ایمز ٹی وی (لاہور) لاہور کی مقامی عدالت نے آٹھویں جماعت کی چودہ سالہ طالبہ کے ساتھ اجتماعی زیادتی کے الزام میں گرفتار عدنان ثناءاللہ بلال سمیت آٹھ ملزمان کو مزید دو روزہ جسمانی ریمانڈ پر پولیس کے حوالے کر دیا۔
پولیس تھانہ ریس کورس نے گرفتار ملزمان کو بدھ کے روز عدالت کے رو برو پیش کیا اور عدالت سے استدعا کرتے ہوئے مؤقف اختیار کیا کہ ملزمان سے کیس کے اصل حقائق جاننے کے لئے انہیں مزید جسمانی ریمانڈ پر حوالے کیا جائے۔
واضح رہے کہ ملزمان نے چودہ سالہ آٹھویں جماعت کی طالبہ کو اس کے گھر کے سامنے سے اغواء کر کے اسے مقامی گیسٹ ہاﺅس لے جاکر اجتماعی زیادتی کا نشانہ بنایا تھا، پولیس تھانہ ریس کورس نے ملزمان کے خلاف ایف آئی آر میں زیادتی کی دفعات کے ساتھ اغواء کی دفعات بھی شامل کرلی ہے۔ عدالت نے پولیس کو جسمانی ریمانڈ ختم ہونے پر ملزمان کو دوبارہ عدالت میں پیش کرنے کا حکم دیا ہے۔