ایمزٹی وی (اسپورٹس)آئی سی سی چیمپینز ٹرافی میں گروپ بی کے انتہائی اہم میچ میں پاکستان نے سری لنکا کیخلاف ٹاس جیت کر فیلڈنگ کرنے کا فیصلہ کر لیا ہے۔ میچ کیلئے پاکستانی ٹیم میں ایک تبدیلی کی گئی ہے اور شاداب خان کی جگہ فہیم اشرف کو ٹیم میں شامل کیا گیا ہے۔قومی کرکٹ ٹیم کے سینئر کھلاڑی اظہر علی نے فہیم اشرف کو ون ڈے کیپ پہنائی اور تمام کھلاڑیوں نے انہیں مبارکباد دی۔
میچ کیلئے پاکستانی ٹیم کی قیادت سرفراز احمد کر رہے ہیں جبکہ دیگر کھلاڑیوں میں اظہر علی، فخر زمان، بابر اعظم ،محمد حفیظ، شعیب ملک، عماد وسیم، فہیم اشرف، محمد عامر، حسن علی اور جنید خان شامل ہیں۔
سری لنکن ٹیم کی قیادت اینجلو میتھیوز کے ہاتھ میں ہے جبکہ دیگر کھلاڑیوں میں نیروشن ڈیکویلا، دنوشکا گوناتھیلاکا، کوشل مینڈس، دنیش چندی مل، اسیلا گونارتنے، دھنانجیا دی سلوا، تھیسارا پریرا، سورنگا لکمل، لاستھ ملنگا اور نووران پرادیپ شامل ہیں۔
واضح رہے کہ یہ میچ دونوں ٹیموں کیلئے کوارٹر فائنل کی حیثیت رکھتا ہے کیونکہ فاتح ٹیم سیمی فائنل کیلئے کوالیفائی کر لے گی جبکہ ہارنے والی ٹیم ٹورنامنٹ سے باہر ہو جائے گی۔ پاکستان نے اس سے قبل ٹورنامنٹ میں دو میچ کھیلے جن میں سے ایک میں شکست اور دوسرے میں فتح حاصل ہوئی جبکہ سری لنکا نے بھی دو میچ کھیل کر ایک میں فتح حاصل کی اور دوسرے میں ہار اس کا مقدر بنی تھی۔
