ایمزٹی وی(روالپنڈی)چیف آف آرمی اسٹاف جنرل راحیل شریف نے 9 دہشت گردوں کی سزائے موت کی توثیق کر دی ہے۔ پاک فوج کے تعلقات عامہ کے ادارے (آئی ایس پی آر) کی جانب سے جاری ہونے والے بیان میں بتایا گیا ہے کہ ان دہشت گردوں کو سیکیورٹی اہلکاروں اور عام شہریوں کے خلاف دہشت گردانہ کارروائیاں ثابت ہونے پر فوجی عدالت سے سزائے موت سنائی گئی۔

آئی ایس پی آر کے مطابق سزائے موت پانے والے دہشت گردوں میں فضل حق ولد شاہ داد، فضل الرحمان ولد فضل کریم، رحمت سعید ولد اسماعیل خان، بخت ولی ولد عمل خان، نذیر احمد ولد اللہ داد، زاہد خان ولد کتاب شاہ، عمر سعید ولد حضرت سعید اور جاوید خان ولد فقیر گل شامل ہیں۔ یہ تمام دہشت گرد مختلف سنگین جرائم میں ملوث تھے۔

آئی ایس پی آر کے مطابق عمر سعید سیکیورٹی فورسز پر حملوں میں ملوث تھا جبکہ ساجد ولد ابراہیم خان نے پشاور ائیرپورٹ پر پی آئی اے کے طیارے میں فائرنگ کر کے ایک خاتون کو ہلاک اور 2 مسافروں کو زخمی کیا تھا۔ دہشت گرد فضل حق کالعدم تحریک طالبان کا سرگرم کارکن تھا جس نے 4 پولیس اہلکاروں کو اغواءکر کے ان کے ہاتھ کاٹے تھے۔

آئی ایس پی آر کے مطابق دہشت گرد فضل الرحمان نے میجر احسان سمیت دیگر جوانوں کو شہید کیا تھا۔ واضح رہے کہ فوجی عدالتوں سے اب تک دہشت گردی کے 197 مقدمات کا فیصلہ آیا ہے ۔