ایمز ٹی وی (انٹرٹینمنٹ) ہندو انتہا پسند تنظیم شیو سینا نے معروف پاکستانی گلوکار راحت فتح علی خان کے کنسرٹ کے بینر پھاڑ دیئے اور کنسرٹ منسوخ کرنے کی دھمکیاں دیں۔
بھارتی انتہا پسند ہندو مسلمان اور پاکستان دشمنی میں کسی بھی حد تک جانے سے گریز نہیں کرتے یہی وجہ ہے کہ وہ پاکستانی فنکاروں اور گلوکاروں کے بھارتی سرزمین پر کنسرٹ منسوخ کروانے کے لیے اوچھے ہتھکنڈے آزماتے رہتے ہیں تاہم اب انہوں نے پاکستانی گلوکار راحت فتح علی خان کے کنسرٹ کے خلاف اوچھی حرکتیں شروع کردی ہیں۔
میڈیا رپورٹس کے مطابق راحت فتح علی خان کا بھارتی شہر احمد آباد میں 30 اپریل کو کنسرٹ منعقد کیا جارہا ہے جس کے لیے شہر میں اشتہاری مہم شروع کی گئی تھی جس پر ہندو انتہا پسند تنظیم شیوسینا نے شہر میں پاکستانی گلوکار کے بینر اور اشتہاری پینا فلیکس پھاڑ دیئے اور کنسرٹ منسوخ کرنے کی دھمکیاں دیں۔ واضح رہے کہ ہندو انتہا پسند تنظیم شیوسینا کی دھمکیوں کے باعث معروف غزل گائیک استاد غلام علی کا کنسرٹ کئی بار منسوخ کیا جاچکا ہے۔