ایمزٹی وی( کراچی) اندرون سندھ کا دورہ مکمل کرکے کراچی پہنچنے پر میڈیا سے بات کرتے ہوئے مصطفی کمال نے ایک مرتبہ پھر اپنی توپوں کارخ ایم کیوایم کی طرف موڑتے ہوئے کہا کہ جن کارکنان نے ماضی میں الطاف حسین کے کہنے پر قتل و غارت کیا اب ایم کیوایم ان سے اظہار لا تعلقی کرچکی ہے لیکن متحدہ کو انہیں اپنا کارکن تسلیم کرنا ہوگا۔

مصطفیٰ کمال نے کہا کہ ہم میدان میں نکلیں ہیں اب ایم کیوایم کو دوڑ لگواتے رہیں گے جب کہ الطاف حسین کی ’’را‘‘ سے فنڈنگ کے معاملے پر اگر کسی عدالت نے بلایا تو ضرور پیش ہوں گے اور اس بات کے ثبوت بھی پیش کریں گے کہ کس طرح بد امنی پھیلانے کے لیے فنڈز لیے گئے۔ انہوں نے کہا کہ ’’را‘‘ متحدہ کے قائد کو 22 سال سے شہر کو تباہ کرنے کے لیے فنڈنگ کررہی ہے اور اس طرح الطاف حسین ہماری 2 نسلیں کھا چکے ہیں اب تیسری کے چکر میں ہیں۔

پاک سرزمین پارٹی کے رہنما کا کہنا تھا کہ اندرون سندھ کا دورہ کامیاب رہا، وطن پرستی کا پیغام ملک بھر میں تیزی سے پھیل رہا ہے، لوگوں کو جمہوریت صرف اسلام آباد، لاہور اور کوئٹہ میں نہیں بلکہ ملک کے کونے کونے میں چاہیے جب کہ آئندہ چند دنوں میں کراچی میں مرکزی دفتر کا افتتاح کریں گے۔ مصطفی کمال نے اس موقع پر حیدر گیلانی کی بازیابی پر سابق وزیراعظم یوسف رضا گیلانی اوران کی فیملی کو مبارک باد بھی دی