ایمزٹی وی(تعلیم/کراچی)وزیراعلیٰ سندھ مراد علی شاہ نے سندھ بھر کے میٹرک اور انٹر میں پوزیشن لانے والے طلبہ کو انعام کے طور پر خطیر رقم و سرٹیفکیٹس دینے کی منظوری دیدی ۔ ایڈیشنل چیف سیکرٹری برائے جامعات وبورڈز محمد حسین سید کی جانب سے بھیجی گئی سمری میں تجویز دی گئی ہے کہ سندھ بھر کے میٹرک اور انٹر کے پوزیشن ہولڈر کی حوصلہ افزائی کیلئےانہیں انعام دیا جائے۔
ذرائع کےمطابق پہلی پوزیشن لانے والے کو 3لاکھ، دوسرے پوزیشن ہولڈر کو دو لاکھ اور تیسری پوزیشن لانے والے کو ایک لاکھ روپے فی کس اور سرٹیفکیٹس دیئے جائیں۔ تجویز کے مطابق طلبہ کی تقریب وزیراعلیٰ ہائوس میں رکھی جائے اور وزیراعلیٰ خود پوزیشن ہولڈر طلبہ کو سرٹیفکیٹس اور انعامی رقم دیں۔
واضح رہے کہ وزیراعلیٰ پنجاب کی طر ز پر میٹرک کے پوزیشن ہولڈر طلبہ کو انعام دینے کا سلسلہ پہلے قائم علی شاہ نے سیکرٹری بورڈ وجامعات ممتاز علی شاہ کی سفارشات پر کیا تھا۔ تاہم ممتاز علی شاہ کے جانے کے بعد یہ معاملہ رک گیا تھا اور اس کے بعد آنے والے سیکرٹری بورڈز وجامعات نوید شیخ نے تو معاملے پر بالکل توجہ نہیں دی تاہم مراد علی شاہ نے نہ صرف پوزیشن ہولڈر کے اعزاز میں تقریب کی منظوری دی بلکہ رقم بھی 3 لاکھ، 2 لاکھ اور ایک لاکھ کرنے سے اتفاق کیا۔