ایمز ٹی وی(دبئی سٹی) زندگی کی بے ثباتی اور موت کی حقیقت کو سمجھنا چاہیں تو دبئی میں پیش آنے والے اس دردناک واقعے کو دیکھ لیجئے جس نے ہر کسی کو ہلا کر رکھ دیا ہے۔

خلیج ٹائمز کی رپورٹ کے مطابق ایک مصروف شاہراہ پر پیش آنے والے حادثے میں ایک شخص موت سے بال بال بچ گیا۔ اسے کچھ زخم آئے تھے اور وہ سڑک کنارے بیٹھا ایمبولینس کا منتظر تھا۔ اس کے اردگرد موجود لوگ اسے خوش قسمت قرار دے رہے تھے کہ حیرتناک طور پر اس کی زندگی بچ گئی تھی، لیکن کسی کے وہم و گمان میں بھی نہیں تھا کہ موت عین اس کے سڑک پر کھڑی تھی۔

چند ہی لمحے بعد مخالف سمت سے آنے والی ایک گاڑی بے قابو ہوئی اور عین اسی شخص کو روندتے ہوئے گزرگئی جو ابھی ایک خوفناک حادثے میں مرتے مرتے بچا تھا۔ اس بار زندگی کی مزید ساعتیں اس کے حصے میں نہیں تھیں اور دیکھتے ہی دکھتے وہ دنیائے فانی سے کوچ کرگیا۔

دبئی پولیس ٹریفک ڈیپارٹمنٹ کے ڈائریکٹر بریگیڈیئر سیف المزروعی کا کہنا تھا کہ ایک خاتون ڈرائیور مخالف سمت سے آنے والے پک اپ ٹرک سے بچتی ہوئی گاڑی پر کنٹرول کھوبیٹھی اور سڑک کنارے بیٹھے زخمی شخص کو کچل ڈالا۔ اردگرد موجود تمام افراد حیرت انگیز طور پر محفوظ رہے۔