اسلام آباد: وزیراعظم عمران خان کا کہنا ہے کہ پاکستان کشمیریوں کے حقوق کے لئے ہر حد تک جائے گا۔
غیر ملکی خبر رساں ادارے کو انٹریو دیتے ہوئے وزیراعظم عمران خان کا کہنا تھا کہ جب سے ہماری حکومت آئی ہے ہم نے اس بات کو یقیینی بنایا ہے کہ مذہب سے بالا تر ہوکر ہر پاکستانی کو اس کے حقوق دئیے جائیں، ہم نے سکھوں کے جذبات کو مدنظر رکھتے ہوئے کرتارپور راہداری کھولنے کا فیصلہ کیا جب کہ بھارت اقلیتوں کو بھارتی شہری ہونے کے بنیادی حقوق سے محروم رکھتا ہے۔
وزیراعظم نے کہا کہ خراب معیشت کو سہارا دینے کے لیے قرضہ لینا پڑتا ہے، اس کے بعد ہی آمدن کو بڑھایا جاسکتا ہے، اصلاحات کرنے میں وقت لگتا ہے، ہمارے 13 ماہ کی حکومت میں ایک بھی کرپشن اسکینڈل سامنے نہیں آیا، جب میرے 5 سال مکمل ہوجائیں گے تو عوام دیکھے گی کہ یہ آخری آئی ایم ایف پیکج ہے جو پاکستانی حکومت لے گی۔
وزیراعظم کا کہنا تھا کہ جوہری تنازعہ کا نتیجہ ناقابل تصور ہے اور اگر جوہری سے لیس دو ریاستیں ایک دوسرے کے خلاف جنگ میں داخل ہوجائیں تو کچھ بھی ممکن ہے، پاکستان اور بھارت کے مابین ایٹمی جنگ سے عالمی برادری سنگین نتائج سے خبردار رہے، پاکستان ایسی قوم ہیں جو آخری سانس تک لڑے گی، کوئی سمجھدار شخص ایٹمی جنگ کی بات نہیں کرسکتا جب کہ پاکستان کشمیریوں کے حقوق کے لئے ہر حد تک جائے گا اور برے وقت میں چین ہمارا سب سے بہترین دوست ثابت ہوا ہے۔