(تعلیم /راولپنڈی) نئے تعلیمی نظام کے تحت ایجوکیشن اسیسمنٹ کمیٹی بنا دی گئی۔یہ کمیٹی پنجاب کی سطح پر ہر ضلع کے 10 تعلیمی اداروں کا اچانک معائنہ کرے گی اوراسکولوں کا ریکارڈ اور کارکردگی بھی چیک کرے گی ۔
باالخصوص ایسے گرلز ہائی اسکولوں کی سختی سے چیکنگ کی جائے گی جن کو ہائی اسکولوں میں ضم کر دیا گیا تھا۔ بعد ازاں ملی بھگت اور اختیارات کے ناجائز استعمال سے پرائمری کی کلاسز کو شام کی شفٹ میں تبدیل کر کے چلایا جا رہا ہے۔ راولپنڈی کینٹ کے علاقہ میں ایسے اسکول موجود ہیں جن کی اطلاعات ملنے پر کمیٹی نے سختی سے ان اسکولوں کی جانچ پڑتال کرنے کا فیصلہ کیا ہے۔ کمیٹی کے ممبران مانٹیرنگ ٹیموں کی کارکردگی کا بھی جائزہ لیں گے۔ ذرائع کے مطابق رواں ہفتہ میں محکمہ تعلیم کے اعلیٰ حکام کا اجلاس ہو گا جس میں اہم فیصلے متوقع ہیں۔ ناقص کارکردگی پر ٹیچرز کو سزا کے عمل کو حتمی شکل بھی دی جائے گی۔