راولپنڈی: کاغذ کی قیمت میں 200 فیصد سے زائد اضافہ کے باعث درسی کتب اور تمام اقسام کی اسٹیشنری کی قیمتوں میں بے پناہ اضافہ کر دیا گیا۔

ڈالرکی مسلسل اونچی اڑان کے باعث تمام اقسام کے کاغذ کی قیمت میں 200 فیصد سے زائد اضافہ کے باعث اوپن مارکیٹ میں درسی کتب، کاپیوں، تمام اقسام کی اسٹیشنری، اسکول بیگ، یونیفارم، اسکول شوز کی قیمتوں میں بے پناہ اضافہ کر دیا گیا ہے جبکہ پٹرولیم مصنوعات اور سلنڈر گیس کی قیمت میں اضافہ سے طلبہ طالبات اور سرکاری ملازمین کی پک اینڈ ڈراپ سروس کی تمام ٹرانسپورٹ نے فی سواری 1000 روپے سے 2000 روپے اضافہ کر دیا ہے جس سے والدین کی چیخیں نکلنے لگی ہیں۔

اردو بازار کی ہول سیل مارکیٹ میں دکانداروں نے بتایا ہے کہ تمام اقسام کی درسی کتب کی قیمت میں500 روپے سے 1700 روپے تک جبکہ کاپیوں رجسٹر، رف کاپی کی قیمت میں بھی سو فیصد اضافہ کیا گیا ہے۔

میٹرک کی سائنس پریکٹیکل کاپیوں کی قیمت 2500 روپے سے 3 ہزار روپے تک کر دی گئی، ٹرانسپورٹر نے کہاکہ پٹرول ڈیزل میں یکمشت 35 روپے اضافہ کے باعث کرائے بڑھانا مجبوری تھی۔

لاہور: پاکستان سپرلیگ کے ٹکٹس کی آن لائن فروخت کاآغاز ہوگیا۔

پی سی بی ڈاٹ بک می ڈاٹ پی کے ، ویب سائٹ پر ٹکٹس دستیاب ہیں۔ پی ایس ایل کا آغاز تیرہ فروری سے ہورہاہے۔

ہر میچ کے لئے ٹکٹوں کی قیمت مختلف رکھی گئی ہے۔ لاہور میں جنرل اسٹینڈ کی ٹکٹس ساڑھے چھ سے بارہ سو روپے تک کی رکھی گئی ہے۔
کراچی اورملتان میں جنرل اسٹینڈز کا ٹکٹس 650 سے 1000 تک ہوگا۔

لاہور کے ہاسپٹیلٹی بکس کی ٹکٹ دس سے اٹھارہ ہزار مقرر کی گئی ہے ۔ کراچی میں ہاسپٹیلٹی باکس کی ٹکٹس کی قیمت دس سے پندرہ ہزار روپے میں دستیاب ہے۔

ملتان کے ہاسپٹیلٹی باکس کی قمیت بارہ سے اٹھارہ ہزار روپے ہے۔راولپنڈی میں پرئمیم ٹکٹس ایک ہزار سے پچیس سو روپے جبکہ پلاٹینم بکس کی قیمت بارہ ہزار سے اٹھارہ ہزار تک ہوگی۔

اس بار چاروں شہروں میچز کے لیے سیزن ٹکٹس بھی متعارف کروائے گئے ہیں۔ پی سی بی نے اس بار میچ کے دوران فینز کی آسانی کے لیے ٹکٹ بوتھ بنانے کا بھی اعلان کیاہے۔

قومی ٹیم کے فاسٹ بولر شاہین آفریدی نکاح کیلئے اہل خانہ کے ہمراہ کراچی پہنچ گئے۔

شاہین آفریدی کا نکاح کل بروز جمعہ 3 فروری کو سابق کپتان شاہد آفریدی کی بیٹی انشا آفریدی سے ہوگا۔

اس حوالے سے خاندانی ذرائع کا کہنا ہے کہ شاہین آفریدی اور انشاکا ابھی نکاح ہو رہا ہے جب کہ رخصتی بعد میں ہوگی۔

اب رپورٹس سامنے آئی ہیں شاہین اور انشا کے نکاح کی تیاریاں شروع ہوچکی ہیں جس کے لیے شاہین اہلخانہ کے ہمراہ کراچی پہنچ گئے ہیں۔

دوسری جانب سوشل میڈیا پر شاہین کی شادی کا کارڈ بھی وائرل ہورہا ہے تاہم اس حوالے سے خاندانی ذرائع کی جانب سے کوئی تصدیق نہیں کی گئی ۔

کراچی: پاکستان کرکٹ ٹیم کے سابق کپتان اوردنیا بھر میں فٹنس کے لیے مقبول شعیب ملک نے اب تک ریٹائر نہ ہونے کی وجہ بتا دی۔

حال ہی میں بنگلادیش پریمیئر لیگ (بی پی ایل) میں رنگپور رائیڈرز کی طرف سے کھیلنے والے پاکستانی آل راؤنڈر نے کہا کہ ’میرا یقین کریں حالانکہ میں ٹیم میں عمر میں سب سے بڑا ہوں، آپ میری فٹنس کا 25 سالہ کھلاڑی سے موازنہ کر سکتے ہیں‘۔

بی پی ایل کے دوران گفتگو کرتے ہوئے انہوں نے کہا کہ ’میں کرکٹ کھیلتا رہوں گا اور اسی لیے میں ریٹائرمنٹ کے بارے میں سوچ بھی نہیں رہا‘۔

واضح رہے کہ گزشتہ روز اپنی 41 ویں سالگرہ منانے والے شعیب ملک نے ٹیسٹ ڈیبیو 2001 میں بنگلادیش کے خلاف کیا تھا۔

اس کے علاوہ ون ڈے ڈیبیو 1999 میں ویسٹ انڈیز کے خلاف اور ٹی ٹوئنٹی ڈیبیو 2006 میں کیا تھا۔شعیب ملک نے پاکستان ٹیم میں آخری ٹیسٹ میچ 2015 جب کہ آخری ون ڈے 2019 اور آخری ٹی ٹوئنٹی میچ 2021میں کھیلا تھا۔

کراچی: صوبائی وزیر تعلیم و ثقافت سندھ سید سردار علی شاہ سے زوم پاکستان کی کنٹری ڈاریکٹر حانا صدیقی اور ڈی ٹیک کے سی ای او عدیل دایو نے ان کے آفیس میں ملاقات کی۔

زوم پاکستان کی کنٹری ڈاریکٹر حانا صدیقی نے صوبائی وزیر تعلیم کو بتایا کہ زوم پاکستان نے آن لائن کلاسز کے لیے زوم پاکستان کی طرف سے 21680 مفت لائسنس جاری کردیے ہیں۔ جس کو ورچوئل تعلیم خاص طور پر فنی تعلیم، کانفرنس اور میٹنگ کے مقاصد کے لیے استعمال کیا جا سکے گا انہوں نے کہا کہ مفت لائسنس کے اجراء کے لیے ڈی ٹیک کا تعاون حاصل رہا ہے۔

انہوں نے کہا کہ زوم کے صارفین کی تعداد میں تیزی سے اضافہ ہوا ہے۔ زیادہ سے زیادہ پیشہ ور افراد جو گھر سے کام کرتے ہیں یا ایسے طالب علم جو آئین لائین تعلیم حاصل کرنا چاہتے ہیں زوم انہیں یہ سہولت مفت مہیا کرے گا۔ صوبائی وزیر تعلیم سندھ سید سردار شاہ نے کہا محکمہ تعلیم سندھ تعلیم کی ترقی کے لئے روایتی طریقوں کے ساتھ ڈسٹینس لرننگ یا آن لائین ایجوکیشن کے سلسلے میں مختلف منصوبوں پر بھی کام کر رہا ہے۔

ہم ایسے آن لائین پلیٹ فارمز مہیا کرنے کا ارادہ رکھتے ہیں جہاں سے طالب علموں کو آن لائن لیکچرز اور سلیبس حاصل کرنے میں آسانی سے مل سکے۔ کرونا وبا کے دوران آئین لرننگ کا رجھان پیدا ہوا محکمہ تعلیم نے زوم اور دیگر آن لائین پلیٹ فارم کی مدد سے تدریس و تربیت کا سلسلہ جاری رکھا۔ صوبائی وزیر تعلیم سندھ نے زوم اور ڈی ٹیک کے اقدامات کو سراہا اور مل کر کام کرنے کی یقین دہانی کروائی۔

کراچی: جامعہ کراچی نےجعلی مارکس شیٹ جمع کرانے کی بناء پرمارننگ پروگرام کےطالبعلم کا داخلہ منسوخ کردیا۔

انچارج ڈائریکٹوریٹ آف ایڈمیشنز جامعہ کراچی ڈاکٹر صائمہ اختر کے مطابق بورڈ آف انٹرمیڈیٹ ایجوکیشن کراچی سے تصدیق کرانے پرمارننگ پروگرام داخلے برائے سال 2023 ء کے شعبہ ایگریکلچر اینڈ ایگری بزنس مینجمنٹ کےطالبعلم فہد رسول ولد رسول بخش فارم نمبر632367 کی مارکس شیٹ جعلی ثابت ہوئی جس کی بناء پر ان کا داخلہ فوری طور پر منسوخ کردیاگیاہے۔

اسلام آباد : کوئٹہ گلیڈی ایٹرز اور پشاور زلمی کےدرمیان 5 فروری کو ہونے والے نمائشی میچ کے حوالے سے اسکواڈز کو حتمی شکل دےدی گئی۔

ذرائع کے مطابق نمائشی میچ کیلئے بابراعظم پشاور زلمی کی اور سرفراز احمد کوئٹہ گلیڈی ایٹرز کی کپتانی کریں گے، پشاور زلمی اور کوئٹہ گلیڈی ایٹرز میں دیگر فرنچائزز کے کھلاڑیوں کو بھی شامل کیا گیا ہے۔

پشاور زلمی کا اسکواڈ
پشاور زلمی کے اسکواڈ میں شاہد آفریدی، وہاب ریاض، حسیب اللہ، دانش عزیز ، محمد حارث، اعظم خان، حیدرعلی، عامر ممال اور اسامہ میر شامل ہیں جب کہ صفیان مقیم، سلمان ارشاد، صائم ایوب اور عثمان قادر بھی نمائشی میچ میں پشاورزلمی کی نمائندگی کریں گے۔

کوئٹہ گلیڈی ایٹرز کا اسکواڈ
دوسری جانب کوئٹہ گلیڈی ایٹرز کے اسکواڈ میں عمراکمل، بسم اللّٰہ خان، سعودشکیل، احسن علی، نسیم شاہ، افتخار احمد، محمد نواز، محمد حسنین، خوشدل شاہ، عبدالواحد بنگلزائی، عمیدآصف، عمیربن یوسف اور اعمل خان شامل ہیں۔

نمائشی میچ میں کوئٹہ گلیڈی ایٹرز کے معین خان اور پشاورزلمی کے لیے کامران اکمل ہیڈکوچ ہوں گے، انضمام الحق پشاورزلمی کے ڈگ آؤٹ میں بطور مینٹور دکھائی دیں گے۔

بنگلہ دیش پریمیئر لیگ میں چند کھلاڑیوں کی شمولیت کے باعث دونوں فرنچائز کے اسکواڈز 14 ، 14 ممبران پر مشتمل ہے۔

واضح رہے کہ کوئٹہ گلیڈ ی ایٹرز اور پشاور زلمی کے درمیان نمائشی میچ 5 فروری کو بگٹی اسٹیڈیم کوئٹہ میں کھیلا جائےگا۔

کراچی: کورنگی کے نجی اسکول میں طالبعلم کے ساتھ تشددکےمعاملےپر محکمہ تعلیم سندھ نے ایکشن لے لیا۔

ڈائریکٹوریٹ کی تین رکنی کمیٹی نے انکوائری کے بعد رپورٹ پیش کردیا۔

کتاب نہ کھولنے پر کم عمر طالب علم کو بدترین تشدد

انکوائری مکمل ہونے پر محکمہ تعلیم سندھ نےنجی اسکول کی رجسٹریشن معطل اور 25ہزار جرمانہ عائد کردیا ہے۔

واضح رہےوزیر تعلیم و ثقافت سندھ سید سردار علی شاہ نے واقعے کا نوٹس لے کر انکوائری کے احکامات جاری کیئے تھے۔

ڈھاکا: بنگلہ دیش پریمیئر لیگ( بی پی ایل) میں شریک پاکستانی کرکٹرکو ایونٹ کھیلنے کی مشروط اجازت مل گئی۔

میڈیا رپورٹس کے مطابق پاکستان سپر لیگ (پی ایس ایل) کھیلنے والے وہ قومی کرکٹرز جو 5 فروری کے نمائشی میچ کا حصہ نہیں ہیں انہیں 8 فروری تک لیگ کھیلنے کی اجازت دیدی گئی ہے تاہم نمائشی میچ کھیلنے والے تمام کھلاڑیوں کو 2 فروری تک طلب کرلیا گیا ہے۔

قبل ازیں پی سی بی مینجمنٹ کمیٹی کے چیئرمین نجم سیٹھی نے بنگلہ دیش پریمئیر لیگ میں شریک کرکٹرز نمائشی میچ شرکت کیلئے وطن واپس آجائیں تاہم کچھ کرکٹرز نے معذرت کرلی تھی جس پر تمام کھلاڑیوں کی درخواست مسترد کردی گئی تھی اور کہا گیا تھا کہ ملک کی خاطر غیرملکی لیگ چھوڑنی پڑے گی۔

تاہم پی سی بی نے واپس بلانے کی پالیسی کا از سر نو جائزہ لیا جس کے بعد فیصلہ کیا گیا کہ پی ایس ایل نہ کھیلنے والے کرکٹرز پر وطن واپسی کی کوئی پابندی نہیں ہوگی۔

واضح رہے کہ پاکستان سپر لیگ کے 8 ویں ایڈیشن کے میچز 13 فروری سے شروع ہوں گے جبکہ کوئٹہ گلیڈی ایٹرز اور پشاور زلمی کے مابین نمائشی میچ 5 فروری کو بلوچستان کے بگٹی کرکٹ اسٹیڈیم میں کھیلا جائے گا۔

ویب ڈیسک : ٹوئٹر کی جانب سے سوشل میڈیاپلیٹ فارم پر پیمنٹ فیچر متعارف کرانے کے منصوبے پر پیشرفت کی گئی ہے۔

فنانشنل ٹائمز کی ایک رپورٹ میں کمپنی ذرائع کے حوالے سے بتایا گیا کہ ٹوئٹر کے سی ای او ایلون مسک ٹوئٹر کی آمدنی میں اضافے کے لیے نئے منصوبوں پر کام کررہے ہیں۔

رپورٹ کے مطابق پیمنٹ سروسز کو ایپ کا حصہ بنانے کے لیے ٹوئٹر کی جانب سے امریکا میں ریگولیٹری لائسنس کے حصول پر کام کیا جارہا ہے۔

اس سے قبل ٹوئٹر نے نومبر 2022 میں پیمنٹ سروسز کے لیے امریکی محکمہ خزانہ میں رجسٹریشن کرائی تھی اور اب لائسنس کے حصول کے لیے کام کیا جارہا ہے۔

رپورٹ میں بتایا گیا کہ کمپنی کو توقع ہے کہ لائسنس کا عمل ایک سال کے اندر مکمل ہوجائے گا۔
خیال رہے کہ ایلون مسک نے نومبر 2022 میں پیمنٹ سسٹم کو ٹوئٹر کا حصہ بنانے پر بات کی تھی۔

اس موقع پر ان کا کہنا تھا کہ ٹوئٹر کا پیمنٹ سسٹم بینک اکاؤنٹس اور ڈیبٹ کارڈ سے منسلک ہوگا۔

ایلون مسک نے کہا کہ ٹوئٹر بلیو سبسکرپشن پلان سے صارفین اس پلیٹ فارم کو پیمنٹس کے لیے استعمال کرسکیں گے اور ایک دوسرے کو رقوم بھیج سکیں گے۔

انہوں نے مزید بتایا کہ صارفین اپنے بینک اکاؤنٹس کو ٹوئٹر سے لنک کرسکیں گے اور اگلے مرحلے میں ہم انہیں زیادہ فیچرز فراہم کریں گے جبکہ ڈیبٹ کارڈز اور چیکس کا اضافہ بھی کیا جائے گا۔ایلون مسک معروف سروس پے پال کے شریک بانی بھی رہے ہیں اور انہیں اس طرح کے پیمنٹ سسٹم کے بارے میں کافی کچھ معلوم ہے۔

اگر یہ منصوبہ کامیاب ہوتا ہے تو یہ ایلون مسک کی جانب سے ٹوئٹر کو سپر ایپ میں تبدیل کرنے کے حوالے سے پیشرفت ہوگی۔

وہ کافی عرصے سے ٹوئٹر کو ایک سپر ایپ میں تبدیل کرنے کی بات کررہے ہیں جہاں صارفین کو ایک ہی جگہ ای کامرس، فنانس اور دیگر سروسز مل سکیں۔