ایمز ٹی وی (مانیٹرنگ ڈیسک) غیر ملکی خبر رساں ادارے کی رپورٹ کے مطابق سعودی عرب کی عدالتوں میں والدین کی نافرمانی پر سخت سزائیں دی جاتی ہیں کیونکہ سعودیہ میں شریعت کی تعلیمات کے مطابق قوانین رائج ہیں۔ سزائوں کا تعین والدین کی نافرمانی کے جرم کی سنگینی کی بنیاد پر کیا جاتا ہے۔ سعودی عرب کی وزارت انصاف کے سالانہ اعدادوشمار کے مطابق گزشتہ سال کے دوران عدالتوں میں والدین کی نافرمانی کے 260 مقدمات درج ہوئے۔ والدین کی نافرمانی کے کیسز عموما والدین ہی کی جانب سے دائر کئے جاتے ہیں مگر کئی بار ایسا بھی دیکھنے میں آیا ہے کہ عوام میں سے کسی نے بچوں کا طرز عمل دیکھ کر حکام سے شکایت کی ہو۔ والدین کی نافرمانی کی نوعیت کو دیکھتے ہوئے نافرمان اولاد کو بزرگوں کی تیمارداری، میتوں کو غسل دینے یا قبریں کھودنے کی لازمی سزائیں دی جاتی ہیں۔