ایمزٹی وی(ایجوکیشن) وزیراعلیٰ ہاﺅس نے میٹرک اور انٹر کے سالانہ امتحانات شروع ہونے سے چند ہفتے قبل اعلیٰ ثانوی تعلیمی بورڈ کراچی اور ثانوی تعلیمی بور ڈ کراچی میں عارضی بنیادوں پر3نئی تعیناتیاں کردی ہیں۔یہ تعیناتیاں سنیارٹی کے پیش نظرکی گئی ہیں۔ تفصیلات کے مطابق اعلیٰ ثانوی تعلیمی بورڈ کے نائب ناظم امتحانات محمد زبیر سے قائم مقام ناظم امتحانات کا چارچ واپس لے کرنائب امتحانات زرینہ چوہدری کو قائم مقام ناظم امتحانات مقرر کر دیا ہے اس طرح اسی بورڈ میں ڈپٹی سیکرٹری محمد جعفر سے قائم مقام سیکرٹری کے عہدے کا چارج ڈپٹی سیکرٹری عظیم احمد کو قائم مقام سیکرٹری مقرر کردیا ہے۔ جبکہ ثانوی تعلیمی بورڈ کراچی میں بورڈ کے چیئرمین کی سفارش پر انسپکٹر آف اسکولز سید محمد علی شائق کو قائم مقام سیکرٹری مقرر کر دیا گیا ہے، یہ اسامی حور مظر کو عہدے سے ھٹائے جانے کے بعد خالی ہوئی تھی۔ تینوں تبدیلیوں کا وزیراعلیٰ ہاﺅس کے سیکشن آفیسر بورڈز فاروق بگٹی نے نوٹیفکیشن بھی جاری کر دیا ہے۔ علاوہ ازیں وزیر اعلیٰ ہاﺅس کے ذرائع کے مطابق ہائیکورٹ کے فیصلے کی روشنی میں اعلیٰ ثانوی تعلیمی بورڈ ثانوی تعلیمی اور سندھ کے دیگر بورڈز میں آئندہ ہفتے تلاش کمیٹی کے ذریعے مستقل ناظم امتحانات اور سیکرٹریز کی تقرری کا سلسلہ شروع ہو جائے گا اور یہ تمام تقرریاں شفاف اور میرٹ پر کی جائیں گی۔