لاہور: پاکستان کے معروف یوٹیوبر سعد الرحمٰن عرف ’ڈَکی بھائی‘ کو انہیں اور ان کے اہلخانہ کو قتل کی دھمکیاں ملنے لگیں۔

گزشتہ دنوں سوشل میڈیا پر ڈکی بھائی کی گورنر سندھ کامران ٹیسوری کے ہمراہ ویڈیوز اور تصاویر وائرل ہوئی تھیں،ان وائرل ویڈیوز کے بعد کہا جارہا تھا کہ ڈکی بھائی نے ایم کیو ایم میں شمولیت اختیار کرلی ہے۔

سوشل میڈیا پر زیرِ گردش ان جعلی خبروں پر ردعمل دیتے ہوئے یوٹیوبر ڈکی بھائی نے سماجی رابطے کی ویب سائٹ ایکس (سابق ٹوئٹر) پر اپنا ویڈیو بیان جاری کیا ہے۔

ڈکی بھائی نے کہا کہ “سوشل میڈیا پر میرے متعلق جھوٹی خبریں وائرل ہورہی ہیں جس کی وجہ سے مجھے اور میری فیملی کو قتل کی دھمکیاں موصول ہورہی ہیں”۔

یوٹیوبر نے کہا کہ “میں گزشتہ 7 سال سے یوٹیوبر ہوں، اب بھی ایک یوٹیوبر ہی ہوں اور اگلے 10 سے 15 سالوں تک بھی یوٹیوبر ہی رہوں گا، مجھے نہ ماضی میں سیاست میں دلچسپی تھی اور نہ اب ہے”۔

اُنہوں نے کہا کہ “میری سیاستدانوں سے ملاقات ہوتی ہے، وہ مجھے عزت دیتے ہیں، ملاقات کے لیے بلاتے ہیں لیکن اس کا مطلب یہ نہیں کہ مجھے سیاست میں آنے کا شوق ہے”۔

ڈکی بھائی نے کہا کہ “نامور میگزین اور سوشل میڈیا اکاؤنٹس نے میرے متعلق جھوٹی خبریں پھیلائی ہیں کہ میں نے سیاست جوائن کرلی ہے”۔

آخر میں اُنہوں نے مداحوں سے اپیل کرتے ہوئے کہا کہ “اگر آپ کو میرے متعلق اس طرح کی کوئی بھی جھوٹی خبر نظر آئے تو کمنٹ میں جعلی خبر ضرور لکھ دیا کریں”۔

کراچی: شوبز انڈسٹری کے معروف کامیڈین اداکار و میزبان احمد علی بٹ نے اداکارہ ثنا جاوید کے سابق شوہر گلوکار عمیر جیسوال کو تسلی دیتے ہوئے اُنہیں سچا اور شریف آدمی قرار دے دیا۔

ثنا جاوید کی اچانک پاکستانی کرکٹر شعیب ملک سے شادی کی خبر نے مداحوں کے ساتھ ساتھ شوبز انڈسٹری کو بھی حیران کردیا ہے۔شعیب ملک اور ثنا جاویددونوں کی اچانک شادی کے اعلان کے بعد مداح ثانیہ مرزا اور عمیر جیسوال کے ساتھ ہمدردی کررہے ہیں۔

ایسے میں معروف اداکار احمد علی بٹ نے بھی عمیر جیسوال کے لیے اپنے انسٹاگرام ہینڈل کی اسٹوری میں خصوصی پیغام جاری کیا ہے جس میں اُنہوں نے گلوکار کو ایک بہادر شیر اور سونے کا دل رکھنے والا سچا شریف آدمی قرار دیا۔

احمد علی بٹ نے زندگی کے چیلنجز سے سیکھنے اور آگے بڑھنے کی اہمیت پر زور دیتے ہوئے مشکل وقت میں عمیر جسوال کی ہمت کی تعریف کی۔اداکار نے کہا کہ “ہم سب کی زندگی میں مشکلات آتی ہیں لیکن ہمیں ہمت کرکے اُس آزمائش سے سیکھنے اور آگے بڑھنے کی ضرورت ہوتی ہے”۔

اُنہوں نے مزید لکھاکہ “میرے بھائی عمیر! اللہ آپ کو اور آپ کے خاندان کو ہمیشہ خوش رکھے”۔

واضح رہےشعیب ملک نے پہلی شادی سال 2010 میں بھارتی ٹینس اسٹار ثانیہ مرزا سے کی تھی، جن سے اُن کا ایک بیٹا بھی ہے جس کی پیدائش سال 2018 میں ہوئی تھی۔جبکہ ثنا جاوید نے سال 2020 میں عالمی وبا کورونا وائرس کے دنوں میں گلوکار عمیر جیسوال سے نکاح کیا تھا ۔

کراچی: سول ایوی ایشن کی جانب سے حج فلائٹ آپریشن سے قبل تیاریاں جاری ہیں۔

اس سلسلے میں بتایا گیا ہے کہ سعودی عرب جانے والی پروازوں کے مسافروں کی مکمل جانچ پڑتال ہوگی۔

ذرائع کے مطابق ائرپورٹ پر سعودی عرب سے جدید اسٹیٹ آف آرٹ مشینیں درآمد کی جائیں گی۔ 10جدید بیگیجزاسکیننگ مشینیں ملک کے مختلف ائرپورٹس پر نصب ہوں گی۔ قبل از حج آپریشن میں سعودی عرب جانے والے عازمین اور دیگر مسافروں کا سامان جدید مشینوں کے ذریعے اسکین کیا جائے گا۔

سول ایوی ایشن اتھارٹی نے اس حوالے سے سعودی حکومت سے رابطہ کیا ہے۔ سیکرٹری ہوابازی منصوبے کے نگراں ہیں، جس کے تحت جدید مشینیں کراچی،اسلام آباد اور لاہور ائرپورٹس پر نصب ہوں گی۔ جدید مشینیں ائرپورٹ پر جوائنٹ وینچر کے تحت آپریٹ کی جائیں گی۔ مسافروں اور سامان کی چیکنگ میں سی اے اے،اے ایس ایف،کسٹمز اوردیگر ادارے شامل ہوں گے۔

سی اے اے ذرائع کے مطابق جدیدبیگیجز اسکیننگ مشینیں مسافروں کے سامان کے ساتھ ساتھ طیارے کے لیے نقصان دہ آلات اور بارودی مواد کو جانچنے کی صلاحیت بھی رکھتی ہیں۔

کراچی: پاکستانی سابق کپتان بابراعظم نے بنگلہ دیش جاتے ہی دھاک جما دی۔

پریمیئر لیگ میں بابر اعظم کی ففٹی نے رنگپور رائیڈرز کو سلہٹ اسٹرائیکرز کیخلاف 4وکٹ سے کامیابی دلائی، اسٹرائیکرز نے 8 وکٹ پر 120 رنز بنائے، رائیڈرز کی 6 وکٹیں 39 رنز پر گرچکی تھیں لیکن پھر بابراور عمرزئی نے 89 کی ناقابل شکست شراکت بناکر ٹیم کو فتح سے ہمکنار کرادیا۔

بابر نے 49 بالز پر 56 جبکہ عمرزئی نے 47 رنز ناٹ آؤٹ بنائے۔دوسرے میچ میں کومیلا وکٹورینز نے فورچیون بریشال کو 4 وکٹ سے ہرا دیا۔

محمد رضوان نے 17 اور خوشدل شاہ نے 14 رنز بنائے، ناکام ٹیم کے شعیب ملک 7 رنز تک محدود رہے، عباس آفریدی نے واحد وکٹ کیلیے 40 رنز دیے۔