بےنظیرآباد: حکومت سندھ کے محکمہ یونیورسٹیز اینڈ بورڈز نے شہید بینظیر بھٹو یونیورسٹی بینظیر آباد میں پروفیسر ڈاکٹر امانت علی جلبانی کو آئندہ چار سالہ مدت کے لیے وائس چانسلر تعینات کرنے کا نوٹیفکیشن جاری کردیا ہے۔

سندھ بھر کی سرکاری جامعات کی کنٹرولنگ اتھارٹی وزیراعلیٰ سندھ نے 11 فروری بروز منگل کو پروفیسر ڈاکٹر امانت علی جلبانی کو شہید بے نظیر بھٹو یونیورسٹی، شہید بے نظیر آبادکا وائس چانسلر تعینات کرنے کی منظوری دی جس کے بعد محکمہ یونیورسٹیز اینڈ بورڈ نےاس کا باقاعدہ نوٹیفیکیشن جاری کر دیا ہے۔

واضح رہے کہ سرچ کمیٹی نے شہید بینظیر بھٹو یونیورسٹی کے وائس چانسلر کے لیے تین ناموں کی منظوری کی سمری وزیراعلی ہاؤس ارسال کی تھی۔ اس میں پہلے نمبر پر پروفیسر سرفراز سولنگی تھے جنہوں نے انٹرویو میں 85 نمبر حاصل کیے تھے، جبکہ دوسرے نمبر پر پروفیسر ڈاکٹر امانت علی جلبانی تھے جنہیں سرچ کمیٹی نے انٹرویو میں 80 نمبر دیے تھے اور تیسرے نمبر پر پروفیسر نبی بخش جمالی تھے جنہیں سر کمیٹی نے 75 نمبر دیے تھے۔