ایمزٹی وی (سیاسی) لاہورہائی کورٹ نے این اے 122 کے انتخابی رکارڈ کی جانچ پڑتال کے حوالےسے الیکشن ٹریبونل کے فیصلے کے خلاف اور توہینِ عدالت کےضمن میں اسپیکر قومی اسمبلی سردار ایاز صادق کی دونوں درخواستیں مسترد کر دیں۔ لاہور ہائی کورٹ کے جسٹس اعجازالاحسن نے دونوں درخواستوں کی سماعت کی۔ سردار ایازصادق کے وکلاء خواجہ سعید الظفر اور اسجد سعید نےمؤقف اختیار کیا کہ الیکشن ٹریبونل نے عمران خان کی درخواست پرابتدائی اعتراضات کا فیصلہ نہیں کیا، صرف عمران خان کی شہادتوں پر این اے122 کے ووٹوں کی دوبارہ گنتی، کاؤنٹرفائل اورالیکٹرول رول کے مواز نے کا فیصلہ سنا دیا جبکہ ٹریبونل نے انکی شہادتوں کو قلم بند بھی نہیں کیا. اس پر عدالت نےاستفسارکیا کہ آپ نے کیسے محسوس کر لیا کہ الیکشن ٹریبونل کا فیصلہ آپ کےخلاف ہے۔ ٹریبونل نے ابھی آپکی شہادتیں قلم بند کرنی ہیں۔ اسکے بعد ہی مرکزی کیس کا فیصلہ سنایا جائے گا۔ عدالت نے توہینِ عدالت سمیت دونوں درخواستیں مسترد کر دیں ۔