ایمزٹی وی(لاہور) قومی اسمبلی کے حلقہ این اے 122 کے ضمنی انتخاب کے لئے انتخابی مہم کا آج آخری روز ہے اور حلقے میں سیاسی درجہ حرارت عروج پر پہنچ چکا ہے۔زرائع کے مطابق این اے 122 کے بڑے معرکے کی انتخابی مہم آج رات 12 بجے ختم ہوگی جب کہ انتخابات میں حصہ لینے والی دونوں جماعتیں مسلم لیگ (ن) اور تحریک انصاف کے کارکنوں کی جانب سے حلقے میں جوش و خروش دیکھا جارہا ہے۔ ضمنی انتخاب کے سلسلے میں مسلم لیگ (ن) کے امیدوار ایاز صادق اور تحریک انصاف کے حریف علیم خان کے بینرز جگہ جگہ آویزاں کیے گئے ہیں جب کہ ووٹرز کو اپنی جانب راغب کرنے کے لئے گلیوں، چوراہوں، بازاروں اور کوچوں میں سیاسی پرچم لگائے گئے ہیں اور ساتھ ہی دونوں جماعتوں کے ترانے بھی لاؤڈ اسپیکر پر بجائے جارہے ہیں۔