ایمز ٹی وی (تھر) تھر کےباسیوں کی مشکلات کم نہ ہو سکیں، چھاچھرو اور ڈاھلی ایک سو چودہ ٹیوب ویل ناکارہ ہونے کی وجہ سے پانی کا بحران سنگین ہو گیا۔ ایک طرف خشک سالی اور قحط دوسری جانب بیماری اور پانی کا بحران ،غذائی قلت کے مارے بچے موت کی وادی میں اتر رہے ہیں ۔ دیہی علاقوں سے لائے گئے غذائی قلت سے متاثرہ بچوں کا سول ہسپتال مٹھی کے نیوٹریشن وارڈ میں علاج کیا جا رہا ہے۔ ہسپتال ذرائع کے مطابق سول ہسپتال مٹھی میں غذائی قلت سے بیمار 30 بچے زیر علاج ہیں جن میں سے 2 کی حالت تشویشناک ہونے پر حیدر آباد منتقل کر دیا گیا ہے جبکہ نرسری وارڈ میں زیر علاج مزید دو بچوں کی حالت تشویشناک بتائی جا رہی ہے دوسری طرف جو زندہ ہیں انہیں پانی نہیں مل رہا ۔ چھاچھرو اور ڈاھلی تحصیل میں 114 ٹیوب ویل ناکارہ ہونے کے بعد پانی کا بحران شدت اختیار کر گیا ۔ 75 سے زائد ٹیوب ویلوں کے آلات بھی غائب ہیں۔ چھاچھرو انتظامیہ کو ملنے والی دو کروڑ کی گرانٹ شہر کیلئے 7 سال کے عرصے میں پانی کی فراہمی کا مسلہ حل نہ کر سکی ۔ شہری پانی خرید کر استعمال کرنے پر مجبور ہیں ، حتی کہ نقل مکانی کرنے والے قافلوں کو بھی پانی فراہم نہیں کیا جا رہا۔ رواں ماہ غذائی قلت کے باعث جانی کی بازی ہارنے والے بچوں کی تعدد اٹھائیس تک جا پہنچی ہے۔

ایمز ٹی وی (نیشنل ڈیسک) ورلڈ اکنامک فورم کی جنسی مساوات کے بارے میں رپورٹ میں کہا گیا ہے کہ سنہ 2014 میں جنسی مساوات میں پہلے نمبر پر آئس لینڈ ، یمن آخری اور پاکستان آخر سے دوسرے نمبر پر ہے ، ورلڈ اکنامک فورم کی جنسی مساوات کے انڈیکس میں 142 ممالک کی درجہ بندی کی گئی ہے۔ مزکورہ فورم کی رپورٹ میں کہا گیا ہے کہ پاکستان خواتین کے لیے معیشت میں حصہ لینے اور مواقع کے اعتبار سے 142 ممالک میں سے 141 ویں نمبر ہے۔ تعلیم کے حصول کے شعبے میں پاکستان کا نمبر 132 واں ہے جبکہ صحت کے شعبے میں 119 ویں نمبر پر ہے جبکہ سیاست کی عالمی درجہ بندی میں پاکستان کا نمبر 85 واں ہے۔ برطانیہ جو پچھلے سال جنسی مساوات کی درجہ بندی میں 18 ویں نمبر پر تھا اس سال 26 ویں نمبر پر ہے جبکہ بھارت پچھلے سال 101 ویں نمبر پر تھا لیکن اس سال اس کا 114 واں نمبر ہے۔ رپورٹ میں کہا گیا ہے کہ خواتین کی سیاست اور نوکریوں تک زیادہ رسائی کے باعث جنسی مساوات میں گذشتہ دس سالوں میں سنہ 2014 میں سب سے زیادہ بہتری آئی ہے۔ ورلڈ اکنامک فورم رپورٹ کی مصنفہ سعدیہ زاہدی کا کہنا ہے کہ عالمی سطح پر جنسی مساوات میں بہتری خواتین کی سیاست میں آمد اور خواتین کو ملنے والی زیادہ نوکریاں ہیں۔

ایمز ٹی وی (کراچی) متحدہ قومی موومنٹ کے ڈپٹی پارلیمانی لیڈر خواجہ اظہارالحسن نے کہا ہے کہ پیپلزپارٹی ایم کیو ایم کے احتجاج کو غلط رنگ دے رہی ہے اور اگر جلسے جلوس اور سیاسی عمل کو قرارداد کے ذریعے ایوان میں لے کر آنا چاہتی ہے تو پیپلزپارٹی کے جلسے کے خلاف بھی مذمتی قرارداد پیش کی جائے گی چاہے وہ قبول ہویا نہ ہو۔ اظہار الحسن کا کہنا تھا کہپیپلزپارٹی جس طرح کا عمل کرے گی اسے اس سے زیادہ شدت سے رد عمل دیں گے اوراگر ہمارے احتجاج پر قرارداد لائی گئی توپیپلزپارٹی کے جلسے پر مذمتی قرارداد پیش کریں گے۔ انہوں نے کہا کہ جمہوری عمل کی مذمت نہیں کرسکتے اگر کسی بھی جمہوری عمل کی مذمت کی گئی تو جواب بھی اسی شکل میں آئے گا۔ خواجہ اظہارالحسن کا کہنا تھا کہ اپنی طرف سے پارلیمانی روایات کو توڑنے میں کبھی بھی پہل نہیں کریں گے اور یہی توقع پیپلزپارٹی سے بھی ہے لیکن ابھی حکومت میں نئے وزیر ہیں جنہیں ان روایات کا علم نہیں تاہم کوشش ہوگی کہ پارلیمانی روایات کو برقرار رکھا جائے۔

ایمز ٹی وی (اسلام آباد) پیپلزپارٹی کےرہنما سینیٹراعتزازاحسن کا کہنا ہے کہ ایم کیو ایم کو چاہیئے کہ اپوزیشن لیڈر خورشید شاہ کے معاملے کو اس طرف نہ لے کر جائیں کہ مذہبی معاملات کو مخصوص مقاصد کے لئے سیاست میں متعارف کرایا جائے۔ اعتزازاحسن کاکہنا تھا کہ خورشید شاہ اپنے بیان پرمعافی مانگ چکے ہیں جبکہ ایم کیو ایم نےمعافی کے باوجود معاملے کو طول دینے کی کوشش کی تاہم متحدہ قومی موومنٹ کے قائدین سےاپیل ہے کہ اس بات کو غلط رنگ دینے کی کوشش نہ کریں اوراگر وہ چاہتے ہیں کہ نئے صوبے بنیں تو یہ مطالبہ درست ہے لیکن صوبوں کی تشکیل آئین کے ضابطے کے مطابق ہی ہونی چاہیئے۔ انہوں نے کہا کہ ایم کیو ایم 1985ءسے تسلسل کے ساتھ کسی نہ کسی حکومت کے ساتھ رہی ہے اور اب اس کا حکومت سے باہر رہنا آسان نہیں کیوں کہ ان کی سیاست ہی ایسی ہے اور اگر وفاق میں نہ صحیح تو صوبے میں وہ کسی نہ کسی حکومت کا حصہ بنے رہیں گے۔