کراچی: صوبے کی سرکاری جامعات کی کنٹرولنگ اتھارٹی وزیراعلیٰ سندھ نے جامعہ کراچی کے وائس چانسلر کے تقرر کے لئے موجودہ امیدواروں کے انٹرویوز کو خود لینے کا فیصلہ کیا ہے تاہم امیدواروں کے یہ انٹرویو سندھ ہائی کورٹ کی جانب سے دیے گئے حکم امتناع کے خاتمے کی صورت میں اور عدالتی فیصلہ سامنے آنے کے بعد ہی لئے جائیں گے۔
اس حوالے سے تلاش کمیٹی کی جانب سے تین مجوزہ نام وزیراعلی سندھ کو بھجوا دیئے گئے ہیں۔ جامعہ کراچی کے وائس چانسلر کے امیدواروں میں موجودہ قائم مقام وائس چانسلر پروفیسر ڈاکٹر خالد محمود عراقی کے علاوہ سندھ زرعی یونیورسٹی کے ڈائریکٹر ریسرچ پروفیسر ڈاکٹر خلیل احمد ابوپوٹو اور جامعہ کراچی کے شعبہ اطلاقی کیمیاء کے پروفیسر مہدی حسن کے نام شامل ہیں۔