احتساب عدالت نے جعلی اکاؤنٹس کیس میں آصف زرداری اور فریال تالپور سمیت تمام ملزمان کو 22 جولائی تک دوبارہ پیش کرنے کا حکم دے دیا۔
احتساب عدالت میں منی لانڈرنگ ریفرنس کی سماعت ہوئی جس میں سابق صدر آصف زرداری اور فریال تالپور پیش ہوئے۔
انور مجید کی عدم منتقلی پر سیکرٹری داخلہ سندھ اور جیل سپرنٹنڈنٹ ملیر عدالت میں پیش ہوئے۔ جیل سپرنٹنڈنٹ نے ملزم کی عدم منتقلی پر شوکاز کا تحریری جواب جمع کرایا جبکہ نیب نے 3 ملزمان کی درخواست بریت پر جواب کیلئے وقت مانگ لیا۔
عدالت پیشی کے موقع پر رکن صوبائی اسمبلی فریال تالپور خواتین پولیس اہلکاروں پر برہم ہوگئیں۔ انہوں نے کہا کہ میں یہاں عدالت سے بھاگ کر کہاں جاؤں گی؟ آپ یہاں سے اُٹھیں اور سسی پلیجو کو بیٹھنے دیں۔ فریال تالپور کے کہنے پر خاتون پولیس اہلکار نشست سے اُٹھ گئی۔