ایمز ٹی وی(مانیٹرنگ ڈیسک) ایسا لگتا ہے کہ فیس بک کی زیر ملکیت ایک اور ایپ بھی ایک ارب صارفین کا اعزاز حاصل کرنے والی ہے۔ اب تک فیس بک، میسنجر اور واٹس ایپ وغیرہ اس سنگ میل کو طے کرچکی ہیں اور اب انسٹاگرام بھی اس کے قریب پہنچ گئی ہے۔
انسٹاگرام کی جانب سے اعلان کیا گیا ہے کہ فوٹو شیئرنگ ایپ کے ماہانہ متحرک صارفین کی تعداد 70 کروڑ سے تجاوز کرگئی ہے جو دسمبر میں 60 کروڑ تھی۔ اگرچہ یہ فوٹو شیئرنگ ایپ گزشتہ برسوں کے دوران صارفین میں کافی مقبول رہی ہے مگر حالیہ مہینوں میں اس کے صارفین کی تعداد میں تیزی سے اضافہ ہوا ہے۔ اس کی وجہ انسٹاگرام کی جانب سے سائن اَپ کے عمل کو بہتر بنانا، متنازع تبدیلیاں اور دنیا بھر میں نئے صارفین تک رسائی کے لیے اقدامات ہیں۔
واٹس ایپ، میسنجر اور فیس بک ایپ کے مقابلے میں انسٹاگرام کو ترقی پذیر ممالک میں کچھ زیادہ مقبولیت حاصل نہیں تاہم حال ہی میں اس نے ان ممالک کے لیے اینڈرائیڈ فونز میں آف لائن ورژن کی آزمائش شروع کی ہے۔ مگر اس کی مقبولیت میں نمایاں اضافہ اسنیپ چیٹ کے اسٹوریز جیسے فیچر کو متعارف کرانے کے بعد ہوا جسے استعمال کرنے والوں کی تعداد اسنیپ چیٹ کے مجموعی صارفین سے بھی زیادہ ہوگئی ہے۔ اب اس ایپ کے بیشتر صارفین امریکا کی بجائے دنیا کے مختلف حصوں سے تعلق رکھتے ہیں۔ انسٹاگرام کے مطابق نئے اقدامات جیسے الگورتھم فیڈ اور نئے فیچرز جیسے آف لائن دستیابی نے صارفین کی تعداد بڑھانے میں مدد کی ہے اور توقع ہے کہ رواں سال ہی ایک ارب صارفین کا سنگ میل طے ہوجائے گا
