سڈنی: ٹی20 ورلڈکپ میں سپر 12 مرحلے کے 27 ویں میچ میں انگلینڈکےہاتھوں سری لنکا کو شکست کے بعد میزبان آسٹریلیا بھی ٹورنامنٹ سے باہر ہوگیا۔

سڈنی میں کھیلے گئے میچ میں سری لنکا کے کپتان داسن شناکا نے ٹاس جیت کر پہلے بیٹنگ کرنے کا فیصلہ کیا، پہلے بیٹنگ کرتے ہوئے لنکن ٹیم نے مقررہ 20 اوورز 8 وکٹوں کے نقصان پر 149 رنز اسکور کیے تھے۔

سری لنکا کی جانب سے پتھم نسانکا نے جارحانہ کھیل پیش کرتے ہوئے 45 گیندوں پر 67 رنز کی اننگز کھیلی تاہم انکے علاوہ کوئی بلے باز خاطر خواہ کارکردگی دکھانے میں ناکام رہا۔ دیگر کھلاڑیوں میں کوشل مینڈس 18، دھننجایا ڈی سلوا 9، چارتھ اسالنکا 8، بھانوکا راجا پاکسے اور کپتان داسن شناکا بناکر نمایاں رہے۔

انگلش بالرز کی جانب سے عادل رشید، سیم کرن، بین اسٹوکس، کرس ووکس نے ایک ایک وکٹ حاصل کی۔

ہدف کے تعاقب میں انگلش اوپنرز نے جارحانہ کھیل پیش کرتے ہوئے 75 رنز کا آغاز فراہم کیا، ایلکس ہیلز 47 اور کپتان جوز بٹلر 28 رنز بناکر آؤٹ ہوئے۔

اوپنرز کے آؤٹ ہونے کے بعد انگلش ٹیم کا مڈل آرڈر مشکلات کا شکار نظر آیا، ہیری بروکس اور لیام لیونگسٹن 4، 4، سیم کرن 6، معین علی ایک رنز بناکر پویلین لوٹے۔ بین اسٹوکس کی ناقابل شکست 42 رنز کی بدولت انگلینڈ جیت حاصل کرنے میں کامیاب ہوا۔

سری لنکا کی جانب سے دھننجایا ڈی سلوا، وینندو ہسرنگا اور لاہیرو کمارا نے 2،2 وکٹیں حاصل کیں۔

ویب ڈیسک: مائکرو بلاگنگ ویب سائٹ ٹوئٹر کے نئے مالک ایلون مسک نےویریفائیڈ اکائونٹس کے لئے فیس میں کمی کردی۔

مائکرو بلاگنگ ویب سائٹ ٹوئٹر کے نئے مالک ایلون مسک نے پلیٹ فارم کا کنٹرول سنبھالتے ہی اعلان کیا تھا کہ ویب سائٹ پر موجود ویریفائڈ اکاؤنٹس کو ماہانہ 20 ڈالر تک فیس دینی پڑے گی، تاہم بعد ازاں انہوں نے تنقید کے بعد فیس کو کم کرکے 8 ڈالر کردیا تھا۔

اب خبر سامنے آئی ہے کہ ٹوئٹر آئندہ ہفتے تمام ویریفائڈ اکاؤنٹس ہولڈرز کو سبسکرپشن فارم بھیجے گا اور ان سے سروس استعمال کرنے اور بلیو ٹک کے عوض ماہانہ 8 ڈالر فیس ادا کرنے کا کہے گا۔

امریکی اخبارکے مطابق یہ پہلے ہی خبریں تھیں کہ ٹوئٹر کے ویریفائڈ اکاؤنٹس پر 7 نومبر سے فیس عائد کی جائے گی اور اب ٹوئٹر کے متعدد ذرائع نے بتایا ہے کہ ویریفائڈ اکاؤنٹس ہولڈرز کو 8 نومبر تک سبسکرپشن ای میل بھیج دی جائے گی۔

رپورٹ کے مطابق صارفین کو فیس ادا کرنے یا نہ کرنے سے متعلق خود مختاری فراہم کی جائے گی اور انہیں سوچنے کے لیے چند ماہ دیے جائیں گے، تاہم ساتھ ہی انہیں بتادیا جائے گا کہ کب سے وہ فیس دینے کے پابند ہوں گے۔

اسی طرح صارفین کو بتایا جائے گا کہ انہیں 8 ڈالر ماہانہ ادا کرنے کے بعد مزید کیا کیا فوائد حاصل ہوں گے۔

رپورٹ کے مطابق ممکنہ طور پر حکومتوں اور حکومتی سربراہوں اور اداروں کے اکاؤنٹس کو فیس کے بغیر ہی چلایا جا سکتا ہے، تاہم اس حوالے سے فوری طور پر کچھ نہیں کہا جا سکتا۔

ممکنہ طور پر ایسا بھی ہوسکتا ہے کہ جو ویریفائڈ اکاؤنٹس ماہانہ 8 ڈالر کی فیس ادا کرنے سے انکار کریں گے تو ان کا بلیوٹک نہیں ہٹایا جائے گا، تاہم ان کی ٹوئٹس اور اکاؤنٹ کو محدود کردیا جائے گا۔

تاہم اس حوالے سے مصدقہ طور پر کچھ نہیں کہا جا سکتا لیکن ایلون مسک واضح کر چکے ہیں کہ جو ویریفائڈ اکاؤنٹ ہولڈرز فیس ادا نہیں کریں گے، ان سے بلیو ٹک واپس لے لیا جائے گا۔

اسلام آباد: وفاقی تعلیمی بورڈ نے سکینڈری اسکول سرٹیفکیٹ (ایس ایس سی) پارٹ ون اور ٹو کے دوسرے سالانہ امتحانات کے نتائج کا اعلان کر دیا۔

50 ہزار 893 طلبا میں سے 36 ہزار 590 طلبا کامیاب قرار پائے، کامیابی کا مجموعی تناسب 73.63 فیصد رہا۔ جمعرات کو وفاقی تعلیمی بورڈ کے چیئرمین قیصر عالم نے نتائج کا اعلان کیا۔

نتائج کے مطابق 47 ہزار 560 ریگولر طلبا نے امتحانات میں حصہ لینے کیلئے داخلہ بھیجا جس میں سے 35 ہزار 43 طلبا کامیاب ہوئے۔ نتائج کا تناسب 73.45 فیصد رہا جبکہ 3 ہزار 333 پرائیویٹ طلبا میں سے ایک ہزار 547 طلبا کامیاب ہوئے۔ کامیاب طلبا کا تناسب 47.61 فیصد رہا۔

تعلیمی بورڈ ترجمان کے مطابق نتائج کو وفاقی تعلیمی کی بورڈ ویب سائٹ www.fbise.edu.pk  پر جاری کر دیا گیا ہے جبکہ طلبا اپنا رول نمبر 5050 پر ایس ایم ایس کرکے بھی نتیجہ معلوم کر سکتے ہیں۔

محکمہ بورڈزوجامعات نےجناح سندھ میڈیکل یونیورسٹی کےشعبہ فارماکولوجی کےچیئرمین پروفیسر ڈاکٹر محمد اظہر مغل کو ڈین بیسک میڈیکل سائنسز مقررکردیا گیا۔

پروفیسر ڈاکٹر محمد اظہر مغل کو 3 سال کیلئے ڈین فیکلٹی آف بیسک میڈیکل سائنسز مقرر کیاگیا ہے ۔پروفیسر ڈاکٹر محمد اظہر مغل گریڈ 21 کے پروفیسر اورفارماکولوجی میں پی ایچ ڈی فیلو ہیں، انہوں نے جناح سندھ میڈیکل یونیورسٹی میں 2016 میں شمولیت اختیار کی اس سے قبل وہ ڈائو یونیورسٹی میں بحیثیت پروفیسر خدمات انجام دے رہے تھے۔

پروفیسر مغل امریکی ذیابیطس ایسوسی ایشن کے 2004 سے رکن بھی ہیں، ان کے مقامی اور بین الاقوامی جرنلز میں 40 سے زائد ریسرچ پیپرز بھی شائع ہوچکے ہیں۔

وائس چانسلر پروفیسر امجد سراج میمن نے پروفیسر مغل کو ڈین بیسک میڈیکل سائنسز مقرر ہونے پر مبارکباد دی اور اس امید کا اظہار کیا کہ وہ اپنی ذمہ داری کو بخوبی انجام دینگے۔

بھارت نے بنگلادیش کو جیت کے لیے185رنز کا ہدف دےدیا۔

بھارتی کرکٹر ز نےمقررہ 20 اوورز میں 6 وکٹوں کے نقصان پر 184 رنزاسکور کیے۔کپتان روہت شرما 2 ، راہول 50، سوریا کمار یادیو 30ہاردک پانڈیا 5، دنیش کارتک اور اکسر پٹیل 7، 7 رنز بناکر آؤٹ ہوئے جبکہ ویرات کوہلی نے 64 رنز کی ناقابلِ شکست اننگز کھیلی۔

بنگال ٹائیگرز کی جانب سے حسن محمود نے تین کھلاڑیوں کو آؤٹ کیا جب کہ کپتان شکیب الحسن 2 وکٹیں لینے میں کامیاب رہے۔

گروپ 2 میں اس وقت بنگلادیش اور بھارت 4 پوائنٹس کے ساتھ دوسرے اورتیسرے نمبر پر موجود ہیں، بھارت رن ریٹ بہتر ہونے کی وجہ سے دوسرے نمبر پر براجمان ہے۔

یہ میچ بھارت سمیت بنگلادیش کے لیے جیتنا ضروری ہے، اس کے علاوہ اگر بنگلادیش نے اس میچ میں فتح حاصل کی اور پاکستان نے کل جنوبی افریقا کو ہرادیا تو پاکستان کے لیے بھی سیمی فائنل تک رسائی آسان ہوجائے گی۔

کراچی: یونیورسٹی بزنس اسکول کے زیر اہتمام ینگ انٹرپرینیور زکنونشن 2022 ء جمعرات03 نومبر2022 ء کو صبح 10:00 بجے کراچی یونیورسٹی بزنس اسکول کی سماعت گاہ میں منعقد ہوگا۔

شیخ الجامعہ پروفیسرڈاکٹر خالد محمودعراقی صدارت کریں گے جبکہ صوبائی وزیر تعلیم سیدسردارعلی شاہ مہمان خصوصی ہوں گے۔

دیگر مقررین میں برگرلیب کے سی ای اوخضر بیگ،ملکہ فوڈز کے سی ای اوفیصل مبین،ڈپٹی جنرل مینجرمارکیٹنگ (لکی ون)،احمد رؤف عیسیٰ سی ای او ٹیلی مارٹ،اسماعیل فوڈانڈسٹریز کے عارف حسین ودیگر شامل ہیں۔

کراچی: انڈونیشیاء کی یونیورسٹی آف سمیترا اُتاراکے 12 اسکالرتحقیقی تربیت کےلئے بین الاقوامی مرکز برائے کیمیائی و حیاتیاتی علوم جامعہ کراچی پہنچ گئے ہیں۔

آئی سی سی بی ایس جامعہ کراچی کے ترجمان کے مطابق انڈونیشین یونیورسٹی کے اسکالر دراصل انڈونیشی نوجوان سائنسدانوں کے لئے متعین شدہ آئی سی سی بی ایس اور کامسٹیک اسکالرشپ پروگرام کے تحت تحقیقی تربیت کی تکمیل تک آئی سی سی بی ایس جامعہ کراچی میں قیام کریں گے، اس دوران وہ ڈاکٹر پنجوانی سینٹر برائے مالیکیو لر میڈیسن اور ڈرگ ریسرچ (پی سی ایم ڈی),جامعہ کراچی اور ایچ ای جے ریسرچ انسٹی ٹیوٹ آف کیمسٹری، جامعہ کراچی میں کیمیاء اور مالیکولر میڈیسن کے مختلف شعبوں میں تحقیقی تربیت حاصل کریں گے۔

آئی سی سی بی ایس جامعہ کراچی کے سربراہ اور کامسٹیک کے کوارڈینیٹر جنرل پروفیسر ڈاکٹرمحمد اقبال چوہدری نے انڈونیشی اسکالرز کی آمد کا خیر مقدم کرتے ہوئے کہا ہے کہ آئی سی سی بی ایس جامعہ کراچی کا شمارترقی پذیر دنیا کے بہترین حیاتیاتی اور کیمیائی علوم کے اداروں میں ہوتا ہے، بین الاقوامی مرکز اپنی نوعیت کا واحد پاکستانی تحقیقی ادارہ ہے جونہ صرف آئی ایس او سے سند یافتہ ہے بلکہ "یونیسکوسینٹر فار ایکسلینس کیٹیگری 2 انسٹی ٹیوٹ" کے منصب پر بھی فائز ہے۔

انہوں نے کہا کہ اس جوائینٹ وینچر سے دوبرادر ممالک میں سائینس اور ٹیکنالوجی کو فروغ ملے گا، اس سے مستقبل کے نئے چیلنجز سے نبردآزما ہونے کا موقع بھی حاصل ہوگا۔ انہوں نے کہا یہ پروگرام انڈونیشی نوجوان سائینسدانوں کی تحقیقی تربیت کا بہترین وسیلہ ہے۔

صوبائی وزیر تعلیم و ثقافت سندھ سید سردار شاہ نے یونیسیف ایجوکیشن پارٹنرز گروپ کے زیر اہتمام ہنگامی اجلاس میں بذریعہ وڈیو لنک شرکت کی۔

اجلاس میں ماحولیاتی تبدیلی کے باعث ہونے والی نقل مکانی کے موضوع پر منعقدہ عالمی ڈونر کانفرنس میں پاکستان میں سیلاب اور آفریکا میں قحط سالی سے متاثر ہونے والے بچوں کی تعلیم کی بحالی پر بات ہوئی۔

وزیر تعلیم سندھ سید سردار شاہ نے پاکستان کی نمائندگی کی اور خاص طور پر سندھ میں سیلاب کی وجہ سے ہونے والے تعلیمی نقصانات کے متعلق عالمی کمیونٹی کو آگاہ کیا۔ وزیر تعلیم سندھ نے اس موقع پر بتایا کہ سیلاب سے 20 لاکھ بچوں کی تعلیم متاثر ہوئےہیں، جس میں سے 46 فیصد بچیوں کی تعلیم متاثر ہوئی ہے۔

سید سردار شاہ نے عالمی ڈونرز کمیونٹی کو بتایا کہ سندھ میں 20602 اسکولز عمارتوں کو نقصان پہنچا ہے۔ جبکہ بحالی کے عمل میں کے دوران سیلاب کی وجہ سے کمزور ہونے والی عمارتوں میں بچوں کو نہیں بٹھایا جا سکتا، انہوں نے کہا کہ کافی اسکولز کی عمارتیں کمزور ہوچکی ہیں حفاظتی معیار کے حساب سے ناقابل استعمال ہیں، صوبائی وزیر تعلیم نے کہا کہ اس وقت تدریسی عمل کی بحالی سب سے بڑا چیلینج ہے، ہمیں اس وقت ٹینٹ کلاسز شروع کرنے لیے 20 ہزار ٹینٹس کی ضرورت ہے۔

یونیسیف ایجوکیشن پارٹنرز گروپ کانفرنس میں عالمی برادری نے سندھ میں فلڈ ریسپانس کی تعریف کی اور صوبائی حکومت کے اقدامات کو سراہتے ہو کہا کہ درست عداد و شمار ہونے کے سبب سندھ میں امداد اور بحالی اقدامات میں آسانی ہو رہی ہے اور سندھ نے اپنا کیس صحیح انداز میں پیش کیا ہے۔ وزیر تعلیم سندھ نے گلوبل پارٹنر سے کہا کہ ماحولیاتی تبدیلی کے باعث ہمیں آئندہ اسکولز کے لیے ایسی عمارتیں تعمیر کرنی ہیں جن پر موسمی اثرات کم سے کم تر ہوں۔

سڈنی: قومی ٹیم کو جنوبی افریقہ کے خلاف میچ سے قبل ہی بڑا دھچکا لگ گیا۔

سڈنی میں ٹیم ڈاکٹر نجیب نے پریس کانفرنس میں فخر زمان کی انجری کے بارے میں سوال کا جواب دیتے ہوئے تسلیم کیاتھا کہ وہ مکمل فٹ نہیں اور جنوبی افریقہ کے خلاف میچ میں دسیتاب نہیں ہوں گے۔

ٹیم ڈاکٹر کے مطابق فخر زمان کو نیدر لینڈز کے خلاف کھلا کر رسک لیا تھا، کبھی کامیابی مل جاتی ہے لیکن فخر کے معاملے میں ایسا نہیں، بدقسمتی سے انکی انجری نے دوبارہ سر اٹھالیا ہے۔

ڈاکٹر نجیب نے کہا کہ شاہین شاہ آفریدی کی فٹنس کے حوالے سے ڈاکٹر نجیب کا موقف تھا کہ شاہین مکمل فٹ ہیں، ان کے حوالےسے کی جانے والی باتوں میں کوئی صداقت نہیں، انجری کھیل کا حصہ ہیں، کسی بھی وقت اس صورت حال کا سامنا کرنا پڑسکتا ہے۔

دوسری جانب ٹیم میجمنٹ نے آئی سی سی کی ٹیکنیکل کمیٹی کو فخر زمان کے متبادل کے طور پر محمد حارث کے نام کی منظوری کے لیے لکھ دیا ہے، وہاں سے گرین سگنل ملنے کے بعد محمد حارث کو ٹیم میں شامل کرنے کا باقاعدہ اعلان کردیا جائے گا۔

واضح رہے کہ قومی ٹیم سپر 12 مرحلے کے اپنے چوتھے میچ میں کل جنوبی افریقہ کے خلاف میدان میں اُترے گی۔

قبل ازیں قومی ٹیم کی ایونٹ کے سیمی فائنل میں پہنچنے کے امکانات نہ ہونے کے برابر ہیں تاہم جنوبی افریقہ کے خلاف لازمی فتح درکار ہے، جنوبی افریقہ نے اپنے گزشتہ میچ میں بھارت کو شکست دی تھی۔

ایڈیلیڈ: ٹی20 ورلڈکپ میں سپر 12 مرحلے کے 23 ویں میچ میں بنگلہ دیش نے بھارت کے خلاف ٹاس جیت کر پہلے فیلڈنگ کرنے کا فیصلہ کرلیا۔

ایڈیلیڈ میں کھیلے جارہے میچ میں بنگلہ دیش کے کپتان شکیب الحسن نے کہا کہ کوشش ہوگی بھارت کو شکست دیکر سیمی فائنل میں پہنچنے کی راہ ہموار کریں۔

اس موقع پر بھارتی کپتان روہت شرما نے کہا کہ پہلے بیٹنگ کرکے بنگلہ دیش کو انڈر پریشر لائیں گے تاکہ میچ میں کامیابی کے ساتھ سیمی فائنل میں جگہ پکی کریں۔

دوسری جانب بنگلہ دیش اگر بھارت کو شکست دیتا ہے اور پاکستان جنوبی افریقہ اور بنگلہ دیش کے خلاف اپنے میچز جیت جاتا ہے تو سیمی فائنل میں جانے کے امکانات ہوں گے تاہم بنگلہ دیش کی شکست کے بعد پاکستان کے ممکنہ امکانات تقریباً معدوم ہوجائیں گے۔