ایمز ٹی وی(کابل) افغان طالبان نے قندھار میں گورنر ہاﺅس کے گیسٹ ہاﺅس پر ہونے والے بم حملے سے اظہار لا تعلقی کردیا اور اسے مقامی داخلی مخاصمت کا نتیجہ قرار دے دیا۔

افغان طالبان کی جانب سے جاری مختصر بیان میںکہا گیا ہے کہ انہوں نے قندھار کے گورنر کے گیسٹ ہاﺅس پر بم نصب نہیں کیا بلکہ یہ مقامی داخلی مخاصمت کا نتیجہ ہے۔

واضح رہے کہ اس دھماکے میں متحدہ عرب امارات کے سفارتی عملے کے 5 افراد سمیت 9 افراد مارے گئے تھے جبکہ امارات کے سفیر جمعہ محمد عبداللہ الکعبی اور قندھار کے گورنر ہمایوں عزیزی زخمی ہوگئے تھے۔ جس وقت دھماکہ ہوا اس وقت گورنر قندھار کے گیسٹ ہاﺅس میں اماراتی سفارت کاروں کے اعزاز میں ظہرانہ دیا جا رہا تھا اوربم حملے میں اسی جگہ کو نشانہ بنایا گیا تھا۔

دوسری جانب افغان طالبان نے بدھ کو دارالحکومت کابل میں پارلیمنٹ کے نزدیک ہونے والے دو بم دھماکوں کی ذمے داری قبول کی تھی۔ ان کے نتیجے میں اڑتیس افراد ہلاک اور اسّی کے قریب زخمی ہوگئے تھے