگر ضابطہ اخلاق پر باضابطہ عملدرآمد ہوتو سارے مسائل حل ہو جائیں۔ ایسی سزائیں دینے کی ضرورت ہے جو مثال بن جائیں۔ آمر کے دور میں خاتون نیوز کاسٹر کو سر پر ڈوپٹہ نہ لینے پر ہٹا دیا جاتا تھا جمہوری دور میں اتنی سختی نہیں ہوتی ۔ پاکستان میں فاشزم کو رائج نہ کیا جائے ایسا کام نہ کریں کہ معلومات غیر ملکی نشریاتی اداروں سے لینا پڑیں۔ سماعت کے دوران چیف جسٹس انور ظہیر جمالی نے ریمارکس دیئے کہ کچھ ٹی وی چینلز میں فرقہ ورانہ تقسیم کو ہوا دی جارہی ہے اور ایک دوسرے کی پگڑی اچھالنے کےلئے پیسے لےکر پروگرام کئے جاتے ہیں۔

ایمزٹی وی(کراچی)کراچی بھر میں تین روزہ انسداد پولیو مہم کا آغا ز کر دیا گیا ہے۔ انسداد پولیو مہم کا افتتاح کمشنر کراچی سید آصف حید شاہ نے کیا۔ مہم کے دوران کراچی کے بائیس لاکھ سے زائد 5 سال سے کم عمر بچوں کو پولیو کے قطرے پلائے جائیں گے۔ مہم کے دوران چھے ہزار سے زائد سیکورٹی اہلکار پولیو ورکز کی سیکورٹی پر مامور ہوں گے۔ مہم میں پانچ ہزار سے زائد پولیو ٹیمیں پولیو کے قطرے پلائیں گی۔ اس موقع پر کمشنر کراچی کا کہنا تھا کہ پولیو مہم اب اگست میں شروع کی جائے گی۔ کمشنر کراچی کا کہنا تھا کہ پولیو کے قطرے نہ پلانے والے والدین کے خلاف قانونی کاروائی کرنے کا کوئی قانون موجود نہیں انہیں قائل کر کے ان کے بچوں کو پولیو سے بچایا جا سکتا ہے۔ اس موقع پر سیکرٹری صحت احمد بخش ناریجو اور اسپتال کے ایم ایس ڈکٹر توفیق چوہدری بھی موجود تھے۔

ایمزٹی وی(اسلام آباد)الیکشن کمیشن نے اپنی اہلیہ کے اثاثے چھپانے کے معاملے پر مسلم لیگ (ن) کے رکن اسمبلی کیپٹن (ر) صفدر کو یکم جون کو طلب کر لیا ہے۔ گذشتہ روزالیکشن کمیشن میں چیف الیکشن کمشنر سردار محمد رضا کی سربراہی میں3 رکنی بینچ نے نوابزادہ صلاح الدین کی درخواست پر سماعت کی جس میں نوابزادہ صلاح الدین کے وکیل چوہدری فیصل نے موقف اپنایا کہ صفدر نے اپنی اہلیہ کے اثاثوں کی تفصیلات الیکشن کمیشن میں جمع نہیں کرائیں جو آئین کے آرٹیکل 62، 63 کی خلاف ورزی ہے، اس لیے انھیں نااہل قرار دیا جائے جس پرالیکشن کمیشن نے وضاحت کیلیے یکم جون کو کیپٹن (ر)صفدر کو طلب کر لیا ہے ۔

ایمزٹی وی(تعلیم)کراچی پریس کلب میں کانفرنس کرتے ہوئے آل سندھ پرائیویٹ اسکول ایسوسی ایشن کے چیئرمین حیدر علی نے کہا ہے کہ گرمیوں کی چھٹیوں پر سندھ حکومت نے جلد بازی میں فیصلہ کیا ہے، 46اسکولز کی رجسٹریشن معطل کرنا تعلیم دشمنی ہے ،محکمہ تعلیم سندھ رجسٹریشن منسوخ کرنے کا نوٹی فکیشن غیر مشروط طور پر واپس لے ورنہ ہتک عزت کا دعوی کرنے کے لیے قانونی حق استعمال کیا جائے گا۔ اس موقع پر وائس چیئرمین انور علی بھٹی ،محمد انور اور دیگر بھی موجود تھے ۔چیئرمین حیدر علی کا کہنا تھا کہ 19 مئی کو ایک نوٹی فکیشن کے ذریعے محکمہ تعلیم سندھ نے سب کو حیران کر دیا تھا ،تعلیمی ادارے افراتفری میں بند نہیں کیے جا سکتے تھے۔ نجی اسکولز ایسوسی ایشن نے محکمہ تعلیم سے تین روز کی مہلت مانگی تھی تاکہ جن اسکولز کے ٹیسٹ اور ہوم ورک کا سلسلہ ہو وہ مکمل کر لیا جا تا لیکن شاید محکمہ تعلیم تعلیمی عمل کو رکوانا چاہتا تھا ،عجلت میں 46 اسکولوں کو رجسٹریشن معطلی کے نوٹسز بھجوائے گئے ۔حیدر علی نے کہا کہ میڈیا میں ان اسکولز کی فہرست شائع کر کے انہیں مجرم بنا کر پیش کیا گیا ہم تمام تر زیادتی کی صورتحال پر احتجاجی تحریک چلانے پر بھی غور کر رہے ہیں، محکمہ تعلیم سندھ اور ڈائریکٹر پرائیویٹ انسٹی ٹیوشن کا نجی اسکولز کے ساتھ رویہ تضحیک آمیز ہے ۔انہوں نے کہا کہ جن اسکولز کی رجسٹریشن منسوخ کی گئی ہے وہ ہتک عزت کا دعویٰ کرنے کے لیے عدالتوں میں بھی جائیں گے ۔پریس کانفرنس کے شرکا میں عبدالرحمن ،امتیاز علی صدیقی ،محمد ساجد ،مرتضیٰ شاہ ، خان محمد ، عالم شیر ،دوست محمد دانش ،پرویز ہارون اور محمد شکیل بھی شامل تھے