ایمزٹی وی (لوئردیر)وزیر اعظم نواز شریف نے لواری ٹنل کا افتتاح کردیا۔ لواری ٹنل کے افتتاح کی تقریب سے خطاب کرتے ہوئے وزیراعظم نواز شریف کا کہنا تھا کہ پاناما کیس کی تحقیقات کرنیوالی جے آئی ٹی پر شدید تنقید کی، تاہم سرکاری ٹی وی نے ان کی تقریر کا یہ حصہ نشر نہیں کیا تھا، حذف شدہ حصے میں وزیر اعظم کا کہنا تھا کہ جے آئی ٹی سربراہ واجد ضیا ءنے تحقیقات کے دوران ون مین کمپنی کو جے آئی ٹی تحقیقات کے لئے استعمال کیا، عوام کے خون پسینے کی کمائی سے اپنے لوگوں کو نوازہ گیا۔
تفصیلات کے مطابق وزیر اعظم پاکستان میاں محمد نواز شریف نے لواری ٹنل کے افتتاح کے موقع پر پانامہ کیس کے لئے قائم مشترکہ تحقیقاتی ٹیم پر کھل کر تنقید کی تاہم سرکاری ٹی وی نے وزیر اعظم کی تقریر کا وہ حصہ حذف کرکے تقریر نشر کی۔
وزیراعظم نواز شریف کا کہنا تھا کہ جے آئی ٹی سربراہ نے کزن کو ہیرا پھیری کیلئے استعمال کیا، ایک کمرے کی کمپنی چلانے والے شخص کو 50 لاکھ کا ٹھیکا دیا گیا، عوام کے خون پسینے کی کمائی بے دردی سے لٹائی گئی۔ نواز شریف کا احتساب کرنیوالوں کا بھی سر عام احتساب ہونا چاہئے، جے آئی ٹی میں صادق، امین اور فرشتے بیٹھے ہوتے ہیں، لندن کی کمپنی کا مالک پی ٹی آئی کا رکن ہے، ایسے شخص سے نواز شریف کا احتساب کوئی نہیں مانے گا۔
