کراچی ( ایمز ٹی وی ) لیاری سے پیپلز پارٹی کے منتخب رکن قومی اسمبلی محمد شاہ جہاں بلوچ نے انٹر کامرس کے امتحان میں کراچی میں دوسری پوزیشن حاصل کرنے والی لیاری کی ہونہار طالبہ عائشہ عبدالخالق کو 5لاکھ روپے کا نقد انعام دیا ہے ۔اس حوالے سے گزشتہ روز شہید بے نظیر بھٹو یونیورسٹی لیاری میںایک پر وقار تقریب کا اہتمام کیا گیا جسمیں کمشنر کراچی شعیب صدیقی ،رکن سندھ اسمبلی ثانیہ ناز ،بے نظیر شہید یونیورسٹی لیاری کے وائس چانسلر اختر بلوچ و دیگر نے شرکت کی ،شرکاءسے خطاب کرتے ہوئے رکن قومی اسمبلی نے کہا کہ تعلیم کو فروغ دے کر ہی پاکستان ترقی یافتہ اقوام کی صف میں آسکتا ہے ،لیاری کی فلاح و بہبود اور ہر بچے کو زیور تعلیم سے آراستہ کرنا میرا مشن ہے اور اس مقصد کے لئے تمام وسائل بروئے کا ر لائینگے ،وہ دن دور نہیں جب عائشہ عبدالخالق کی طرح لیاری کے دیگر نوجوان بھی ملکی اور بین الاقوامی سطح پر علاقے کا نام روشن کرینگے ۔