دبئی: انٹرنیشنل کرکٹ کونسل( آئی سی سی) نےمینزٹیسٹ ٹیم آف دی ایئر 2022 کا اعلان کردیا۔

آئی سی سی نے مینز ٹیسٹ ٹیم آف دی ایئر 2022 میں پاکستان ٹیم کے کپتان بابر اعظم کو بھی شامل کیا ہے جو ٹیسٹ ٹیم آف دی ائیر میں شامل واحد پاکستانی بیٹر ہیں۔

ٹیسٹ ٹیم آف دی ایئر 2022 میں آسٹریلیا کے عثمان خواجہ، مارنوس لبوشین،ویسٹ انڈیز کے بریتھ ویٹ اور انگلش کھلاڑی جونی بئیرسٹو شامل ہیں۔

ٹیسٹ ٹیم آف دی ایئر کیلئے بھارت کے ریشبھ پنت، آسٹریلیا کے پیٹ کمنز، جنوبی افریقا کے کگیسو ربادا، آسٹریلیا کے نیتھن لیون اور انگلش کھلاڑی جیمز اینڈرسن بھی ٹیم کا حصہ ہیں۔

لاہور کے علاقے ڈیفنس میں نجی اسکول کی طالبہ پر تشدد کرنے والی 3 طالبات کی ضمانت قبل از گرفتاری کی درخواست منظور کر لی گئی ہے۔

نجی اسکول کی طالبہ پر کیس میں ایڈیشنل سیشن جج نے ضمانت قبل از گرفتاری کی درخواستوں پر سماعت کی۔

سماعت کے دوران عدالت نے ڈیفنس اے پولیس کو 3 طالبات کی 50، 50 ہزار کے مچلکوں کے عوض عبوری ضمانتیں منظور کرتے ہوئے طالبات کو 30 جنوری تک گرفتار کرنے سے روک دیا۔

خیال رہے کہ ڈیفنس کے نجی اسکول میں نشےسےمنع کرنے پرطالبہ کو ساتھی لڑکیوں نے تشدد کا نشانہ بنایا تھا جس کی ویڈیو سوشل میڈیا پر منظرِ عام پر آئی تھی۔

پولیس نے متاثرہ بچی کے والد کی مدعیت میں مقدمہ درج کیا تھا۔

تھانہ ڈیفنس میں درج ایف آئی آر میں مدعی عمران نے موقف اپنایا ہے کہ اس کی بیٹی کو کلاس فیلو جنت، اس کی بہن کائنات، عمائمہ اور نور رحمان نے تشدد کا نشانہ بنایا۔

لاہور: ٹی ٹوئنٹی ورلڈکپ2023 میں پاک بھارت مقابلہ امریکا میں ہونے کا امکان ہے۔

آئندہ سال آئی سی سی ٹی ٹوئنٹی ورلڈکپ میں پاکستان اور بھارت کا مقابلہ امریکا میں شیڈول کیے جانے کا قوی امکان ہے۔

واضح رہے کہ میگا ایونٹ کا ویسٹ انڈیز بھی مشترکہ میزبان ہے۔

پشاور: بچوں کے حقوق سے متعلق قومی کمیشن کی چیئرپرسن افشاں تحسین نےپشاورکے ماڈل اسکول میں طلبہ پر تشددکانوٹس لے لیا۔

واقعے کی شدید مذمت کرتے ہوئے قومی کمیشن کی چیئرپرسن افشاں تحسین نے کہا ہے کہ ، "ہم اس واقعے کے خلاف کارروائی کر رہے ہیں۔ خیبر پختونخوا میں بچوں کے تحفظ کا قانون جسمانی سزا کا احاطہ کرتا ہے اور اس معاملے میں متعلقہ پولیس کے ساتھ فالو اپ کیا جائے گا۔"

تحسین نے مزید کہا کہ ایسے واقعات سے بچنے کے لیے قانون کا وجود اور اس پر عمل درآمد ضروری ہے لیکن "والدین کے لیے ایسے مسائل کے حوالے سے آگاہی بھی بہت ضروری ہے"۔

این سی آر سی کے چیئرپرسن نے کہا، "اسکولوں میں بچوں کے تحفظ کی کمیٹیوں کو یقینی بنایا جانا چاہیے اور والدین کو بھی یہ مطالبہ کرنا چاہیے۔"

انہوں نے اس بات پر اعتراف کیاکہ "کے پی میں جسمانی سزا سے متعلق کوئی خاص قانون موجود نہیں ہے"۔
انہوں نے اس معاملے پر ٹھوس قانون سازی کی ضرورت پر زور دیتے ہوئے کہا، "این سی آر سی نے ماضی میں دو بار حکومت کے متعلقہ محکمے کو لکھا ہے۔ ہم اس معاملے پر دوبارہ پیروی کریں گے۔"

انہوں نے مزید کہا کہ کے پی میں ایسے واقعات کے خلاف کارروائی صرف شکایت کنندگان جیسے والدین یا متعلقہ سرکاری محکمے بشمول کمیشن بچوں کے تحفظ کے قانون میں مذکور جسمانی سزا کے پہلو کی بنیاد پر کر سکتے ہیں۔

بچوں کے حقوق پر کام کرنے والے وکیل اور انیشی ایٹر ہیومن ڈویلپمنٹ فاؤنڈیشن کے صدر رانا آصف حبیب نے کے پی کے بچوں کے تحفظ کے قانون میں جسمانی سزا کی سرسری کوریج کے بارے میں بات کی۔

انہوں نے کہا، "سندھ واحد صوبہ تھا جس نے 2016 میں جسمانی سزا کے لیے ممانعت کا قانون متعارف کرایا، جس کے بعد آزاد جموں و کشمیر، گلگت بلتستان اور وفاقی سطح پر قانون سازی کی گئی۔"

پشاور: پشاور کے ماڈل اسکول میں طلبہ پرتشددکی وڈیووائرل ہوگئی۔

وڈیو میںا ستاد کو کلاس روم میں اپنے طالب علموں پر حملہ کرتے ہوئے دیکھا جاسکتا ہے۔ طالب علموں میں سے ایک کونے میں کھڑے طالبعلم کو تشددکا نشانہ بنایاجارہاہے، جبکہ دوسرا بظاہر میز پر بیٹھا ہوا ہے ۔

اس حوالے سے اسکول انتظامیہ کاکہنا ہے کہ وہ ٹیچر کے خلاف کارروائی کرے گی۔ "ہم بچوں کے خلاف تشدد کو برداشت نہیں کریں گے۔ واقعہ کی تفتیش جاری ہے۔" دریں اثنا، پشاور پولیس کا کہنا ہے کہ انہوں نے نہ تو وائرل ہونے والی ویڈیو دیکھی ہے اور نہ ہی یہ ان کے علم میں آئی ہے۔

پولیس نے یہ بھی کہا کہ اس سلسلے میں طالب علموں کے والدین یا ان کے اساتذہ سے کوئی رابطہ نہیں کیا گیا۔

مقامی پولیس نےمیڈیا کو بتایا کہ وہ اس واقعے کے خلاف "جب تک شکایت درج نہیں کرائی جاتی" کوئی کارروائی نہیں کر سکتے۔

اسلام آباد:  وفاقی دارالحکومت اسلام آباد اور خیبر پختونخوا کے مختلف شہروں میں زلزلے کے جھٹکے محسوس کیے گئے۔

زلزلے کے جھٹکے شبقدر، پشاور، نوشہرہ،مردان، سوات،کوہاٹ، صوابی، لوئر دیر، بنوں اور چار سدہ میں بھی محسوس کیے گئے۔

زلزلہ پیما مرکز کے مطابق زلزلے کا مرکز چترال کے مغرب میں 237 کلومیٹر کےفاصلے پر تھا، زلزلے کی شدت 5.6 اور زیر زمین گہرائی 190 کلو میٹر ریکارڈ کی گئی۔

زلزلے کے باعث تاحال کسی قسم کے جانی و مالی نقصان کی اطلاعات موصول نہیں ہوئی ہیں۔

کراچی: جامعہ کراچی کے تحت شعبہ کمپیوٹرسائنس بی ایس ایس ای/ بی ایس سی ایس اوراپلائیڈ فزکس کا داخلہ ٹیسٹ22 جنوری کو ہوگا۔

انچارج ڈائریکٹوریٹ آف ایڈمیشنز جامعہ کراچی ڈاکٹر صائمہ اخترکے مطابق ایوننگ پروگرام میں داخلے برائے سال 2023 ء کے لئے شعبہ کمپیوٹرسائنس بی ایس ایس ای/ بی ایس سی ایس اوراپلائیڈ فزکس کا داخلہ ٹیسٹ22 جنوری2023 ء کو منعقدہوگا۔

تمام امیدواروں کے ایڈمٹ کارڈ ان کے پورٹل پر اَپ لوڈ کردیئے گئے ہیں جس پر رپورٹنگ ٹائم امتحانی مرکزاور کمرہ امتحان کا نمبردرج ہے۔طلبہ اپنے ایڈمٹ کارڈ اپنے پورٹل سے پرنٹ کرسکتے ہیں۔ امتحانی مرکز اور مقررہ وقت کی تفصیل ایڈمٹ کارڈ پر موجودہے۔علاوہ ازیں طلبہ کو بذریعہ ایس ایم ایس اور ای میل بھی آگاہ کردیاگیاہے۔علاہ ازیں ایسے طلباوطالبات جنہوں نے ان شعبہ جات کے مارننگ پروگرام کے داخلوں کے لئے ہونے والے داخلہ ٹیسٹ میں 50 یا اس سے زائد نمبرز حاصل کئے ہیں انہیں دوبار ہ داخلہ ٹیسٹ دینے کی ضرورت نہیں ہے

۔مارننگ پروگرام کے داخلہ ٹیسٹ میں حاصل کردہ نمبرز کی بنیاد پر ہی ایوننگ پروگرام میں داخلہ دیاجائے گا۔ ایوننگ پروگرام کی حتمی داخلہ فہرست 26 جنوری 2023 ء کو جاری کی جائے گی۔واضح رہے کہ صرف ان امیدواروں کا داخلہ ٹیسٹ ہوگا جنہوں نے شعبہ کمپیوٹرسائنس بی ایس ایس ای/ بی ایس سی ایس اوراپلائیڈ فزکس کا انتخاب کیا ہے،اس کے علاہ تمام شعبہ جات میں اوپن میرٹ کی بنیاد پر داخلے دیئے جارہے ہیں۔

کراچی: جامعہ کراچی نےجعلی مارکس شیٹ جمع کرانے کی بناء پرمارننگ پروگرام کے دوطلبہ کے داخلے منسوخ کردیئے۔

انچارج ڈائریکٹوریٹ آف ایڈمیشنز جامعہ کراچی ڈاکٹر صائمہ اختر کے مطابق بورڈ آف انٹرمیڈیٹ ایجوکیشن کراچی سے تصدیق کرانے پرمارننگ پروگرام داخلے برائے سال 2023 ء کے شعبہ جیولوجی بی ایس فرسٹ ایئر کے طالبعلم محمدمعراج ولدمحمد رفیق فارم نمبر627654 اور شعبہ ہسٹری کے عمران ولد رسول بخش فارم نمبر627693کی مارکس شیٹ جعلی ثابت ہوئی جس کی بناء پر ان کے داخلے فی الفور منسوخ کردیئے گئے ہیں۔

کراچی: جناح سندھ میڈیکل یونیورسٹی میں ڈاکٹرآف فزیکل تھراپی(ڈی پی ٹی) میں داخلے کیلئے ٹیسٹ کا انعقاد کیا گیا۔

جس میں 1200 امیدواروں نے شرکت کی۔ ڈائریکٹر ایڈمیشنز ڈاکٹر فاطمہ عابد نے بتایا کہ جناح سندھ میڈیکل یونیورسٹی کے تحت ڈاکٹر آف فزیکل تھراپی(ڈی پی ٹی) 5 سالہ پروگرام کی 100 نشستوں پر داخلے کیلئے 2 ہزار 200 خواہشمندامیدواروں نے درخواستیں جمع کروائیں ۔

جن میں سے 1211 امیدوار اہل قرار پائے، انٹری ٹیسٹ میں 40 ایم سی کیوز سوالات بائیولوجی، 20 کیمسٹری، 20 فیزکس اور 20 انگریزی سے پوچھے گئے تھے، 100 نشستوں میں سے 90 پر اوپن میرٹ اور 10 پر سیلف فنانس پر داخلے دیئے جائیں گے۔

داخلہ ٹیسٹ کے موقع پر رجسٹرار ڈاکٹر اعظم خان، آئی پی ٹی آر کے ڈائریکٹر ڈاکٹر محمد خان، ڈائریکٹرایڈمیشنز ڈاکٹر فاطمہ عابد، ناظم امتحانات ڈاکٹر انیتا شاہ، قاضی شبیر و دیگر نے مختلف شعبوں میں قائم امتحانی مراکز کا دورہ کیا اور امیدواروں کو دی جانے والی سہولتوں اور انتظامات کا جائزہ لیا.

وائس چانسلر پروفیسر امجد سراج میمن نے امیدواروں کیلئے نیک خواہشات کا اظہار کرتے ہوئے کہا کہ طلبا صرف ڈگری کیلئے نہیں بلکہ انسانی خدمت کے جذبے کیساتھ اس پروفیشن میں قدم رکھیں، ڈی پی ٹی کی اہمیت وقت کےساتھ ساتھ بڑھتی جارہی ہے، طلبا اچھی تعلیم حاصل کرکے معاشرے کیلئے کارآمد شہری ثابت ہوسکتے ہیں۔

ایلون مسک نے ٹوئٹر کے سان فرانسسکو کے دفتر کی 100 سے زائد نایاب اشیاء آن نیلامی کیلئے پیش کردیں۔

گزشتہ سال ٹوئٹر کے مالک بننے کے بعد ایلون مسک نے پہلے سیکڑوں ملازمین کو فارغ کیا اس کے بعد دفتر میں موجود ملازمین کے لیے مفت کھانے کی سروس ختم کی اور اب ان کی جانب سے سان فرانسسکو کے دفتر کی پرانی اور قیمتی اشیا کی نیلامی کی جارہی ہے۔

رپورٹس کے مطابق ٹوئٹر کے مشہور پرندے والے لوگو کا مجسمہ 11 ہزار ڈالرز میں نیلامی کے لیے پیش کیا گیا ہے۔

اس کے علاوہ دفتر کی کافی میز، پرنٹنگ کا سامان ، صوفے، کچن کا سامان اور فرنیچر بھی نیلامی کے لیے پیش کیا گیاہے۔

گزشتہ سال نومبر میں ایلون مسک نے ٹوئٹ کرتے ہوئے انتباہ جاری کی تھی کہ کمپنی مالی نقصان میں جارہی ہے،ہوسکتا ہے کہ ٹوئٹر بینک کرپٹ میں ہوجائے۔

دوسری جانب گزشتہ دنوں یہ خبر بھی سامنے آئی تھی کہ ٹوئٹر پر سان فرانسسکو کے دفتر کا کرایہ نہ دینے پر مقدمہ کیا گیا ۔