ایمزٹی وی (انٹرٹینمنٹ)جادوئی چراغ پر مشتمل صدیوں پرانی دیومالائی کہانی ’’الہٰ دین‘‘ کو بچوں کے ساتھ بڑے بھی بے حد پسند کرتے ہیں اور 1992 میں معروف ڈزنی کمپنی نے الہ دین کی کہانی کو بچوں کیلئے کارٹون مووی کی شکل میں پیش کیا جسے اس قدر مقبولیت حاصل ہوئی کہ لوگ آج بھی کسی اور فلم کے مقابلے میں الہٰ دین مووی دیکھنا پسند کرتے ہیں کارٹون فلم الہٰ دین کو ڈزنی کمپنی بیوٹی اینڈ دی بیسٹ کی طرح فلمی شکل میں دوبارہ پیش کرنے جارہی ہے۔
ڈزنی کمپنی گزشتہ کافی عرصے سے فلم کے مرکزی کردار الہٰ دین کی تلاش میں سرگرداں تھی لیکن الہٰ دین تھا کہ مل کے ہی نہیں دے رہا تھا اوراس طاقتور کردار کیلئے پاک بھارت کے مشہور اداکاروں کے نام بھی سامنے آئے لیکن ڈزنی کسی کو بھی منتخب کرنے میں ناکام رہی اب بالآخر ڈزنی کمپنی الہٰ دین کو تلاش کرنے میں کامیاب ہوگئی
فلم کی کہانی ایک غریب لڑکے الہٰ دین کے گرد گھومتی ہے جو ایک خوبصورت شہزادی کی محبت میں گرفتار ہوجاتا ہے بعد ازاں اسے ایک جادوئی چراغ ملتا ہے جس کے ذریعے وہ نہ صرف اپنی محبت حاصل کرلیتا ہے بلکہ اس کے حالات بھی بدل جاتے ہیں۔
ڈزنی نےالہٰ دین کے مرکزی کردار کیلئے مصری نژاد کینیڈین اداکار مینا مسود کو سائن کیا ہے لوگوں کا خیال ہے کہ مینا مسود کے چہرے کےخدوخال اور خصوصاً ان کی مسکراہٹ الہٰ دین سے بے حد مشابہ ہے لہٰذا وہ اس کردار کیلئے بالکل صحیح انتخاب ہیں۔
جبکہ فلم کی ہیروئن جیسمین کیلئے برطانوی اداکارہ نومی اسکاٹ کو سائن کیا گیا ہے، نومی پنک پاور رینجرز کے کردار کیمبرلی ہارٹ میں بھی اپنی صلاحیتوں کا جادو جگاچکی ہیں اور بہت حد تک جیسمین سے ملتی ہیں۔
فلم کا سب سے اہم ’’جینی‘‘ کا کردار ہالی ووڈ کے نامور اداکار ول اسمتھ نبھائیں گے، مداح ان کا نام سن کر بے حد خوش ہیں اور لوگوں کا خیال ہے کہ ول اسمتھ جینی کا مزاحیہ کردار نبھانے کیلئے ڈزنی کا بالکل صحیح انتخاب ہیں۔
