اسلام آباد: وزیر برائے انسانی حقوق شیریں مزاری نے کہا ہے کہ پاکستانی این جی اوز کو بھی غیر ملکی فنڈنگ ملتی ہے، ان کی بھی رجسٹریشن ضروری ہے۔
ان خیالات کا اظہار انہوں نے صحافیوں سے گفتگو کرتے ہوئے کیا، شیریں مزاری کا کہنا تھا کہ مقامی لوگ پیسے کی خاطر غیرملکی این جی اوز کے دفاع میں آجاتے ہیں، ایسی عالمی آرگنائزیشن آئیں جس میں پاکستان اسٹیک ہولڈر ہو۔
رہنما پی ٹی آئی کا کہنا تھا کہ سنا ہے بلیک واٹر کی کوشش ہے امریکا افغان جنگ کو پرائیوٹائز کرے، بلیک واٹر جیسی ایجنسیز کو پاکستان آنے کی اجازت نہیں دے سکتے۔
ان کا کہنا تھا کہ حکومت نے بیرون ملک پاکستانی قیدیوں کی تفصیلات مانگی ہیں، حکومت بہت سے قانونی مفاد کے تحت قیدیوں کو واپس لاسکتی ہے، ماضی میں بیرون ملک پاکستانی قیدیوں کے لیے گائیڈلائن پر عمل نہیں ہوا۔
خیال رہے کہ سپریم کورٹ میں این جی اوز کی رجسٹریشن سے متعلق کیس میں سیکریٹری لا اینڈ جسٹس کمیشن نے کہا کہ ایک کمیٹی بنا دی گئی ہے، این جی اوز کی رجسٹریشن کے لیے ملنے والی درخواستیں کمیٹی کو بھجوا دی جاتی ہیں۔
واضح رہے کہ آج سپریم کورٹ میں این جی اوز کی رجسٹریشن سے متعلق کیس کی سماعت ہوئی۔ عدالت نے این جی اوز کی رجسٹریشن اور ان کی مانیٹرنگ کا کیس نمٹا دیا۔