ایمزٹی وی(اسلام آباد)الیکشن کمیشن نے بلدیاتی انتخابات کے تمام مراحل مکمل ہونے تک حکومت کو کسان پیکج کے تحت کاشتکاروں کو امدادی رقم دینے سے روک دیا۔ چیف الیکشن کمیشن سردار رضا محمد خان کی سربراہی میں الیکشن کمیشن کے ارکان نے حکومت کی جانب جاری کسان پیکیج کے خلاف درخواست کی سماعت کی، الیکشن کمیشن نے اپنے فیصلے میں کسان پیکیج کی 3 میں سے 2 شقوں پر عملدرآمد کی اجازت دے دی تاہم بلدیاتی انتخابات کے تیسرے مرحلے کی تکمیل تک حکومت کو ساڑھے 12 ایکڑ سے کم زمین رکھنے والے کسانوں کو امدادی رقم دینے سے روک دیا گیا ہےجبکہ الیکشن کمیشن نے اپنے فیصلے میں کاشتکاروں کے لئے قرضوں کی فراہمی پر سودمیں کمی اور پیداوار میں اضافے کیلئے امدادی رقم دوگنا کرنے کی اجازت دے دی ہے۔