ایمزٹی وی(راولپنڈی) صبا ٹرسٹ و صبا ہوم کے زیر اہتمام امداد برائے زلزلہ زدگان کی تقریب کا انعقادکیا گیا۔ تقریب کے مہمان خصوصی وفاقی وزیر برائے مذہبی امور و بین المذاہب ہم آہنگی سردار محمد یوسف نے خطاب کرتے ہوئے کہا کہ ایک بچی کی تعلیم پورے معاشرے کی تعلیم کے مترادف ہے اور بے سہارا بچیوں کی تعلیم افضل عبادت ہے۔اس موقع پر ان کا مزید کہناتھا کہ ہر مذہب انسانی خدمت کی تلقین کرتاہے اور ہر شخص کے اندر انسانی خدمت کا جذبہ موجزن ہوناچاہیئے۔ یہی انسانیت کی معراج ہے۔انہوں نے صبا ٹرسٹ وصباہوم کو خراج تحسین پیش کرتے ہوئے کہا کہ بے سہارا بچیوں کو بہترین تعلیم وتربیت اور دیگر ضروریات زندگی فراہم کرکے دوسروں کے لئے ایک مثال قائم کر رکھی ہے۔بچیاں قوم کی مستقبل ہیں ہمیں قوم کی بچیوں کو زیور تعلیم سے آراستہ کرنا چاہیئے تاکہ ہمارا ملک ترقی کی منازل طے کر سکے۔ اس موقع پر صبا ہومز ایجوکیشن کے مینجر کرنل (ر) جانثار، ایل ڈی ایس چرچ اسلام آباد کے جنرل منیجر محمد ضیاءاور ڈاکٹر غضنفر مہدی سمیت دیگر رہنما شریک تھے۔