ایمز ٹی وی(ڈیرہ غازی خان) ڈی جی خان میں جعلی عاملوں کے مبینہ تشدد سے خاتون جاں بحق ہوگئی۔ شوہر نے الزام لگایا ہے کہ جعلی عامل جن نکالنے کے لیے بیوی کو درخت کےساتھ لٹکاکر ڈنڈے مارتے رہے۔ پولیس کا کہنا ہے کہ پوسٹ مارٹم رپورٹ کے بعد ہی مقدمہ درج کریں گے۔
ڈیرہ غازی خان کے علاقے سجاد آباد کا نذر حسین اپنی بیوی ثریا بیگم کودم کرانے نورنگ آباد لے گیا جہاں جعلی عاملوں امان اللہ اور عبدالحمید نے بتایا کہ خاتون پر جن کا اثر ہے ۔ جن نکالنے کے لیے جعلی عاملوں نے ثریا بیگم کو درخت سے باندھا ، ڈنڈے مارے اور دھواں دیا جس سے خاتون کی حالت غیر ہوگئی۔سجاد کا کہنا ہے کہ اپنی بیوی کی چیخ و پکار اور اذیت دیکھ کر وہ دونوں جعلی عاملوں کو تشدد سے منع کرتا رہا لیکن وہ نہ مانے۔ حالت خراب ہونے پرخاتون کو ٹیچنگ ہسپتال منتقل کیا جارہا تھا کہ وہ راستے میں ہی دم توڑ گئی۔دونوں جعلی عامل واقعے کے بعد سے مفرور ہیں۔ پولیس کا کہنا ہے کہ پوسٹ مارٹم کے بعد مقدمہ درج کرکے ملزمان کو گرفتار کیا جائے گا۔