کراچی :  ضیاءالدین یونیورسٹی اور اوکسفم پاکستان کے مابین مفاہمتی یاداشت پر دستخط کئے گئے جس کا مقصد صنفی تشدد کے خلاف آواز اٹھانا اور مختلف شعبہ زندگی میں اس سے متعلق شعور اجاگر کرنا تھا۔

اوکسفم پاکستان کی جاننب سے صنفی ماہر سرتاج عباسی کا اس موقع پر کہنا تھا کہ ہمارا مقصد یونیورسٹیز میں موجود طلبہ و طالبات میں صنفی ہراسگی سے متعلق شعور پیدا کرنا اور یونیورسٹی میں موجود ہراسگی کو کنٹرول کرنے والی انکوائری کمیٹی کے لئے ٹریننگ سیشن منعقد کروانا ہے۔ ساتھ ہی ساتھ معاشرے میں موجود وہ برائیاں جو جنسی ہراسگی سے جنم لیتی ہیں انہیں جڑ سے اکھاڑ پھینکنا ہے۔

اس موقع پر ضیاالدین یونیورسٹی کے وائس چانسلر پروفیسر ڈاکٹر پیرزادہ قاسم کا کہنا تھا کہ یونیورسٹی لیول پر جنسی ہراسگی جیسی برائی سے متعلق بات کرنا بہت ضروری ہے تاکہ طلبہ و طالبات کو اپنے حقوق و فرائض کا اچھی طرح اندازہ ہو سکے ۔ضیاءالدین یونیورسٹی اور اوکسفم پاکستان کی جانب سے جن چند شرائط و ضوابط پر اتفاق کیا گیا ان میں ایچ ای سی کی جانب سے ہراسمینٹ کمپلینٹ سیل کا قیام، اور اعلی تعلیمی اداروں میں جنسی ہراسگی کے خلاف تحفظ سے متعلق ایچ ای سی کی پالیسی کے مطابق اپنی پالیسی کو مستحکم کرنا جو کہ ایچ ای سی او ر خواتین کے لیے بنائے گئے جنسی ہراسگی سے تحفظ کی ایکٹ 2010 سے لیا گیا ہے۔

اسکے علاوہ صنفی نشدد، دقیانوسی تصورات ، اور صنفی طاقت کے عدم توازن کی عکاسی کرنے لئے یونیورسٹی میں وال پینٹنگ کا اہتمام ، سوشل میڈیا پر نوجوانوں اور صنفی تشدد پر توجہ مرکوز کرنے والی چار اینمیٹد فلموں کی اسکریننگ میں ایک دوسرے کی مددکرنا، نیز طلبہ و اساتذہ کے ساتھ صنفی و دقیانوسی تصورات اور منفی معاشرتی اصولوں کے خلاف سیمنار منعقد کرنا شامل تھا۔ ضیاءالدین یونیورسٹی اور اوکسفم پاکستان کی جانب سے ہونے والی مفاہمتی یاداشت پر یونیورسٹی کے رجسٹرار کیپٹن ریٹائرڈ سید وقار حسین اور صنفی ماہر سرتاج عباسی نے دستخط کیے۔

جامعہ کراچی کے وائس چانسلر پروفیسر ڈاکٹر خالد محمود عراقی نے جامعہ کراچی کے 09 ماہرین کواسٹین فورڈ یونیورسٹی کی تیار کردہ 2 فیصد عالمی سائنسدانوں کی فہرست میں شامل ہونے پر مبارکباد پیش کرتے ہوئے کہا کہ ہ کسی بھی جامعہ کے لیے تحقیق ریڑھ کی ہڈی کی حیثیت رکھتی ہے جو جامعات کی قومی اور بین الاقوامی سطح پر پذیرائی اورپہچان کا بہترین ذریعہ بنتی ہے۔

ڈاکٹر خالد عراقی نے نوجوان محققین کو تلقین کرتے ہوئے کہا کہ سینئر اساتذہ ومحققین کی تحقیقی طرز زندگی کو اپنے لئے مشعل راہ قراردیں۔انہوں نے مزید کہا کہ مجھے امید ہے کہ آئندہ جاری ہونے والے فہرست میں جامعہ کراچی کے مزید ماہرین کا اضافہ ہوگا۔

اسٹین فورڈ یونیورسٹی کی تیار کردہ 2 فیصد عالمی سائنسدانوں کی فہرست میں بین الاقوامی مرکز برائے کیمیائی وحیاتیاتی علوم(آئی سی سی بی ایس) جامعہ کراچی کے پروفیسر ڈاکٹر عطاالرحمن،پروفیسر ڈاکٹر اقبال چوہدری، پروفیسر ڈاکٹر خالد ایم خان،پروفیسر ڈاکٹر درخشاں جبین حلیم،پروفیسر ڈاکٹر وقار الدین،پروفیسر ڈاکٹر بیناشاہین صدیقی،پروفیسر ڈاکٹر محمد رضا شاہ جبکہ جامعہ کراچی کے سابق وائس چانسلر و انسٹی ٹیوٹ آف سسٹین ایبل ہیلو فائٹ یوٹیلائزیشن جامعہ کراچی کے سابق ڈائریکٹر پروفیسر ڈاکٹر محمد اجمل خان اور چیئرمین شعبہ ریاضیات پروفیسرڈاکٹر نجیب عالم خان کے نام شامل ہیں۔ اسٹین فورڈ یونیورسٹی ریسرچ سینٹر کی ٹیم نے پروفیسر جان بی اے لونیڈیس کی سربراہی میں یہ فہرست مرتب کی ہے جس میں مختلف علوم سے تعلق رکھنے والے تقریباً ایک لاکھ ساٹھ ہزار ماہرین کے نام اُن کے ریسرچ پیپر اور سائیٹیشن کی بنیاد پر شامل کیے گئے ہیں۔