راولپنڈی : جعلی اکاؤنٹس کیس میں نیب راولپنڈی نے مرادعلی شاہ اورقائم علی شاہ کیخلاف انکوائری انویسٹی گیشن میں تبدیل کردی، چیئرمین نیب نے منظوری دے دی ، عید کے بعد کیس میں گرفتاریوں کا امکان ہے۔
نیب راولپنڈی نے جعلی اکاؤنٹس کیس میں دادو اور ٹھٹھہ شوگر ملز کی فروخت کے معاملے پر وزیر اعلی سندھ مراد علی شاہ اور قائم علی شاہ کے خلاف انکوائری انویسٹی گیشن میں تبدیل کر دی۔
ذرائع کا کہنا ہے چئیرمین نیب جسٹس (ر ) جاوید اقبال نے انوسٹیگیشن کی منظوری دے دی ہے، عید کے بعد کیس میں نامزدملزمان کی گرفتاریوں کا امکان ہے۔
دونوں شوگر ملز کو کوڑیوں کے بھاؤ اومنی گروپ کو فروخت کیاگیا، جس کے باعث قومی خزانے کو کروڑوں روپے کا نقصان پہنچا، قومی احتساب بیورو شوگر ملز کو دی جانے والی سبسڈی کےمعاملے پر بھی تحقیقات کررہا ہے، جس کے دوران بہت سی اہم باتیں سامنے آئیں۔
مراد علی شاہ اور قائم علی شاہ اپنے بیانات بھی نیب کو ریکارڈ کرا چکے ہیں اومنی گروپ کے تمام عہدیداروں سے نیب کی تفتیش مکمل کرلی گئی ہے جبکہ سابق وزیراعلیٰ قائم علی شاہ نے عبوری ضمانت حاصل کر رکھی ہے۔