ایمزٹی وی(اسلام آباد)پاکستان انٹرنیشنل ایئرلائنز نے حویلیاں طیارہ حادثے میں جاں بحق افراد کے لواحقین کو فی کس 50 لاکھ روپے معاوضہ دینے کا اعلان کردیا۔اس حوالے سے پی آئی اے کی جانب سے اخبارات میں اطلاع عام کے عنوان سے اشتہار شائع کیا گیا ہے جس میں بتایا گیا ہے کہ پی آئی اے ایئرایکٹ 2012 کے تحت 7 دسمبر 2016 کو حویلیاں کے قریب حادثے کا شکار ہونے والی پی آئی اے کی پرواز پی کے 661 کے ہلاک شدگان کے ورثا کو زر تلافی ادا کیا جائے گا۔ لواحقین کے ساتھ اظہار ہمدردی و افسوس بھی کیا گیا۔
اطلاع عام میں لواحقین کو مطلع کیا گیا ہے معاوضہ حاصل کرنے کے لئے لواحقین کو جانشینی سرٹیفیکیٹ پیش کرنا ہو گا۔ اس کے علاوہ ہلاک افراد کے وہ ورثا جو کمسن ہیں انہیں معاوضہ وصول کرنے کے لیے گارجیئن سرٹیفکیٹ و دیگر ضروری دستاویز پیش کرنے ہوں گے۔ پی آئی اے کی جانب سے یہ بھی بتایا گیا طیارہ حادثہ کے شہدا کے لواحقین کو پانچ لاکھ روپے پہلے ہی ادا کئے جا چکے ہیں۔
واضح رہے کہ 7 دسمبر 2016 کو پرواز پی کے 661 چترال سے اسلام آباد آتے ہوئے حویلیاں کے قریب پہاڑ پر گر کر تباہ ہوگئی تھی۔اس حادثے میں مسافروں اور عملے کے ارکان سمیت تقریبا 48 افراد جاں بحق ہوگئے تھے جن میں معروف نعت خواں جنید جمشید اور ان کی اہلیہ بھی شامل تھیں۔