ایمزٹی وی(اسپرٹس)پی ای ایس ایل میں اسپاٹ فکسنگ کے بعد اسلام آباد یونائیٹڈ اور ٹیسٹ کرکٹ ٹیم کے کپتان مصباح الحق مایوسی کاشکار ہوگئے۔ اس حوالے سے ان کا کہنا تھا کہ جو کچھ ہوا انتہائی تکلیف دہ اور مایوس کن تھا،پی سی بی اور آئی سی سی کو سخت اقدامات کرنے چاہئیں۔
میڈیا ذرائع کے مطابق پاکستان سپر لیگ (پی ایس ایل)میں اسلام آباد یونائیٹڈ ٹیم کے کھلاڑیوں شرجیل خان اور خالد لطیف کے مبینہ سٹے بازی میں ملوث ہونے کے بعد کپتان مصباح الحق بھی بول پڑے اور کہا کہ پاکستان کرکٹرز کو زیادہ ذمہ داری کا مظاہرہ کرنا ہوگا،
اس تمام عرصے میں جو کچھ بھی ہوا وہ ہمارے لئے انتہائی تکلیف دہ تھا۔ انہوں نے کہا کہ واقعے کے اثرات سے نکل کر آگے بڑھنے کی کوشش کررہے ہیں،ہمیں محتاط ہونا پڑے گا اور کرکٹ پر توجہ دینا ہوگی۔
یاد رہے شرجیل خان اور خالد لطیف کو مبینہ سپاٹ فکسنگ میں ملوث ہونے کی وجہ سے پی سی بی معطل کرچکی ہے اور ان کو دبئی سے پی ایس ایل سے باہر کرکے واپس وطن بھجوادیا گیا تھا۔