ایمزٹی وی (ایجوکیشن)محکمہ صحت سندھ نے جناح اسپتال کے ایگزیکیٹوڈائریکٹر ڈاکٹرانیس بھٹی سمیت دیگر 11 ڈاکٹروں کو جناح سندھ میڈیکل یونیورسٹی میں جوائننگ کی ہدایت کردی ہے جبکہ اسپتال کے انتظامی سربراہ کوآتھوپیڈک وارڈ کا پروفیسر مقررکرنے کے احکام جاری کیے ہیں۔
تفصیلات کےمطابق جاری لیٹر میں تکنیکی الفاظ استعمال کرتے ہوئے کہا گیا ہے کہ وہ موجودہ اسامی پر بھی برقرار رہیں گے، واضح رہے کہ جناح سندھ میڈیکل یونیورسٹی نے فیکلٹی کی خالی اسامیوں پر جناح اسپتال کے پروفیسرز سمیت دیگر اسسٹنٹ پرفیسرز اور ڈاکٹروں کو آپشن دیا گیا تھا کہ وہ اپنی ملازمتیں یونیورسٹی میں ضم کرلیں جس پر جناح اسپتال کے ایگزیکیٹوڈائریکٹرپروفیسر انیس بھٹی سمیت دیگر 72 ٹیچنگ کیڈر کے ڈاکٹروں نے جناح یونیورسٹی میں انٹرویو دیئے تھے، انٹرویو میں منتخب ہونے پر یونیورسٹی نے محکمہ صحت کو آگاہ کیا کہ جناح اسپتال کے 72 ڈاکٹروں کو یونیورسٹی میں ضم کئے جانے کی منظوری اور اجازت دی جائے جس پر محکمہ صحت نے جناح اسپتال کے ٹیچنگ کیڈر کے 11 سینئرڈاکٹروں کو یونیورسٹی میں رپورٹ کرنے کا نوٹیفکیشن جاری کردیا ہے۔