ایمز ٹی وی (ایجوکیشن) آئی جی سندھ غلام حیدرجمالی نے ماتحت پولیس افسران کوہدایات جاری کی ہیں کہ سرکاری ونجی اسکولوں ،جامعات ،کالجز،مشنری اسکولوں سمیت تمام تعلیمی اداروں کے لئے ضلعی سطح پر مرتب کردہ کنٹی جینسی پلان کواپ گریڈکیاجائے اوراس حوالے سے جملہ اقدامات کا ازسرنوجائزہ لیا جائے۔انہوں نے کہاکہ سندھ کے تمام ضلعوں کی سطح پرتھانہ جات کی حدودمیں آنے والے سرکاری ، نجی و مشنری اسکولوں ودیگرتمام تعلیمی اداروں کے منتظمین ،سربراہان ونگران کومتعلقہ ڈی آئی جیز، ایس ایس پیز،ڈی ایس پیزدفاترکے علاوہ ایس ایچ اوزکے موبائل نمبرزکی فہرستوں کویقینی بنایاجائے تاکہ سیکورٹی کے جملہ اقدامات کوفول پروف بنایاجاسکے۔ انہوں نے مزیدکہاکہ بالخصوص شہروں کے مضافات میں قائم نجی وسرکاری اسکولوں ،مشنری اسکولوں کے علاوہ کالجوں ،جامعات وغیرہ کے تدریسی عمل کے آغازاور چھٹی کے اوقات میں اطراف کے تمام مرکزی راستوں ،ذیلی سڑکوں پرپولیس گشت اوررینڈم اسنیپ چیکنگ اقدامات کومزیدسخت کیا جائے۔