ایمز ٹی وی (کھیل) نڈین پریمئر لیگ کی ٹیم دہلی ڈئیر ڈیولز نے سٹار بلے باز یوراج سنگھ کو سولہ کروڑ روپے میں خرید لیا۔ پیر کو آئی پی ایل سیزن آٹھ کیلئے نیلامی کے پہلے مرحلے میں حیران کن طور پر کسی کلب نے 108 ون ڈے میچوں میں 55.93 کی شاندار اوسط کے حامل جنوبی افریقی اوپنر ہاشم آملہ میں دلچسپی نہیں دکھائی۔ رائل چیلنجرز بنگلور اور ڈئیر ڈیولز کے درمیان رسہ کشی کی وجہ سے یوراج کی قیمت آسمان تک جا پہنچی۔ بلاآخر دہلی نے ورلڈ کپ سے باہر کیے جانے والے بلے باز کیلئے 16 کروڑ روپے کی پیشکش کی۔ خیال رہے کہ بنگلور نے گزشتہ سال 14 کروڑ روپے میں یوراج کی خدمات حاصل کی تھیں لیکن اس مرتبہ وہ دہلی کی پیشکش کا جواب نہ دے سکے۔ دہلی ڈئیر ڈیولز نے سری لنکا کے ون ڈے کپتان اینجلو میتھیوز کو 7.50 کروڑ روپے میں خریدا۔ چنائی سپر کنگز کے سابق اوپنر مرلی وجے کو، جن کی بنیادی قیمت 50 لاکھ روپے تھی، کنگز الیون پنجاب نے تین کروڑ میں خریدا۔ اس سے پہلے دو کروڑ روپے کی بنیادی قیمت رکھنے والے آملہ کا نام نیلامی کیلئے پیش کیا گیا لیکن کسی آئی پی ایل ٹیم نے ان میں دلچسپی ظاہر نہیں کی۔ آملہ اب تک 19 سینچریاں اور 27 نصف سینچریاں بنا چکے ہیں۔ ان کی بیلٹ میں 52.78 کی ٹیسٹ اوسط سے 23 سینچریاں بھی ہیں۔ آملہ کو نیلامی کے دوسرے مرحلے میں دوبارہ پیش کیا جائے گا۔

ایمز ٹی وی (آرٹ) بر ِصغیر کے ممتاز اردو شاعر کلیم عاجز آج علی الصباح جھار کھنڈ کے ضلع ہزاری باغ میں انتقال کر گئے۔  اُنکی تدفین پٹنہ میں ان کے آبائی قصبے میں عمل میں لائی جائے گی۔

کلیم عاجز 1925 میں عظیم آباد (پٹنہ) سے متصل بہار شریف کے دیہات ’تیلہاڑہ‘ میں پیدا ہوئے۔ کلیم عاجز کو دور ِحاضر کا میر بھی تصور کیا جاتا تھا اور کہا جاتا تھا کہ انہوں نے اپنی شاعری میں ’میر‘ کی جانشینی کا فرض نبھایا۔کلیم عاجز نے پٹنہ یونیورسٹی سے ایم اے اور ڈاکٹریٹ کی ڈگری حاصل کی۔ کلیم عاجز کو بھارت سرکار سے پدم شری ایوارڈ سے بھی نوازا گیا۔

کلیم عاجز اردو زبان میں ایک منفرد لہجے کے شاعر تھے اور ان کی درجن بھر سے زائد کتابیں دنیا بھر میں پذیرائی حاصل کر چکی ہیں۔ ان کی معروف تصانیف میں ’وہ جو شاعری کا سبب ہوا‘، ’جب فصل ِبہاراں آئی تھی‘، ’پھر ایسا نظارہ نہیں ہوگا‘، ’جہاں خوشبو ہی خوشبو تھی‘ وغیرہ شامل ہیں۔ کلیم عاجز نے دین کی اشاعت کے لیے بھی بہت کام کیا اور وہ بہار تبلیغی جماعت کے ساتھ گزشتہ کئی دہائیوں سے امیر رہے تھے۔

ایمز ٹی وی (ہیلتھ ڈیسک) ملتان میں تین روزہ انسداد پولیو مہم کا آغاز ہو گیا ہے پولیو مہم 18 فروری تک جاری رہے گی ۔ 

محکمہ صحت ملتان کے مطابق تین روزہ انسداد پولیو مہم کے دوران 5 سال سے کم عمر 8 لاکھ بچوں کو پولیو سے حفاظتی قطرے پلائے جائیں گے جس کے لئے 18 سو ٹیمیں تشکیل دی گئی ہیں ۔ پولیو کے قطرے گھر گھر پلانے کے علاوہ بس اڈوں ، ہوائی اڈے اور اسپتالوں میں بھی پلائے جارہے ہیں جبکہ پولیو مہم میں سیکورٹی کے انتظامات بھی سخت رکھے گئے ہیں ۔

ایمز ٹی وی (ہیلتھ ڈیسک) ملک کے قبائلی علاقوں میں آج سے تین روزہ انسداد پولیومہم کا آغاز کیا گیا ہے۔ مہم کے دوران 6 لاکھ 95 ہزار بچوں کو حفاظتی قطرے پلانے کا ہدف مقررکیا گیا ہے۔

فاٹامیں انسداد پولیومہم کے انچارج ڈاکٹر اختیار کے مطابق فاٹا میں سخت سیکورٹی انتظامات کے تحت آج سے تین روزہ انسداد پولیومہم کا آغاز کیا گیا ہے۔ اس مہم میں 6 لاکھ 95ہزار274 بچوں کو حفاظتی قطرے پلانے کا ہدف مقررکیا گیا ہے۔ جس کے لئے 2897ٹیمیں تشکیل دے دی گئی ہے۔ شمالی اور جنوبی وزیرستان کے بیشتر علاقوں میں بھی بچوں کو حفاظتی قطرے پلائے جائیں گے۔