ایمزٹی وی (کراچی/تعلیم)کراچی کے علاقے سولجر باز ارمیں گرائے گئے اسکول کے چوتھی اور پانچویں جماعت کے طلبا ملبے پر بیٹھ کر تعلیم حاصل کرنے پر مجبور ہیں،1928ءمیں قائم اسکول کا سابق ایڈمنسٹریٹر کراچی نے وزیرتعلیم نثار کھوڑو کو دورہ بھی کرایا تھا ۔
کراچی کے علاقے سولجر بازار میں ہفتے اور اتوار کی درمیانی شب تاریخی عمارت مسمار کرنے سے سیکنڈری اسکول کا حصہ بھی متاثر ہوا ، 1928 سے قائم جفل ہرسٹ سرکاری سیکنڈری اسکول کی چوتھی جماعت کے طالبات آج جب اسکول آئیں تو انہیں اپنی کلاس کی جگہ ملبے کا ڈھیر دکھائی دیا، حیرت اور صدمے نے ان کے حواس ہی چھین لیے۔
طالبات کا کہنا تھا کہ آج وہ اسکول آئے تو انہیں اپنی کلاس ٹوٹی ہوئی ملی ۔ اسکول کے پرنسپل محمد شفیق کا کہنا تھا کہ کسی بھی تاریخی عمارت کو مسمار کرنا غیر قانونی ہے، اگر اعلیٰ حکام نے آج ڈی سی آفس طلب کیا تو مذاکرات کے لیے ضرور جاؤں گا۔
ہر اہم واقعہ کی طرح قومی ورثہ قرار دی جانے والی اس تاریخی عمارت کی بربادی پر حکام حسب سابق سانپ نکلنے کے بعد لکیر پیٹتے نظر آرہے ہیں، دیکھنا یہ ہے کہ ایک ہزار طالب علموں کے مستقبل کا اب کیا ہوگا اور قبضہ اور بلڈوزر مافیا کو کون لگام دے گا۔