ایمزٹی وی (تعلیم ) جامعہ کراچی کے منتخب اراکین سینڈیکٹ پروفیسر جمیل کاظمی نے وزیراعلیٰ ہاؤس کی جانب سے وائس چانسلر جامعہ کراچی کے اشتہار کو متنازع کرنے پر افسوس کا اظہارکیا ہے۔ انہوں نے کہاکہ جامعہ کراچی کا شمار ملک کی بڑی جامعات میں ہوتا ہے لیکن وہاں کے وائس چانسلر کے عہدے کو صرف سوشل سائنسز تک محدود کرنا افسوسناک امرہے۔ انہوں نے کہاکہ جامعہ کراچی کے میرٹ پروائس چانسلر کے تقررکے لئے تمام شعبوں میں ڈاکٹریٹ کرنے والے اساتذہ کو یکساں مواقع دیئے جائیں۔ انہوں نے کہاکہ ایسامحسوس ہوتا ہے کہ وزیراعلیٰ ہاؤس جامعہ کراچی میں من پسند وائس چانسلر مقررکرنا چاہتا ہے جسے ہم قبول نہیں کریں گے۔ پروفیسر جمیل کاظمی اور دیگر نے کہاکہ میرٹ پر وائس چانسلر مقرر کرنے کے لئے غیرجانبدار تلاش کمیٹی کا تقرر کیا جائے کیونکہ موجودہ اراکین میں کوئی پی ایچ ڈی نہیں ، بہتر ہے کہ خیبرپختونخواہ کی تلاش کمیٹی کی طرح سندھ میں بھی غیرجانبدار افراد اورغیر سیاسی افراد پر مشتمل تلاش کمیٹی تشکیل دی جائے۔ تلاش کمیٹی کی جانب سے ڈاؤ یونیورسٹی کے وائس چانسلر کے دوبارہ انٹرویوز لینے کے باعث پہلے ہی ڈاؤیونیورسٹی میں وائس چانسلر کا تقرر متنازع ہوچکا ہے۔